u/QXQ01

من كد ما بقيت العب بيها بالأيباد ، هسة احس تلفوني صغيررررر كلش 😂😂😂😂😂

بعدما وگفت امام قبر ابي و امي يرحمهم ربي

وگفت مثل الطفل الي ما يعرف وين يروح رغم كبر عمري 💔

تمنيت لو اكدر اكول لأمي ، ماما حبيبتي مشتاقلج كلش و مكانج خالي بحياتي ، جاي اشوف معارفج بكل مكان و يعرفون على نفسهم الي و يكلولي احنا چنة تحت ادارة والدتك الله يرحمها قبل عشرين سنة وكانت انسانة فعلاً طيبة وراقية و تعبانة على نفسها و ماكو منها بالدنيا ، ماما الناس ما ناسيتج رغم طول السنين و اني كلي فخر بيج لأنج مو ام عادية ، انتي ام عظيمة ، اني افتخر كوني ابنج حرفياً ، مرات الفخر يخفف شعور الوحدة عندي بس مرات من صدك اشتاق لحبج الي و خوفج الي و اهتمامج و شلون تنخبصين اذا ما اكل و اذا اكولج ما اشتهي هذا اشوفج فجأة اتصلتي و جبتي اكل ثاني بس علمود اني اكل وما ابقى بدون اكل ، مشتاقلج هواية حبيبتي بعدج محد يسأل عني محد يعرف اني اكلت لو لا و محد يعرف اني نمت لو لا و محد يعرف اني دايخ بشي وما اعرف اختار ، اني وحدي ماما بس لا تخافين علية اني كدها ان شاء الله ولو مقهور لأن اروح للدكتور وحدي و اني متعود ترحين وياية بس ميخالف و ما انسى شكد دللتيني و شنو جنت اكولة الج تجيبي الي على طبق من ذهب …

و تمنيت اكول لأبوية ، بابا حبيبي عيوني انتة اني لحد عمر 15 سنة جنت انام بحضنك و من كبرت عود صرت انام بعيد عنك كم متر ، عيوني انت تدري شكد مشتاقلك !؟ ، تدري شكد احتاجك بحياتي !؟ ، يا حبيبي انتة ، تعبت علية و ربتيني و كبرتني و دللتني ، اني فخور لأنك ابوية شكد جنت حنين علية و تخاف علية ، تذكر من جنت اني ضايج وبچيت وشفتني و انت اجيت وكعدت بصفي وبچيت وياي ورغم انك ما تعرف اي شي ولا تعرف سبب البجي الي اني باجي بس انت من حنيتك و خوفك كعدت بصفي بدون سؤال وبجيت وياية لان شفت دمعتي نازلة ، حبيبي انت يا اعظم اب بالدنيا يا اطيب انسان ، الله يرحمك حبيبي ، عمرك ما عليت صوتك علية خلصت حياتك تحبني حب جنون و علمتني و درستني و ربيتني بأرقى الطرق و افضل الاماكن ، ما انساك يا حنين يا بابا ، يكفيني فخر اسمك و سمعتك بين الناس من يعرفون اني ابن فلان ، كلها تحير شنو تسويلي و كلها ما تعرف منين تبدي من يذكرون المواقف المشرفة مالتك ، اني فخور لانك ابوية …

بابا وماما انتوا اعظيم شخصين بحياتي ، كلش احبكم
و تدرون شنو الي يقهرني اكثر شي !؟
اشوف تواريخ وفاتكم وبينكم فقط سنة واحدة و اربع اشهر و 24 يوم

اسف اذا طولت بالكلام ولو احس بأحراج شوية
لان دا اكتب هذا الكلام بس اتمنى محد ينتقدني

نص ساعة اكتب و اعدل تالي البوست ينلبس … 💔
احسها طردة بنزاكة

الانسان ما يتذكر لانه جرب الحب الاول لأول مرة حرفياً ، هو يتذكر لأنه كان الاكثر تاثيراً في مرحلة معينة من حياته ، ولو جاء بعده حب اعمق واكثر نضجاً واكثر صدقاً لتحول الحب الاول الى مجرد ذكرى عادية بين عشرات الذكريات

المشكلة ان الناس يخلطون بين اول تجربة و افضل تجربة الاول

ان اول وظيفة الك ليست افضل وظيفة
و اول صديق الك مو افضل صديق
واول تلفون مو اعظم تلفون امتلكته

فـ ليش يصير الحب استثناء

الحب الاول غالبا يحدث في عمر تنقصه الخبرة وتسيطر عليه المثالية وتبالغ فيه المشاعر بسبب حداثة التجربة لذلك يبقى في الذاكرة لانه كان جديداً لا لانه كان (((( اعظم حب في الحياة ))))

لكن من الممكن ان ينطبق المصطلح هذا على علاقة حب فعلاً حقيقة و انتهت بموت احد الطرفين أو انتهت بأسباب قاهرة جداً جداً جداً ، غير ذلك غير صحيح تماماً ، ممكن ان يختلف الاشخاص و تختلف العقول و المشاعر و ان كل انسان له طريقته الخاصة ، لكن الرابط المشترك بينهم جميعاً هو ( كرامة النفس )

