حاجيت اهلي اني اريد اشتغل عادي اشتغل بدوام جزئي حالي حال باقي الطالبات الي وياي يشتغلن وعدهن مصدر دخل خاص سواء محل ملابس او عيادة تجميلية او تدريس بس عارضوني بسبب ان ممكن يتحرشون بيا كلتلهم تره من اتعين هم اشتغل فشراح تفرق اذا اشتغلت هسه او بعدين كالولي انتي بله ماتهتمين لكلام الناس بس فكري شراح يصير بينا طبعا اخوي العبقري الي كال هذا الكلام وامي تضحك وتسوي تعبيرات مستفزة تناغما وي كلام اخوي للامانة استفزتني..استفزتني حركاتها اكثر حتى من كلام اخوي حسسوني مشاعري ورغبتي مالها قيمة اخوي كلي لاتصيرين انانية وفكري بيا خاصة واحد معروف مثلي اصدقائي يدورون عليا الزلة تدرين هسه يكلولي اختك تشتغل يكلي ماراح يلكا شغل ولا يقبل احد يزوجه سمعته تتشوه من وراي طبعا ماادري ليش انزلق لهل المنحدر وهو مجرد شغل حرفيا انا وي اهلي وين مانطلع لاي محل نلكا بنية او اثنين واكفات بي يشتغلن سواء محل ملابس او كوزمتك او اي شي مو كفر الواحد يشتغل ويعتمد على نفسه تره اوكي انا ماكاتله روحي على الشغل لهل الدرجة جانت مجرد فكرة عابرة(مو فكرة جدية ١٠٠٪ اصلا) بس الي قهرني وخلاني اصعد الموضوع تفكيرهم ونظرتهم الي
يعني انا انصدمت حرفيا انصدمت من كمية التفكير التعبان الي سمعتها يعني انانية منهم يوكفون بطريقي وممنوع اشتغل او اسوي اي شي بحجة ان مفتاح شرفهم موجود عندي يعني مكلفيني شي مااريد اتكلف بيه ومحمليني مسؤولية مااريد احملها ويكلولي انانية مني ان اختار اعيش حياتي وانهي حياتهم الاجتماعية... هاي مو انانية مني، هاي حياتي وبكيفي اختار اسوي الي يعجبني انما انانية منهم هم يعيشون حياتهم على حسابي وحساب حريتي واستقلالي ويقدسون كلام الناس ورضاهم على الي اريده انا، هسه لو من رفضو ومخلين الموضوع يتمحور عني انا اوكي خل يوكفون ضدي ماكلنه شي عادي بس لو مخلين سبب الرفض يتمحور عني وحاوروني بمنطق ليش مايصير من اجلي انا جان اتقبلتها وماكلت شي علاقل يحسسوني بهل الطريقة انهم مهتمين بيا انا صدك والي يهمهم هو انا بالدرجة الاولى لكن ربطو روحهم بيا وكالولي فكري بينا وبكلام الناس وياهو يتزوجج عدهم على ساس فكرو بيا وهو سمعتي تهمهم بس بطاري موضوع الزواج، واستهزئو بمشاعري خاصة امي وهي تضحك وتستهزء وتسوي اشياء مستفزة، باختصار هذا بالضبط الي غثني انهم رابطين روحهم بيا ومافكرو بيا انا من رفضو بل بروحهم والناس شيكولون وشيصير بيهم بعد تلطيخ السمعة يعني ماشايفيني كيان منفصل عنهم، انوب كلساع يكلولي منو ياخذج ومنو ياخذج يحسسوني الزواج كلشي وحاليا امي جاي تسوي المستحيل حتى ترجع وجهي ابيض لان بسبب ضربه شمس خفيفة تغير لونه وصار شوي اغمق بدرجتين يمكن من جسمي فأمي شايفتني تشوهت وخربت تكلي التفاحة المضروبة محد ياخذهه تريدني ارجع بيضه ودائما تكلي منو ياخذج وانتي صرتي زركة وتكول استخدمي ذن بلكت ترجعين بيضة وتمشين اريد امشيج ادري شنو انا سلعة حتى تمشيني؟ لعبت روحي صدك تعبت ان اهلي اقرب الناس الي ماشايفيني بشر مااكدر اكون مثل ماانا لازم بقالب محدد علمود وجههم كدام الناس بينما الامور الي اريدها جدا بسيطة حرفيا بس مجتمعنا معتبرهه جريمة
بصراحة مااحب من امي تروج بيا بطريقة معينة كدام الناس اوكي خل تروج مو غلط تدورلي على عريس الخ بس الغلط تدرون وين؟ من تروج عني بهاي الطريقة التعبانة اني بلاصل بيضة لكن.... مع تبرير طويل شلون غمقت شوي كأنو من المعيب اكون سمرة وايضا تطلعني اني ضالميني بالمعدل وهذا مو معدلي بينما انا ادري بي معدلي هذا واستحقاقي وان المفروض انا مو بهل الكلية بينما بالواقع انا اختاريتها وايضا تقلل من البنات الثانيات بس لاني ماافضل احط مكياج او بلاحرى مالي خلك ومااحب الميكاب عموما(مااقصد شي هذا مجرد راي شخصي ماافرضه على احد وكل الاحترام لكل الاذواق) انا ممكن احط من يصيرلي خلق بس خفيف جدا بس بالغالب مااحط ف أكره ايضا من امي تستخدم هالنقطة وتقلل من البنات الثانيات وتطلعني المختلفة تكول ترة بنتي مو من هذن هي من ارادتها انا ماجابرتها من يومها تكره هالسوالف التعبانة ولا مثل باقي البنات يعني تقلل من باقي البنات حتى ترفعني وهالشي انا امقته جدا اشوف كلمن وحريته وبكيفه والي يرتاحله انا مو احسن منهن بسبب هيج شي سطحي مااكو احد احسن من احد ودائما اكول لامي ماتحجي عني بهل الطريقة بس تكلي معليج هسه لو تحجي اشياء بيا فعلا وتستحق الفخر ماعندي مشكلة بس ان تفتخر بهيج شغلات وبهل الطريقة هذا تفكير اقل من التعبان بكل صراحة