السلام عليكم،
احيانا لما قول اني بدي اتزوج ريّال حنون و غني الكل يجي ضدي ابتداءً من امي يلي بتقلي :المال مو كل شي يعني ما راح ينفعك- و اكيد بحترم رأيها-و انتهي برأي السوشل ميديا حيث صرت طمّاعة،رغم اني كتبت ميسور الحال.
انا بعرف شو مكانتي و بعرف طيبتي و أصلي يعني اذا لا قدر الله بيوم خسر الريال فلوسو ما راح اتركو لانو انا اكيد بحبو و لانو ايضا عاملني بالمنيح وقت الرّخاء فيعني هذا واجب اني اصبر معو على المرّة قبل الحلوة. بس يا اخي انا هيك ما بعرف ليه قلبي حاسسني انو ما لازم نقص من حالي ، الحمد لله ، الله عطاني من خيرو و ما راح امدح حالي بس بالمقابل مريت بفترات صعبة كتير بحياتي و الله وحدو يعلم و تعلمت منها و من تجارب غيري انو البنت ما لازم ترخّص بحالها. بعرف راح تقولو ليش ما تزوجتي لهلاّ وانا بعمر ٢٨ سنة و راح قول لانو كنت عم ابني مستقبلي و لسّا ما خلّصت و كل وقتي مكرّس للعلم لهذا ما بخرج كتير و امي علاقاتها محدودة . الحمد لله ماديا مرتاحة بس ابتديت احسّ بالفراغ العاطفي و بدي انسان طموح يشاركني احلامي ، ابن اصول و هون ارجع لمشكلة المستوى المادي ، بس صدقوني انا من النوع يلي بدو يوصل لثراء معيّن منشان ساعد الناس و الايتام بدي اخرج معو و نرسم البسمة على وجوه المحتاجين ، هذه نيّتي و الله اعلم بما في نفسي و بالأخير اقول : ياربّ أنا راضية بما كتبته لي و استغفرك على قلّة حيلتي و فرط تفكيري و انت اكرم الاكرمين.
ادعولي و الله يوفّق كل بنت و كل شبّ للزواج