يعني ايه حروق؟

إصابة/جرح ناتج عن التعرض للحرارة/مواد كيميائية/كهرباء أو إشعاع.

يعني إيه حروق طبياً وعلمياً؟

الحروق بتحصل على المستوى الخلوي لما البروتينات بتبدأ تفقد أشكالها المميزة واللي كانت بتخليها تقوم بوظايفها المختلفة.. بالإنجليزي:

"Denaturation of proteins"

بالإضافة لتفكك غشاء الخلية وانهيار هيكلها وفقدانها القدرة على إنتاج الطاقة.

إيه درجة الحرارة اللي لما بتوصل عندها بتبدأ البروتينات دي تتكسر وتفقد أشكالها ووظايفها؟

في البشر درجة الحرارة دي بتكون ٤٤ درجة مئوية. لو زادت درجة الحرارة عن كده الحرق بيبقى أسرع وأشد.

إيه هي درجات الحروق والفرق بينها؟

تقسم لأربع درجات طبيا أو ٦ في الطب الجنائي

حروق الدرجة الأولى: الإصابة لا تتعدى طبقة الجلد الخارجية (البشرة) وتتميز بالإحمرار ومش بتسيب مكانها ندبات.

حروق الدرجة الثانية: تخترق البشرة وتصل إلى الطبقة الثانية من الجلد (الأدمة) التي تحتوي على الأوعية الدموية والنهايات العصبية، وتتميز بظهور الفقاعات المائية وهي الأكثر إيلاماً.

حروق الدرجة الثالثة: الإصابة تصل لطبقة الدهون وتتميز بتكوُّن قشرة بيضاء أو سوداء.

حروق الدرجة الرابعة: الإصابة تصل لطبقة العضلات والعظام.

الدرجة الخامسة (طب جنائي): تفحم جميع الطبقات إلى العظام.

الدرجة السادسة (طب جنائي): تفحم جميع الطبقات بما فيها العظام.

نعمل إيه لو اتعرضنا للحرق؟

أول وأهم حاجه بنحط الجزء اللي اتعرض للحرارة تحت الحنفية (ماء فاتر) 💧 لمدة لا تقل عن ٢٠ دقيقة، ليه؟

عشان المياه عندها القدرة إنها تمتص الطاقة الحرارية الكامنة اللي جسمك امتصها، ليه برضه؟

لأنها تمتلك سعة حرارية عالية يعني مش بتسخن بسهولة وبالتالي بتسحب الحرارة من جسمك. لو شيلت إيدك من تحت المياه هتبدأ تحس بالوجع والحرقان بيزيد لأن الحرارة مش لاقية مكان تروحه ف بتبدأ تتغلغل في جسمك بدل ما تتشد في المياه.

⚠️ اوعى ثم اوعى تحط مياه مثلجة أو ثلج على مكان الحرق، انت كده بتزود الطين بلة؛ عشان الأوعية بتضيق وبتزود تلف الأنسجة أكتر.

لو حرق درجة تانية فأكثر أو واخد مساحة كبيرة من الجلد عليك وعلى المستشفى جري.

ليه الناس اللي بتتعرض لحرق لمساحة كبيرة من الجلد ممكن يجيلها قرحة في المعدة؟

تُسمى قرحة كيرلينج. لما بتتعرض لحرق لمنطقة كبيرة (٣٠٪ أو اكتر من مساحة الجلد) بتفقد سوائل وبلازما كتير وجسمك بيبدأ يدخل في حالة من الجفاف وقلة حجم الدم فالجسم بيبدأ يوجه الدم اللي حجمه قل نتيجة للتبخر أو التسرب خارج الجسم للأعضاء الحيوية (اللي المعدة مش منها).

بيوجه الدم دا إزاي؟

الأوعية بتنقبض في الأماكن اللي مش عايز يوجه لها الدم زي المعدة وتتوسع في الأماكن الأعضاء اللي عايز يوصل لها الدم زي القلب والمخ.

ليه لما الحاجات العضوية بتتعرض للحرارة لفترة طويلة بيكون لونها أسود؟

لما المواد العضوية بتتعرض للحرارة لفترة طويلة، بتتكسر روابطها الكيميائية وتتبخر عناصرها الخفيفة زي الأكسجين والهيدروجين على شكل غازات وأبخرة، بينما يتبقى عنصر الكربون وحده لارتفاع درجة غليانه، مما يرفع تركيزه بشدة في النسيج المتبقي في عملية تُعرف بـ الكربنة. وبسبب الترتيب العشوائي لذرات الكربون المتبقية، يصبح النسيج المتفحم ممتازاً في امتصاص الطيف الكامل للضوء المرئي الساقط عليه دون أن يعكس أي طول موجي إلى العين، وهو ما يفسر رؤيتنا له باللون الأسود الداكن.

صباح الخير