لا تنسى ان حبك الأول الحقيقي هو حب والدك و حب والدتك 🌹❤️

بيوم من الأيام جنت طالع بسيارتي و جاي استدار من الاستدارة و سيارة كدامي جان يقودها شخص مسن بالعمر ، عمره تقريباً اكثر من 50 سنة ، شايب ، وكف بالاستدارة بدون سبب و الشارع فارغ حرفياً ، اني نبهتة بأستعمال الهورن ، ضغطة وحدة بس ما تتعدى ثانية و نص صوت الهورن مالتي ، ف ما احس الا فتح الباب و نزل علية يغلط و يفشر و يكلي شبيك ، كلتلة عمو ما سويت شي بس دكيتلك هورن لانك ساد الطريق ، جان يكلي انت ابو مرور حضرتك ، كلتلة لا بس اني نبهتك ما سويت شي !؟ ، هسة انت ليش تغلط و تفشر جان يتفل بوجهي ولله ، كلتلة لو ما شيبتك و عمرك الي بكد ابوي ، و اني اهلي مربيني احسن تربية جان عرفت شنو اتصرف وياك ، جان يضرب سيارتي و اني كبل عفتة و طلعت من غير طريق ، مو خوف ولا جبن اكدر امسح بي الكاع مسح ، بس شايب شنو اريد اسويلة فوك ما تربيتي ما تسمحلي اسوي شي ، حتى القانون و تلحكها العشائر ، اذا اسوي شي بي راح اطلع اني الغلطان …

ف سالفتي اذا هذا الشايب هيج تربيتة ، شنو تربية اولادة أو احفادة !؟
و هواي نشوف ناس فعلاً ما عندهم اخلاق ولا تربية ، مو بس مثل هذا الشايب ، حتى الشباب الي بيهم ، يبتز البنات ، اليضحك عليهم بحجة الزواج ، الي يشرب الخمور ، الي يتعارك بالشارع و يخلي الناس تلتم عليه … وواقع مجتمعنا العراقي كدامكم ، وطبعاً ما ننسى جرائم القتل الي ينفذوها اشخاص ما تتجاوز اعمارهم 25 سنة

اعتقد مشكلة العراق مشكلة اخلاقية بحتة ، لأن السارق و الزاني و المجرم و كل كلمات الانحطاط الاخلاقي و الفكري ، هو بسبب التربية …

روحوا اكتبوا على اخر بوست نشرتة ولله مفيد للجميع و بكيفكم بعد اذا محد راح للبوست راح احذف ريديت

اكتب نصيحة تعلمتها من الحياة و اكتب الخطأ الي متندم لأن سويتة بحياتك وما تريد غيرك يوكع بي ، حتى يستفاد الصغير و الكبير و يكون البوست مفيد لنتعلم بتبادل اخطاء بعضنا و ناخذ نصائح بعض حتى نستفاد بالمستقبل و يستفادون منها الشباب و البنات

- اني النصيحة الي اكولها الكم
ً
🟥( محد راح يفيدك غير نفسك )🟥

( اهلك هم سندك بالحياة من بعدهم انت ضعيف )

( خليك هادئ بقرارات الحياة لأن بمرحلة معينة من العمر راح تصبح قراراتك نهائية و كل قرار مابي رجعة او تعديل )

( لا تبذر بدافع الانتقام من الايام السابقة السلبية )

( اختار بعناية فائقة ، لأن سوء الاختيار ما يرحم )

🟥🟥 ( اختار رفيقك بعناية و اختار الي عينة شبعانة ومليانة و ابن خير ، لا تختار الجوعان ابد لأن الجائع اذا شبع راح يخرب عليك عكس الشبعان اذا جاع … ) 🟥🟥

( خليك مع الناس الراقين و المحترمين و الي الهم سمعة طيبة هم و عوائلهم و يكونون اصحاب تربية ممتازة )

- الخطأ الي متندم و اتمنى محد يوكع بي

( لا تثق بكل البشر مهما بدو اهل للثقة ، خليك حذر )

( بذرت فلوس خيالية وما عرفت اتصرف بوقتها لأن كان عقلي مو كامل و ماخذني طيش المراهقة )

( ما فكرت للبعيد ) هاي كلش مهمة 🟥

( اختاريت قرار شي خطأ ، ولحد الان ادفع ثمنه نفسياً )

( انطيت مشاعري للبشر الغلط )

( لا تأجل شي اذا كنت بلحظة رفاهية ، دائماً تقدم للامام )

( لا تخلي شي يعبر ولا تستحي من شي اذا كان مردود هالشي عليك سلبي )

( لا تستحي ابداً ، اذا تبقى مستحي راح ينوكل حقك كدامك )

(((( ❤️🌹خلوا اب فوت حتى ينتبهون للبوست كل الناس 🌹❤️ )

انصح بالتعامل بالداون فوت مع هالنماذج …

View Poll