كأننا في سوق أو قهوة
وطبعا في وسط لجان السوق ديه بيكن صعب عليك كطالب تركز...
أغلب اللجان كده، يمكن بيشددوا بس على عدم وجود الموبايلات، لكن ممكن تدخل بالكتاب أو حل جماعي ومفيش مشكلة
وأعرف عيال كتير ما فتحتش كتاب بمعنى الكلمة، وبتجيب أعلى الدرجات وأنا متأكد إنه لو مفيش غش فجزء كبير جدا من الطلبة النهارده مش هيقدر يجيب ربع الدرجة في ورقة الامتحان
والمراقبين عايزين يروحوا ويمشوا في نص الوقت، فبيعملوا نفسهم مش شايفين عشان نخلص.
الوزير المزور لسه قايل من يومين في مؤتمر صحفي هنعمل منصة لاختيار المسارات وكل الصحف المعتمدة نزلت الكلام ده ونشرته
ولغت الإستمارات الورقية لتحديد مسارات شهادة البكالوريا لطلاب الصف الأول ، وهيكون فقط من خلال منصة برابط رسمي في الصيف
وده لأن المناهج لسا منزلتش اساسا
وبرضو تجنب تشتيت الطلاب وهم في الإمتحانات
بس مدارس كتير بتجبر الطلاب النهاردة اختيار المسار بالشكل ده من الوقتي وتسليمها
مش عارف هل ده هنسميه تدليس وزاري ولا قلة تنظيم وتخبط في تنفيذ القرارات...
وحتي لو الورقة ديه مش هيتاخد بيها بس أكيد خلينا الطالب وولي الأمر في قلق وحيرة
الي في اولى بكالوريا حاليا ياريت يقولولنا عملوا معاكم ايه
ده بقى حال معظم المدارس
نفس المنظر الي بشوفه من اعدادي وفي ثانوي والعيل بيعمل كده وهو فخور وبيضحك
الي وصل حال المدرس لده
والي كان سبب في اخلاق العيال توصل لتلك الهمجية
والي خلي التعليم بهذا الشكل
في كلام جوايا كتير....
اللي لاحظته من أغلب أصحابي وزمايلي إنهم مش مقتنعين نهائي إنهم ياخدوا تاريخ لأنهم علمي، وبيتحججوا بكده ومش بيذاكروها، ومعتمدين يفتحوها فقط ليلة الامتحان أو يغشوها.
المزور عملها بحجة زيادة الانتماء الوطني والكلام الحلو ده، وأجبرها كذلك على سنة تانية بكالوريا السنين الجايه، وواضح فعلا قد إيه نمينا الانتماء عند الطالب...
التاريخ مادة مهمة في سياقها الطبيعي، بس لكل مرحلة وتخصص أولويات يجب مراعاتها بما يخدم بناء الطالب أكاديميا ومهنيا.
طالب علمي المفروض أن يتعمق في دراسة العلوم الطبيعية التي تؤهله للالتحاق بالكليات العلمية والطبية والهندسية، وقيامنا باستبدال مادة الأحياء على الرغم من اعتبارها ركيزة أساسية لهذا المسار بمادة التاريخ... بجد إبداع لا يوصف.
والطالب يقابل الأحياء^(3) لأول مرة في تالتة
طبعا مش بشجع على الغش بأي شكل، لكن بحاول ارصد واقع موجود بين عدد كبير من الطلبة
هل نفس الفكرة منتشرة عندكم برضه ولا ايه؟
حتي الأن لا توجد اعمال سنة لسنة تانية وتالتة بكالوريا وفي طلاب كتير اقتنعوا بالبكالورية نظرا لعدم وجود أعمال سنة في سنة تانية وهي ميزة مقارنة بالثانوية العامة تانية ثانوي فيها أعمال سنة
بس هل الوزير المزور هيسمح مثلا لتانية بكالوريا متروحش المدرسة؟
كده هتكون بصمه عار ان لمدة سنتين الطلاب المصريين بعيدين عن المدرسة
وكذلك الوزير المزور بيحاول بكل ما عندة ينزل كل الطلاب المدرسة
ولأسباب كتير المدارس غير جاهزة والطالب كان بيحضر فقط عشان ياخد الدرجات وبيضيع وقته ويروح وفي تانية وتالتة الطالب مش هيحضر بس معتقدش الوزير المزور مش هيسمح بكده
في بداية تعينه في السنة الأولي له في 17/09/2024خلال لقاء مع رؤساء تحرير الصحف كان بيتكلم عن أعمال السنة الي هيطبقها وقال انها هتكون عدا 3اعدادي و 3ثانوي وقال بالظبط "وده محتاج تعديل قانون، هنقدمه لمجلس النواب، لما يشتغل إن شاء الله"[1]
والي بشكل واضح بيتكلم وقتها عن تعديل قانوني قريب يسعى له بشأن الشهادة الإعدادية والثانوية
عملنا تغيير قانوني بالفعل بعدها لتالتة اعدادي وعمل 20 في المية اعمال سنة هتطبق علي دفعة 2027-2028.
