u/Careless_Middle8489

لاحظت شي كثير بيضحّك و هو كيف كانت الناس تتعامل مع المؤسسات و الدولة على النظام القديم و الجديد و كيف كانت الناس من قبل ترمي كل شي على الدولة حتى لو كانت البلدية أو أي مؤسسة أو دائرة حكومية و كيف هلأ صارت هالناس فهيمة و مُتَنوِّرة.

كمثال كنت بشوف الناس (وأنا منهم) كيف كانو بيلومون البلدية على الزبالة و الوسخ و النشح بالشوارع يلّي الناس رأت نفسها سببتها و بتقول "وينها البلدية؟! وينها الدولة؟! ليش ما بتجي تلّم كل هالوسخ؟!". هلأ عالنظام الجديد صرت تشوف الناس صارت فهيمة و بلشت تقول "لك هاد الشعب جحش و ما بيلبقله و إذا كل يوم اجت البلدية و عملت و ساويت رح يجي هاد الشعب و يرجع يكب زبالته بالشوارع".

كنت بتشوف وقت البلدية كانت تهد بيوت عشوائية و مخالفات كانت هدول الناس بتقول "الله أكبر على الظالم! وين بدها تسكن هالناس؟!". هلأ صارت هذول الناس تبرر للنظام الجديد و تقول "لك هدول كلهم بيوت و مناطق مخالفة يعني خارج عن القانون و بشعين للسياح و زاتي مافي حدا ساكنهم".

وقت كان شي واحد بمعنى الكلمة مجرم، قتّال قتلة، حرامي بيوتى تاجر مخدرات و غيره و غيراته تكمشه دورية جنائية و تعفسه قتلة و تاخده للقضاء كانت هالناس تقول "لك مظلوم لك الله يفك أسره! هاد أخذوه لأنه كان معارض!". هلأ إذا النظام الجديد بعت ناس يقتّلو و يحرقو الأخضر و اليابس بتصير هالناس فجأةً محققين و كلهم بيفهم بالقانون و بقولو "بلكي هدول الناس كانو مجرمين و إرهاب؟ حتى لو كانو نسوان و أولاد ما هنن بخلّوهم يحاربو!".

يعني بتحس أنو قد ما كانو حاقدين على القديم لازم يشمو ريحة قفاه للجديد كأنه ريحة فريز و ورد. كل شي عندهم بالجدية و الجكر لدرجة أن عندهم كامل الأستعداد يحرقو و يبيعو كل سوريا و يلّي فيها بس منشان الجكر. و كمان بتحس أنه هدول من جديد بس أجاهم الفهم و التنوّر و هلأ اكتشفو ان الشعب له يد في ذَلك و بهديك الأيام لك حتى أصغر عامل نضافة بالبلدية أو موّظف بشي دائرة كان البلّا كله و كافة الشعب بحياته ما عمل شي.

أنا كنت من هالناس مستني حدا اله علاقة بالدولة منشان نبلّش فيهم بس على القليلة الواحد لازم يشوف حاله بالمراية و ما يكون منافق. شغلة هي أنه الدولة و كل مؤسساتها اليوم رح تكون خالية من الفساد و القمع و بقيادة حكيمة شبيهة إلى الخلافة الراشدة بس لأنه السابق كان طاول فاشل من كل النواحي (لا تنسى أنه كانت تحت حرب و حصار سياسي و إقتصادي) هي شغلة حدبة و تافهة و يلّي يصدقها يا أما بكون غبي أو بكون بيعرف كل هالشي بس ما فارقة معه بس المهم هو أن يجاكر فلان و علتان.