محتار و مش عارف اعمل ايه
السلام عليكم
الموضوع بإختصار اني مقبل على قراية فاتحة و خطوبة مع حد صبر عليا ٥ سنين و هي حد قنوع و طيب و حنين جدآ عمرها ما بتطلب مني حاجة لو الحاجة جت مني و مريحة و شخصية تنفع أم لأودي ان شاء الله في المستقبل
المشكلة بدأت في اني ضايف والدتها عالفيس و مكانش بيننا كلام غير كل سنة و حضرتك طيبة و الكلام ده في المناسبات و خلاص، جت في رمضان طلبت مني ألف جنيه و قالتلي هرجعهم كمان اسبوعين و كدة استغربت جدآ بصراحه جايبة العشم ده منين مع تني حتى لسة مبقتش خطيب بنتها و لو حتى ملهاش تاخد مني فلوس بس أحسنت النوايا و حولتلها، بعدها بأسبوعين لقيتها بتكلمني فكرت هتقولي ترجعهم بيني و بينكم مكنتش هاخدهم عادي زي والدتي لقيتها بتقولي معلش عايزة ٥٠٠ كمان و اول الشهر هرجعلك كله سوا.. قولت يا عم ماشي (الموضوع خانقني فشخ بس بحسن النية ) نفس الكلام تاني بعدها بأسبوعين ٥٠٠ برضو كدة بقو توتال ألفين و معلش و حقك عليا و هرجعهم قبل ما تيجي تقرأ الفاتحة و كلام كدة و قولت خلاص مش هديها فلوس تاني عشان كدة الموضوع زاد عن حده و مش فاهم المفروض هي بتودي الفلوس دي فين (حاولت اتكلم مع خطيبتي المستقبلية بطريقة غير مباشرة انه ايه الوضع في البيت و كدة) قالتلي انه مش أحسن حاجة و هي و اخواتها شايلين الييت حرفيآ و ابوها بيصرف فلوسه على جدتهم و اخواته مش مهتم بالبيت، طيب هل هيعمل نفس الكلام مع تجهيزات الخطوبة برضو و يركننا ولا ايه ؟ البنت كانت محرجة و زعلانة و هي بتفهمني انه ممكن فعلاً يعطلنا بالشكل ده عشان هو غير مسؤول، نرجع لموضوع الأم طلبت مني من ٣ اسابيع ٥٠٠ رابع قولتلها والله عندي مشاكل في الشغل و بتاع معلش، بعدها بأسبوع تقولي طب معلش ٣٠٠ اقولها نفس السيناريو عشان اتخنقت منها بصراحة كل أسبوع تبعتلي قولتلها انا بشوف شغل تاني و الدنيا مش أحسن حاجة معايا و بقول لحضرتك مش بقبض ربنا يوسع علينا جميعاً و انا لما بيبقى معايا مش بتأخر عملت سين و مردتش حتى. فنا مش فاهم الوضع قافلني من قبل ما اخد اي خطوة رسمية بس البنت تستاهل بجد انا أعرفها بقالي ٥ سنين و بجد حد ربة بيت و مش متكلفة ولل تافهة زي معظم بنات اليومين دول مش عارف اعمل ايه و موضوع اهلها ان كان ابوها ولا أمها خانقني و مشيلني هم اي خطوة رسمية