دايما بنسمع عم موضوع المثبتات دا

في الي يقولك حط مسك ابيض او صندل او جلسرين او ايزو اي سوبر على اساس انهم هيثبتوا العطر من غير ما يغيروا الريحه

الحقيقه بقى ان العطر كيمياء

انت اي حاجة هتضيفها لازم هتغير في تركيبة العطر وبالتالي هتغير في رائحة العطر وخواصه ، عندك مثلا المسك الابيض دا مش مسك اصلا دا عبارة عن مكونات كيميائية زي الجالاكسولايد والهيديون وغيره وطبعا المكس دا هيتفاعل مع مكونات الزيت العطري وهيغير فيه

انت ممكن تقول كلها ١ مل مش هتفرق اوي لكن في الواقع العطر غالبا هيكون بتركيز ٢٠% ل ٣٠% علشان مش يبقع ففي حالة ال ٢٠% المثبت هيشكل ٥% من الزيت ودا رقم كبير

بالنسبة لتجربتي مع المثبتات

انا جربت الجلسرين والصندل والايزو اي سوبر

الجلسرين والصندل جربت احط منهم ١ مل لحد ٣ مل في قزازة ١٠٠ مل

ومش محتاج اقلك انهم خلوا العطر مزيت اوي وبيبقع في الهدوم وعالجلد ومكنش في فرق في الثبات او حتى وضوح الرائحة في نفس المده

الايزو اي سوبر كنت جربته مع عطر صيفي 😅 ١ مل في قزازة ١٠٠ مل (الايزو اي سوبر رائحته خشبيه بس صعبة الملاحظه) مع الوقت بدات الاحظ تغير في ريحة العطر بعد ما يبرد وبرضو فرق الثبات كان ضعيف اوي وغالبا كان بلاسيبو افيكت

واحدة من اكثر المواضيع الي منتشرة حاليا واكبر عذر للشغل التعبان ، العطر مش بيثبت ؟
ريحة الكحول فيه حاده؟
مش بيفوح؟
عتقه شهر وهتلقى الدنيا تمام (دا عكلام الناس) ،
فالواقع التعتيق مهم فعلا بس مش لدرجة انه يخلي حاجة خاماتها وحشه حلوه وتعال اقولك التعتيق بيعمل ايه ،
اولا في نوعين من التعتيق.
اول واحد هو النضوج ودا بيحصل لمكونات الزيت نفسه قبل اضافة الكحول ،
الزيت الي حضرتك بتستخدمه بيتكون من مكونات كيميائية كتير ممكن توصل ل ٨٠ مكون في زيت واحد فبيتم تعتيقها لمدة طويلة علشان تتجانس الجزيئات مع بعضها ،
المرحله التانيه هي التخمير هي دي بقى الي احنا بنعملها وهي اننا بنعتق الكحول والزيت سوا في مكان مظلم
ودرجات الحراره فيه من ١٠ ل ١٥ وبعيد عن اشعة الشمس وبتسيبة فترة طويلة من شهر ل ٦ شهور وطبعا الزيادة مش هتضر ،
طب اكيد انت سمعت عن التعتيق في الثلاجه او الفريزر ، الحقيقه ان مفيش فرق بينه وبين التعتيق الي قلت لك عليه والاثنين بيوصلوا لنفس النتيجه ، طيب ايه مصدر التعتيق المبرد دا؟
ببساطة هو جزء من عملية الفلترة المبردة وهي فلترة لشوائب العطر وبما ان العملية بتستمر لفترة طويلة فالناس خلطت بينها وبين التخمير. وبس بالتوفيق.