ندمانة على الجواز
اعمل ايه لو حاسة بندم على جوازي؟ فترة الخطوبة كانت كويسة جدا وكنت حريصة فيها اني اتاكد انه مناسب بس للأسف بعد الجواز بدأت تظهر الاختلافات الشديدة بيننا ، ملحوظة انا اجلت الحمل سنة ونص وخلال السنة ونص كانت فيه الخلافات كل فترة وفترة بس زادت بعد ما حملت ( الحمل ندمانة علية اشد الندم رغم اني اجلت عشان ما اندمش ) ، مش بيعترف ب اي غلط عمله ، مش بيحتويني نفسيا ، شخصيتة ضعيفة شوية مع الناس فمش بحس ب امان ان لو حصلي مشكلة او اني لو عزت اعتمد عليه اقدر ، بيزعق احيانا ومعندوش مشكلة يقعد اسبوعين ميكلمنيش وينام ف اوضة تاني عشان ميعتذرش ، مبيعرفش يتناقش نهائي ، انا outgoing وبحب لما اخرج اصور وكدا هو بارد/هادي مش بيتكلم مش بيصور مش بيعمل حاجة ، بحس انه هو ملوش شخصية مفهومة مع الناس هو ساكت او بيقول الحاجة الي ترضي الي قدامه وانا العكس تماما بتناقش وليا اراء واضحة والمضحك انه هو قالي انه اتجوزني عشان كدا ، اقترحت عليه اكتر من مرة نشوف ثيرابي متخصص ف العلاقات الزوجية بس رفض ، احيانا بحاول اتجاهل الحاجات دي بس حاسه اني بحاول لوحدي في العلاقة ، هل طالما الزوج مش بيضرب مثلا او يهين فاي حاجة تاني تافهه؟ اعمل ايه؟ خايفة لو انفصلت اظلم الطفل الي جاي خصوصا اني اتربيت بين اهل متفاهمين فمش عايزة احرمه من الحاجة دي .. انا لسا ف اول الشهور بتاعت الحمل