u/Legal-Breakfast2570

أظن الكل ملاحظ كيف الشباب والبنات بآخر ست سنين تقريبا صاروا يتأخروا بالزواج. طبعاً ما شفت إحصائية رسمية منشورة عن الموضوع، بس نسبة العازبين من الجنسين اللي أعمارهم فوق الثلاثين او قريب من الثلاثين صارت إشي واضح للجميع.

برأيي، الأسباب الأساسية هي السوشال ميديا وعادات وتقاليد الزواج. مواقع التواصل خلت الواحد يشوف شغلات غيره عملها ولكن هي فوق طاقته وصعب يعملها، وللأسف هاي المظاهر صارت عند بعض الناس شرط أساسي، وكأنه البنت مش رح تفرح بعرسها إلا إذا عملت زي الفيديوهات اللي بتشوفها والا بشهر عسل وبمغني والشغلات اللي بتطلع كل يوم وما انزل الله بها من سلطان.

أما العادات والتقاليد، فبتحمل جزء كبير من المسؤولية؛ بتلاقي كثير أهالي برفضوا يزوجوا بنتهم بمهر أقل من المتعارف عليه، أو يخلوا المهر "غير مقبوض" (يعني يتأجل لحد ما الله يفرجها ع العريس) بحجة "بنتنا مش أقل من بنات الناس". وبهيك، بكونوا سكروا الباب بوجه شب ممكن يكون فيه كل الصفات المنيحة، بس لمجرد أنه وضعه المادي على قد حاله.

تجميع حق المهر لحاله بالضفة بده سنين شقا وتعب، فما بالك بتكاليف العرس كاملة؟ وفكرة انك تعزم على عرسك 500 واحد اكثر من نصهم ناس ما شفتهم غير مرة بحياتك وما إلك علاقة فيهم بس عشان "الناس ما تعتب" كلها افكار بدها مصاري وبترفع سن الزواج.

والمشكلة الأكبر اللي لسا الناس مش مستوعبيتها هي هجرة الشباب من فلسطين عشان يدوروا على عيشة أفضل. وللأسف، معظم اللي بهاجروا بنصدموا بواقع الغربة الصعب، وبدل ما تتسهل أمورهم، بتتعقد زيادة فوق ما هي معقدة. الهجرة صارت واقع بنشوفه كل يوم حتى لو انه بدا بسيط ولكن هو زي كرة الثلج ، وهذا الإشي رح يخلي البلد تفضى من شبابها، وتصفي النسبة الأكبر بنات، وبالتالي رح تتفاقم مشكلة العنوسة وتأخر الزواج أكثر وأكثر، بالزبط زي اللي قاعد بصير هسا بلبنان.

بدي اقلل استعمالي للجوال، بفكر ابدا من بكرا بهاي الشغلات:

ساعة مشي
نص ساعة تمرين
نص ساعة قراءة (اي اشي حتى لو مجلّة)
استماع لبودكاست لمدة ساعة على الأقل (بدون فيديو بس استماع)

عندكم اي فكرة ثانية ممكن اعملها؟

شو بتعملوا لما بتحسوا باكتئاب؟ كيف ممكن الانسان يتجاوز هاي المشاعر السلبية؟؟