واتوقع قريبا هيكون في تعديل قانوني مشابه للبكالوريا بس لما الكل يقع في الفخ ونحذف خيار الثانوية العامة نهائيا ويضرب عصفورين بحجر انه ينزل طلبة تالتة بكالوريا لأول مرة كمان
فقط اتوقع لانه عموما مش هيستريح لو تانية بكالوريا منزلتش ولازم يعمل حاجة عشان يجبرهم بشكل ما.
في الجو الحر ده مطلوب من الطالب يقعد في اللجنة بالساعات بدون حركة ومعظم اللجان مش مجهزة زي كده مفهاش مروحة ولا تهوية كويسة والشمس ضاربة ودرجة الحرارة عالية
وده بيخلي الطالب يهبط بسرعة ويكون صعب عليه يركز والموضوع بيكون مرهق جدا
و ثانوية عامة السنادي هيمتحنوا في عز الحر 20 يونيو
والسنين الجايه كذلك والجو هيكون أحر تدريجيًا خلال السنين الجاية كمان فالمفروض ده يتاخد في الاعتبار بشكل جدي
والحل ان الحكومة تصرف وتركيب مراوح في كل المدارس وعلي الأقل
تسمح للطالب يجي بالهدوم الي تريحه من غير تشيرت المدرسة عادي نظرا لان اغلب العيال عندهم تيشرت المدرسة بكم وخماته مش قد كده
وتشجير حوش المدرسة وعمل مظلات تقلل التعرض للشمس بدل حوش الأسمنت والرمل ده
وتسمح للطالب اللي يخلص امتحانه يمشي من غير ما يفضل مضطر يقعد لآخر الوقت
وتراعي وقت الأمتحان لان في مدارس عندهم امتحانات الساعة 12 الظهر وايام من 12 الظهر لحد3 او 4 ونص العصر
كان الله في عوننا.
مساء الخير عليكو بالمختصر المفيد انا اول دفعه هيتطبق عليها العبث التعليمي دا .. ممكن ارائكم ف حوار المسارات؟
انا اهلي عايزين ادخل مسار طب اللي هو موازي لعلمي علوم مع اختلاف توزيعه المواد و بيقولولي مش هسلك ف المسار الموازي لعلمي رياضه بسبب الفيزيا و الماث ال advanced لانه غالبا اعلي من مستوي الثانويه العامه العاديه + ان كله ف سنه واحده بس
حد يقولي رأيه فالنظام الغبي دا و ايه طبيعه المواد زي الفيزيا و الكيمياء و البايو لاني مدرستهمش (لغوهم من سنه اولي وحطو مكانه حاجه غبيه ملهاش علاقه باي فرع منهم )
بس الماده كان اغلبها السنادي بايو شويه زي بتاع الثانويه وللأمانة مش حابه الموضوع رخمه بالنسبالي
ياريت اللي يديني رأيه يكون عارف نظام البكالوريا دا لانه مختلف تماما عن الثانويه العامه
وميتين الوزير ابو قرعه ❤️
لما كان بيزور مدرستنا مسؤولين كبار زي وكلاء من الوزارة أو الوزير بنفسه أو محافظ المدينة، كان بيجيلنا رسالة على الواتس في جروب المدرسة بالشكل ده
والمدير كان شوية ويعيط لنا عشان نحضر، وطبعا ماحصلش تفتيش ولا حاجة، مجرد تصعيد غير مبرر وتخويف
ومحدش أصلا بيروح المدرسة إلا في امتحانات الشهر، وبنغيب براحتنا
وأكيد مش بنحضر لأسباب كتير، منها إن المدرسة مش مجهزة ولا مهيأة، ولا حتى المدرسين كذلك.
