سبب خوف البنات من التضحية
ربنا يعين صاحب البوست، باختصار بيحكي ان مامته ضحت ووقفت مع ابوه كتير لحد ما يتجوزوا ودفعت فلوس من معاها وسابت اهلها وسافرت معاه وفي الاخر بعد عشرين سنة حب يتجوز واحدة تانية وهي قالت له براحتك بس لو حصل هطلب الطلاق عشان مش هقدر استحمل، ف قالها خلاص مش هتجوز وبالاخر اكتشفوا انه متجوز واحدة ثانية من اربع سنين من وراها وطلعها من شقتها الساعة 10 بليل.
واحدة من قرايبي مرت بموقف شبه دا جدًا، سابت شغلها عشان جوزها وباعت دهبها له وصرفت من فلوسها عشان يتجوزوا بسرعة وبعد الجواز كانت بتاخد فلوس من اهله عشانه وبالاخير اتجوز عليها ورافض يصرف على عياله.
اغلب الستات زمان كانوا بيضحوا كتير اوي كدا، عشان كدا بنات الزمن دا رافضين تمامًا يضحوا، رافضين يسيبوا شغلهم او يبيعوا دهبهم عشان لو حصل غدر من الزوج زي القصص اللي سمعوها وشافوها، وبيتقال عليهم مش بنات اصول، جعنانين بخلاء وكلاب فلوس وماديات، وازاي جوزك يكون في زنقة ومتوقفيش جمبه؟ بالاخير جوزها من غير ما يكون في زنقة بيروح يتجوز عليها ويختار واحدة يعرفها من سنتين عن جوازة وعشرة عشرين سنة
بدون تحييز ولا تعصب، هل الرجالة مش متفهمة خوف النساء فعلًا؟ وليه الخوف دا بيخليهم يتعصبوا ويغضبوا؟ وكأنهم عايشين في عالم مثالي وعمرهم ما شافوا راجل بيعمل كدا؟؟ وبالاخير الزوج دا هيطلع يقول مراتي حرماني من عيالي وواخدة شقتي شقا عمري والخ