بدون عنوان
السلام عليكم
اني هاي سنة شديت روحي كلش علمود اطلع إعفاء عام و خاصة انو جانت اول سنة الي بمدرسة حكومي يعني قبل جنت بمدارس أهلية بس فصلين و نوكف بعدين رحت خامس حكومي و جنت تعبانة كلش على نفسي و الحمدالله و بفضل الله طلعت معدل ٨٩ رغم انو هواي معلمات م جانوا يريدوني اصلا أنجح من دور اول، بس جان عندي إصرار قوي، المهم بعد ما طلعت اعفاء تقريبا بشهر رابع كلولنا نرتاح و بعد عطلة سادس ف اني هاي عطلة شهر كامل جنت مرتاحة بيه (أو بشكل أدق احاول ان ارتاح بيه) بس اخوي الجبير هوه مخلص صيدلة اهلية و فجأة يا ناس بدون مبالغة اول ما طلعت اعفاء خامس كام كلساع يسويلي مشكلة و يكلي انتي م تطلعين و يعرف بيه اريد معدل بالرغم من أنو والله اني أرضا بكلشي اجيبه اهمشي بس أشد حيلي و اهم شي حكومي لأن اهلي تعبوا عليه و هسه مارين ب أزمة مالية ف عندي اعتماد بس على يوتيوب و للعلم هوة جان فترة كورونا عنده ثلاث مدرسين خصوصي و معاهد و بالاخير رغم كل حذوفات 2020 جاب ٩٥ (ما ننكر أنو هذا خوش معدل صراحة) بس م طلع طبية صيدلة و هوة جان رايد طب عام المهم يعني كل هاي سنوات جان كلساع يأخذ فلوس من ابوي و امي و يشتم و مرات يدفعها و يضربها و اني ادافع رغم انو اني كلش صغيرة حجما مقارنة بالغول الي ضدي، باختصار جانت حياتي متوترة حتى بفترة خامس و جنت متعودة كل اسبوع يكوم يسوي ثلاث مشاكل او اثنين وي امي و اني اكلها لأن جنت انضرب منه و بالاخير ابوي يجي سكران يكلي خليه يضربج هوه خطية م طلع طب عام (اني شعلية؟ اذا مريض نفسي ليش اني الي ابلعها؟) و حرفيا ما اجذب عليكم والله شاهد ذيج مرة جنت حالي حال نفسي جانوا يتعاركون امي و اخوية و اني يم القفص مال عصافير بغرفة ثانية هوه دفع امي و شمرها على كاونتر مال مطبخ و اني بس اجيت علساس اشوف امي شبيها والقران حتى ما دخلت باب المطبخ و هوه اجالي ضربني على ضهري بحيث لحد هسه راح نطب بنص شهر خامس و اني ضهري يعورني كل ما انام على جهة معينة، مرت ايام و كل اسبوع كل يوم جان يسببلي مشكلة و امي بدال ما تحميني بدال ما تفصلني عنه تكوم تلومني اني و تكول لا تقرين كدامة ولا تحجين بسادس من تشوفني اقرة بغرفتي رغم انو الباب دائما مسدوس و صوتي ناصي من اراجع و حتى سماعات مخلية علمود محد يضوج من صوت محاضرات بس حرفيا بعدني ولا بادية بمواضيع كلها و هوة بالليل يعرف اني اريد انام يكوم يصيح و يفشر يم الدرج و ذيج مرة حطيت كرسي على باب علمود ارتاح و احمي نفسي جان يكسر كلشي و يجي يضربني والقران ما اريد شي جسمي كله انترس ضرب و محد من اهلي راضي يوخرني منه يعني مرات انام على سجادة صلاة و أكفر بنفس اللحظة لأن الله شلون هيجي مفرقني و مخليني انثى ضعيفة و حتى ذكاء ولا ثقافة عندي مثل بقية بنات و صديقاتي عبالهن اني جاي اسخت رغم انو اني اكثر وحدة جنت شاطرة بيناتهم بس مدري احس اريد ااجل هالسنة رغم هيه بدايتها اصلا م بادية و اريد احمي نفسي بس ما عندي أقارب و لا اخواني كبار يردون يخلوني ببيتهم لأن زوجاتهم م يرضون و صراحة حقهم يعني عائلة حالهم حال نفسهم ليش اضوجهم بس والله و القرآن تعبانة نفسيتي يعني ليش هيجي بدأ يغار من هسة و اني اصلا بديت عادي و هواي بنات متقدمين عليه اصلا؟