كلية فاشلة (تجربة شخصية)
انا خريج ٢٠٢٦ و عايز اوضح اسبابي و ليه بقول كده
- كلية معتمدة على طرف تالت غيرك و غير مذاكرتك
الطرف ده هو البيشنت اللي كانت تجربتي معاهم كابوس بل وعندي الجرأة حتى اعمم التجربة على اغلبية الطلبة كمان من الكلام اللي بنقوله لبعض في الكلية .
اللي بيحصل كالاتي بيجيلك بيشنت انت و حظك طبعا هتستنى اسبوع اتنين تلاتة شهور انت و نصيبك بقى و الكلية او الدكاترة طبعا ملهمش دعوة اللي هو من الاخر اتصرف المهم توريني شغل ، و دي حاجة بحد ذاتها كفاية انها تحبطك حتى من قبل ماتبدا تعمل اي حاجة
المهم هييجي البيشنت تحاول تقنعه يلتزم بالمواعيد و ان الشغل هياخد كذا جلسة وابقى قابلني لو سمع كلامك طبعا
اللي حصل معايا تاخير و تاجيل في المواعيد و بقيت كده مضطر اسيب المحاضرات عشان احاول الحق اشتغل ودي اول كارثة و مش بايدي خلاص كده المحاضرة راحت عليك و لازم تذاكرها فالبيت وانت في كلية مينفعش تقعد فالبيت تذاكر لان مفيش مكان تشتغل في غير عيادات الجامعة و ادي يومك كله اتضرب
- مصاريف الادوات
مش محتاج اتكلم عن النقطة دي كتير انتو دكاترة و اكيد عارفين كفاية ان السنة الacrylic وصلت ل١٠ جنيه و اكتر كمان
- التدريب
عشان تتعلم اي مهارة في الدنيا لازم تتمرن عليها طالب حاسبات هيتمرن على اللابتوب في البيت او في اي مكان هو عايزه طالب عمارة هيرسم فالبيت او اي مكان هو عايزه
لكن في الكلية الفاشلة هتتمرن ازاي بعيدا عن الكلية اللي بتضغطك بالتقييم وانك مرتبط بdeadlines
هتجيب منين بقى patient تتمرن عليه برا الكلية الا طبعا لو ليك سكة في عيادة خاصة وطبعا بالاعداد دي قلة قليلة بس اللي عندهم الرفاهية دي
يا اما كورسات بالالاف عشان بيشنت او اتنين
و اللستة تطول يعني بس ده اللي جه في بالي حاليا
الخلاصة من الاخر دي افشل/احقر كلية في مصر اتمنى فالمستقبل محدش يفكر يدخلها الا لو عنده القدرة انه يتخطى المشاكل باي شكل سواء له سكة في عيادة و في دكتور هيهتم بيه بجانب قدرة مادية عالية للكورسات عشان يعرف يطور من نفسه قدام غير الادوات غير لو هيفتح عيادة خاصه بيه غير اتمنى محدش يعشم نفسه في مكان مهلك نفسيا زي ده
كانت اتعس ايام حياتي الله لايعيدها ايام