التفكير راح يقتلني
بداية انا إنسان مسلم شيعي
المشكلة انا أميل للتفكير المنطقي والاخذ بالأسباب لكن من بدت تصير عندي شكوك وحاولت اتعمق بالدين سقط عندي اغلب الدين وإيماني بدأ يتلاشى
وهذا قبل لا اتعمق بعدني بالأمور السطحية بدأت تظهر التناقضات مثل ليش الله خلق بعض الناس اذا يعرف مصيرهم النار؟ لا تگلي انطاك عقل وانتَ مخير مو مسير لكن الله قبل لا يخلقني يعرف مصيري حتى لو چنت مخير؟ وكيف مخير اذا الله خلقني وخلق بيئتي ويعرف راح اتأثر بهاي البيئة؟ (طبعًا هسه يجي واحد ويگلي انتَ تتعذر لأن عندك ذنوب او ما تصلي، لا الحمدلله اصلي واصوم وملتزم ونشأت ببيئة ملتزمة لا تحاول تغير السالفة وتهاجم)، من تجي يگلك الله ارحم من امك، ما اتوقع امك راح تقبل تحرگك حتى لو سويت غلط، نگول الله عادل وامك مو عادلة، بس هل امي راح تجيبني للدنيا اذا چانت تدري بيه راح احترگ بالاخير؟ اكيد لا
من نجي للجنة، الي مذكور بالجنة اغلبه أشياء تقنع واحد عايش بالصحراء قبل 1400 سنة، نهر لبن، جواري ونساء، نهر خمر، فاكهة، برو ما جاي اگدر اقتنع وحتى من افكر بالجنة ما جاي تجيني رغبة اروح الها لأن احس افقد هويتي ومنو انا وهذا شيء ما اريده
واذا يجي واحد ويگلي هاي امثال للجنة، طيب اذا امثال القرآن نزل مو بس للفترة هذيچ بل لتنظيم الحياة حتى يوم القيامة ومن يجي المؤمن الحالي يشوف الجنة الي مذكورة ما يقتنع بيها ولا يريدها
وهم سالفة الجواري(ملكات اليمين)، النبي كان عنده جواري واغلب الصالحين ويجامعوهن هم، طيب اشلون إنسان مؤمن ويعتبر رسول للناس يخلي النساء عنده جواري ويجامعهن بالإكراه والله على ابو اسرى حرب ومدري شنو؟ تعال يعني اذا صارت حرب وچان اهلك من ضمن الكفار او الجهة المعادية للإسلام راح تقبل ينأخذون اهلك جواري ويجامعوهن المؤمنين على ابو اسرى حرب؟ يا اخي هواي سوالف بس ما اريد اطول
بأختصار الشي الوحيد الي مخليني بالدين هوَ الخوف من العقاب بسبب الأفكار الي انزرعت براسي من الطفولة (يعني ليش كل هذا التخويف من حرگ وقتل وذبح وسلخ بالجحيم ولآلاف السنين يعني كإنما انوجدت هاي الآيات حتى تخوف إنسان جاهل قبل 1400 سنة وتخلي يؤمن ويزرع هاي الافكار عندي الاجيال القادمة)
والله دخت ادري بنفسي حتى لو تركت الإسلام راح يبقى وسواس عندي بشأن النار والعذاب والعقاب والقرآن والي يزيد العذاب اكثر عندي وسواس قهري يعني الوسوسه راح تصير x100
مدري شنو اسوي