وبرضه العيال لما بتحضر بتعمل خناقات وبلطجة، فـ الكل بيريح دماغه.
أكتر من مرة حصل الكلام ده، وبنحضرالمدرسة بدري باللبس المدرسي وفي الطابور. ياخدوا كام صورة، ويعدي المسؤول على كام فصل، وكنا كطلاب واخدينها مسرحية بمعنى الكلمة، وبنقول للمدرسين "ها التمثلية هتخلص امتي؟"
وكان المدرسون يكتبوا أي كلام على السبورة عشان يبان إنهم بيشرحوا، وننقل من بعض التقييمات، ونكتب كلام كتير في الكراسة. يدخل المسؤول يبص على التقييمات والكراسة مليانة، والحضور عال العال، يبقي احنا تمام وانتهي
وده معناه إن المسؤولين عن التعليم يا إما في غيبوبة حرفيًا، يا إما بيمثلوا إنهم في غيبوبة.
الفيديو من جروب الواتس لمدرستي وده السنادي وعملت تغير بسيط للصوت
اهلا السلام عليكم
التابلت الي بياخده طالب الثانوي و الوزارة بتصرف عليه 9.6 مليار جنية
بيكون مقفول وبيتمنع عليه كل حاجة بإستثناء متصفح كروم
وتطبيقين بالظبط من الوزارة
منهم تطبيق **المستبقل** ده الي بيكون مش شغال وبيوقف علي كده
ما المانع في ان الوزارة تسمحلك تحمل ادوات وتطبيقات تعليمية عادي والمفيدة زي اي تطبيق ملاحظات و تطبيق فلاش كارد Anki
وبعض المنصات مش بترضي تشتغل عشان محتاجة تطبيق ومنصات بيكون ليها تطبيق تسمحلك تحمل المحاضرات علي التابلت والي بيكون مفيد لما المدرسة مفيهاش نت
وتسمح بإمكانيات تانية زي تفتح الكاميرا عشان لو حابب تصور شرح من السبورة والبلوتوث لو حابب تربط سماعة وتسمح بنقل ملفات بدل ما الطالب بيروح لطرق جانبية بطيئة عشان يعرف ينقل ملفات
وفي كل الحالات لو انت في مدرستك بتمتحن علي التابلت ممكن تنزل تحديث وتقوم بقفل تلك الميزات كإجراء احتياطي بس.
وعن طريق حظر داخلى للجهاز تمنع مواقع.... عشان منشوفش ما نشوفه في المدارس حاليا
و المفضل يكون جهاز خالى من اي تشتت فيتم حظر shorts يوتيوب منحضرش يوتيوب بالكامل فقط الshorts وده عادي ممكن
طبيعي بيكون وقتك في الفترة ديه ضيق جدا فكان هيحصل ايه لما يعمل المواد خارج المجموع كلها في يوم واحد بدل ما انت بتضيع معظم وقت ال3 الايام في المواصلات وفي اللجنة مستنيهم يسمحلوك تمشي
يعني احنا سايبين للتربية الوطنية يوم كامل نتمحن فيه والفيزياء والانجليزي في نفس اليوم؟؟؟؟؟
و اغلب الجداول علي نفس النهج ده
عندي امتحان تربية وطنية وقلت أفتح المنهج
قمة الضحك لما ألاقي كلام على ورق ملوش علاقة بواقعنا
في الحقوق الأساسية للمواطن تكمن في تعليم جيد واحنا مش بندي التعليم حقة في المزانية اساسا
الدستور بيفرض 6% من الناتج المحلي للتعليم قبل الجامعي والجامعي وإحنا حاليًا 1.55% بس وبنملي باقي النسبة على الورق بديون.
القانون بيفرض مجانية التعليم قبل الجامعي وانت بتجبر الطالب يدفع مصاريف المدرسة ولو مدفعش بتمنه من انه يستلم كتاب
المدرسة وبتمنعه يستلم نتيجته
وبعض المدارس الحكومية بتفرض عليك تدفع المصاريف لما تقدم عليها في البداية خالص
بعيدا ان المادة ديه خارج المجموع عندنا يعني محدش بيفحتها ومش مهتم بيها
بس ماذا تنتظر مني الوزارة والحكومة ان اشعر كطالب لما افتح تلك المادة ازاي من المفترض مني استقبل هذا الكلام؟