Nisu moje besedi, ma mi se pijaža
Quote
Ko da ne moremo fermat grde vijesti ke saki dan prihajaju do nas. Ča smo to postali i ča smo si to storili? Ne volimo više ni blago ni judi. A rekal bin - kad ovo delamo - više ni sameh sebe. Ipak, još je jako čuda dobreh judi. I ja stvarno verujen va to.❤️
Evo nekoliko besed z ove vele i plešjive glavi, verujen da ćete prepoznat i sebe i čuda njih va njoj.
Ako van se pjaža, delite. Ako van se ne pjaža, nemojte. 😄
DOMOLJUBNA
Za ča su se borili naši brižni oci
Za ča su se suzi ke su imele naše materi splakale
Ča nan je skrivila ova naša lepa zemja
Da je ko staru krpenjaču vritnjakamo sada?
Više niki ni štiman.
Ni stareji, ni duhtor. Ni profesor. Ni plovan.
Aš mene je zgojil neki drugi, stari svet
Ne boj se, mi smo znali ča j’ autoritet
Trag od prsti na lice od ćepi
I lilaste crte od šibi na rite
Dečje suze ke su kot slap hodile
Danaska znan koliko su vredile
Hvala van.
Plovani, duhtori, meštrice,
nonići, none, mama i tata.
Ča od mene niste storili današnjega Hrvata.
Da mirno gren spat.
Da su mi se na svete deca, žena i brat.
Da neću lagat.
Pomoć brižnen i provat ih škapulat.
Z dragemi judi škercat.
Kantat. Sost. Boće igrat.
Onen ki ne zasluže, neću ni srat.
Koliko god moren,
ja volin bit takov Hrvat.
A danaska?
Mularija ti ne reče ni boh
Zvicjana, bezobrazna, joh i kataloh.
Ča ih vadimo? Da imaju sa prava
Da plovan je budala, a meštrica stara krava.
Grdo reć, zmerat, tuć
Skrit, ubit, krast, lagat
Nećeš uspjet ako ne budeš -
Tat.
Tat - Hrvat budi sine
Na kušine od bile stine
Crekav hodi, ma Njegoveh zapovijedi se ne drži.
Brižnemu i ono ča ima zami.
Sedan smrtneh grehi - seh ih stori!
A kad te neki po pute ferma
Vavek reci - znaš ti ki san ja?
Pa nastavi krast, lagat
Budi naš, budi tat.
I blago ne štimaj
Nego ga zapri, tuci
Pa ni jedan običan brek
Vredan ko ti.
Varaj, sine, se pokradi.
Ma va zemju svoju se vavek kuni.
Skrij se zad bandjeri i ne muči.
Ča više zijaj. Zijaj, sine! Da te čuju si.
Za ča su se borili naši brižni oci?
Zemjo moja draga.
Ča smo to s tebe storili?
Ča smo zibrali,
To smo i dobili.
Sran me je grba kega volin
Zad kega se skrivaju tati
Skrivan se od srama
Zad zaprteh poneštar i vrati.
Na ča smo spali mi Hrvati.
Ča za ovo su se borili naši oci?
Prekrasna moja zemjo.
Oprosti.
M. Staraj, 18.05.2026.