من شهرين اتقدمت للبنت اللي بحبها.
كخلفية، أنا مصري ، ٢٧ سنه، مهاجر في دولة غربية، وعايش عمري كله تقريبا بره مصر. دائما كنت بنزل مصر اجازات بس عمري ما استقريت. من سنتين ما بين شغل نزلت مصر وقعدت تقريبا سنه. أنا من طبقة مرتاحة الحمد لله وهي من طبقة فوق المتوسطة.
اتقابلنا وانا في مصر اونلاين، واتكلمنا فترة قبل ما اتقابلنا، ولما اتقابلنا كذا مره قلتلها اني جاهز أتقدم ونسافر. هي نفسها تسافر بس ساعتها قالتلي استنى علشان لما تتقدم لبابا هيطلب منك شقة في مصر ومش هيتناقش فيها. وأنه لازم اجهز الخ. سافرت شغلي تاني وفضلنا بنشوف بعض، وبنتقابل ونتكلم حرفيا كل يوم، علاقة long distance لمده سنه ونص تقريبا.
جهزت نفسي وروحت أتقدم لابوها. في الاول كان بيحقق معايا بover شوية، بس تفهمت لأنها اكيد بنته وهو حرفيا ميعرفنيش. حكيتله اني عايش بره وعايزها تعيش بره معايا واتفق بس فعلا اشترط عليا شقة في مصر وتكون "مقفولة". بعد كذا مكالمة فك، وقرينا فاتحة وكان لذيذ جدا في معاملته، وكان متحمس كمان للخطوبة.
كلمته من يومين وقلتله اني عايز اخد منه كلام من ناحية توقعاتهم في الشبكة والجهاز الخ علشان ميحصلش خلاف، لان لقيته بيجهز لخطوبة وبيصرف، وبس حبيت أحط النقت على الحروف مش اكثر.
أنا متفهم موضوع الشقة ودي حاجة أنا كنت عامل حسابي عليها، وكمان قولت لنفسي أنا مش عايز حد يحط مسمار في شقتي، بس مش عايز اكتب قايمة.
المهم فوجئت انه بيقولي عايز يعمل الرفايع (الستاير والسجاجيد مثلا) وانا اتحمل كل شيء واكتب قايمة بكامل العفش. وموخر ٤٠٠ الف، والشبكة "حسب تقديرك"، (بس طبعا الexpectation مش هيقل عن ٣٠٠ الف)
هل ده طبيعي؟