ست بميت راجل | Opinion
كلنا كنا بنسمع الجمله دي لما نشوف ست اظهرت القوة والصبر فى ظروف متنوعه، بس عمركو سألتوا نفسكو ليه بنقارنها بالرجالة؟
حد هيقول عادى، القوة والشجاعة والصبر والجلد صفات ذكوريه، فلما نشوف ست بتتصف بيها بنشبها بالرجالة.
هرد انا بسؤال، ليه مبنقولش راجل بميت ست؟
لما بنشوف راجل بيتصف بالرحمه وعنده ذكاء عاطفي مبيقارنهوش بالستات، لا بيمدحوه بدينه واخلاقه واحيانا رجولته كمان! مع ان الصفات دي انثويه، لكن حرام علينا نشبه راجل بست.
الرجاله مش عايزه تعترف بانوثتها عشان المرأة اقل منهم، فازاى انا راجل اقلل من نفسي زي النساء.
وصلت بيهم الدرجه انهم ينسبوا الصفات الانثويه الحميده للرجل.
كنت باخد درس عربي قبل كده والمجموعه كانت صغيره، المدرس قالنا ان جمع المذكر السالم للعاقل فقط اما المؤنث للعاقل وغير العاقل، كان بيقولها بنوع من السخريه، المهم الكلام فتح لحد ما قال ما يتفهم على ان الرجوله شرف والانوثه نقص، وان المرأة تُمدح بالذكورة والرجل يُعاب بالانوثه.
انا رديت وقلت ان الانوثة فيها صفات حميده زي الرحمه، هو قال: لا، الرحمة عند النساء بتكون مفرطة، زي ما الام بتدافع عن ابنها حتى لو مجرم.
هنا مكنتش مصدقه نفسي، طول الوقت الذكوريين قارفينا ان المرأة مينفعش تتشبه بالرجاله وان ربنا خلقنا عاطفيين وحنينين عشان وظيفتنا الوحيده فى الحياة، اننا نكون سكن للزوج وام للطفل.
دلوقتي بيحرمونا من الصفه دي بس عشان ميعترفوش ان لينا افضليه عليهم. لما نبقى عايزين المساواة فجأة بيفتكروا قد ايه الانوثه مشرفه.
من رأيي نوقف نقول الجمله دي تماما، الرجل مش شرف والمرأة مش عيب.