u/Raghad_Gap_3337

طلبت من بنات في الكلية أدخل معاهم في التيم لما نتكلف بمشروع صغير يعني أنا عرضت نفسي عليهم وده شيء استحالة اعمله بس بخاف أبقى تقيلة على حد بتجنني الفكرة دي فا في دكتور بقى قالت اعملوا برزينتيشن ويكون في كل تيم 4 وهما 3 بنات وأنا دخلت عليهم الرابعة فا لما شوفت رسالة الدكتور دخلت لواحدة فيهم وقولتلها فلانة أنا معاكم في بريزنتيشن دكتور فلانة ولا عندكم خطط تانية؟ ردت عليا هي قالت عايزة 4 فا الي كان حاضر فلانة وفلانة وفلانة وهي بيهم وقتها ملحوظة أنا كنت حاضرة ساعتها بس مكنتش قاعدة جنب منهم وبتقولي بحسبك مع حد تاني وقعدت بقى تتاسف بقى وأنا حاولت مبينش اني زعلانة وأنا أصلا منهارة من العياط صعبانة عليا نفسي علشان دي مش أول مره يحصلي كده وحرفياً كل ما أدخل تيم ببقى مهمشة فيه ومحدش مهتم روحت مع مين جامعتنا بعيدة اوي فا بننزلوا على دفعات صحيت للمحاضرة قاعدة لوحدي في القاعة لا محدش مهتم مش عايزة ارغي كتير علشان كتير بيزهق من رغيي بس بجد نفسيتي تعبت من حوار المجاميع والصحاب وأنا من عبطي أول ما دخلت معاهم جديد كنت فرحانة وكنت عاوزه اجبلهم ليمون من شجرة بيتنا بتنزل ليمون كتير بما إن عندنا اللمون غالي بس كنت مأجلاها لغاية ما نبدأ المشروع فا افتكرت ده وشوفت نفسي عبيطة أوي وغبية اسفة لو طولت على حاجة تافهه زي كده بس كنت محتاجة اتكلم.

قبل كده حكيت حكايتي مع التنمر والوحدة بس في مجتمع تاني أنا حابة بقى احكي عن حوادث غريبة و وحوادث مضحكة حصلت في حياتي من باب مشاركة مواقف وحوادث معرفتش اشاركها مع حد يلا نبدأ

أولا يوم ولادتي انا كواحدة شخصيتها غريبة مينفعش تبقى ولادتي طبيعية 😁 اتولدت والحبل السري ملفوف حوالين رقبتي ووشي كله بنفسجي وشعري واصل لدقني ( ايوه متولدتش قرعة زي باقي الأطفال 😌) مفيش تنفس خالص مولودة ميته من الآخر وبما إني اتولدت في عيادة مش في المستشفى فا مكانش في غرفة إنعاش خالتي الله يهديها اصرت إني لازم أعيش وخدتني وطلعت تجري بيا في الشارع علشان توصل للمستشفى ما كنتي سيبيني يا خالتي كنت هبقى من طيور الجنة الجميلة دي وي عشت الحمد لله جملة غبية صح ؟! الي هو طبيعي عشتي اومال مين الي بيكتب ده 😁 قعدت أسبوع في محجوزة في الحضانة أهلي كل شوية يزوروني اخويا كان بيقول بابا ده النونو بتاعنا أكبر نونو في الحضانة 🥲 كبرت بقى هادية انطوائية في حالي لشدة إن أمي بتناديني اتغدا وأنا أصلا على السفرة 🙂 مره ابويا خدنا البحر فا أهلي لسه بينزلوا من العربية وينزلوا حاجتهم روحت أنا زي الطلقة طلعت أجري على البحر وقومت غارزة راسي جوا البحر راسي بس من غير جسمي أي السبب؟ معرفش ابويا طلع يجري ورايا ورفعني من هدومي ومصدوم وكان هيروحنا بجد بس أهلي اتحايلوا عليه (طبعا أنا بقول مواقف عشوائية) وأنا وصغيرة في بيت جدتي لقيت كوباية مركونة على جنب روحت أنا زي البقرة دلقتها جوا بطني Guess what أي الي جواها طلع كلور وعينك ما تشوف إلا النور بموت حرفياً وأمي شغالي تشربني بيض ني ولبن بيض ولبن لغاية ما خرجت الي في بطني معرفش الصراحة كانت فايدتهم أي مره كنت بلعب في البلكونة وشوفت مسمار مرمي على الأرض فا حبيت اطلع روح العالم الي جوايا وروحت واخده المسمار ده وجبت كرسي وزقيته لغاية كوبس الكهرباء واتشعلقت عليه وحطيت المسمار جوا الكوبس وعينك ما تشوف إلا النور شعور الكهرباء ده لغاية دلوقتي حساه في جسمي شعور مقزز كده شديت أيدي بسرعة أنا بقى من الصدمة نزلت من الكرسي وزقيته وحطيته مكان ما لقيته بظبط المسمار كذلك زي ما كان مرمي في زواية البلكونة حطيته ودخلت بهدوء البيت ولا عيطت ولا أي حاجة وكده نقدر نقول إن المسمار موصل جيد للكهرباء عن تجربه 😉 أنا ليا تاريخ طويل مع الكهرباء الصراحة مرة ابويا بيصلح في مشترك وبعدين لقاه بايظ مفيش منه فايدة راح رماه وقال محدش يلمسه أنا اسكت؟!!! لا طبعا روحت خدت المشترك وعندك فضول أعرف بنفسي إذا كان شغال ولا مش عارفة هستفاد أي يعني معرفش فا اخدته وحطيته في الكوبس وطبعاً كلعادة اتكهربت حد هيسألني أنتي إزاي لغاية دلوقتي عايشة هقولك معرفش كل حاجة عوزاني اموت وأنا رزلة ماسكة في الحياة 😂 وطبعاً خدته وحطيته في الزبالة زي ما كان بعد ما تأكدت أنه مش شغال زي ما بابا قال عن تجربة 😉 وبعديها بقى مره لقيت فيشة بسلك مقطوع مرمية في المخزن أنا كنت عايشة في المخزن حرفياً بلعب في حاجة أبويا 😂 فا مسكتها بقى وطلعت روح العالم الي جوايا كلعادة وقولت لنفسي هيحصل أي لو حطينا السلك المقطوع ده في الكوبس هيوصل كهرباء لغاية فين بما أنه مقطوع

الحلو إني متكهربتش المرادي الوحش إني عملت قفلة في البيت كله والسلك فرقع في وشي 😂 في مره بقى سلك التلفزيون فيشته اتقطعت وابويا مكنش لسه ركب فيشة جديدة وأنا كنت عاوزه اتفرج على التلفزيون فا حاولت احط سلك التلفزيون من غير فيشة فا السلك فرقع في وشي ووشي كله بقى أسود 😂😂😂 وطبعاً اتكهربت كتير بقى على مدار حياتي فا علشان كده بقول عندي تاريخ مع الكهرباء عندي بقى تاريخ مع الكلاب بس حاسة إن البوست طول خالص أنا عندي لسه قصص كتير مرعبة ومضحكة 😂قولولي لو عاوزني اكملها ولا لا وشكرا لقرائتكم لرغيي 😅