u/Siimmbaa

Ich bi jetzt grad über dä Post gstosse..

Wiit obe in de Kommentär findi Ussage wie:

>I'm pretty fatalist since years now. My paper straw won't save the planet. I just want an AC and enjoy the decline.

oder:

>there is a breaking point: when people have no hope, they start crime. So in 2035

oder:

>I mean the fight on climate change is lost. We're not trying to stop climate change anymore. We're preparing for survival after civilization collapses.

..Und ha mi wiedemol drmit konfrontiert gseh, wie negativ und zynisch grossi Teil vo Reddit sind. Leider au das Subreddit do.

Dä Post isch als Ahregig und e Gegedarstellig denkt.

Dr Begriff "Cynical Genius Illusion" beschribt s Phänomen, dass Lüüt wo pessimistischer und zynischer sind, oftmols als intelligenter wohrgnoh werde. Imene bekannte Paper wo 200'000 Mensche us 30 Länder untersuecht hed, sind zynischi Mensche zwar intelligenter wohrgnoh worde, aber nid intelligenter gsi. Im Gegeteil.

Will aber d Wohrnähmig so isch, isches in vielne Kreise ahgseh, wenn me zynisch oder pessimistisch isch. Uf Reddit dunkt mich das Phänomen bsunders stark usprägt.

Falls di bis jetzt scho biz gstört hesch and demm Post, oder denksch, "was chunnt dä jetzt mit "weniger Pessimismus" wenn alles scheisse isch, denn bisch villicht au drvo betroffe.. duet mir leid, als Ahregig nid als Kritik Hakan.

Zuesätzlich werde in de Medie negativi Sache stärker gwichtet. Macht Teilwis au Sinn. "Hüt isch kei Chind an de Pocke gstorbe" isch weniger wichtig für unser Läbe wie "Hüt hed dr Trump wider irgendöppis dumms gmacht" (obwohl beides recht unwichtig isch für unsere Alltag)

Bim Klimawandel find ichs bsunders Krass wie fatalistisch gwüssi sind.

Drbi gids mega viel unerwartet gueti Entwicklige. Zum Bispil bezüglich Solar:

2022 hed dr IPCC AR6 Bricht festgstellt: (Sitte 35 Zile 12-13):

>"Prices in 2020 were below where even the most optimistic experts expected they would be in 2030"

Sither sind Koste nomol massiv gsunke.

Au bezüglich em Usbau vo Solar hed me alli Erwartige übertroffe. Sälbst no 2018 hed me für 2023 (im optimistische Fall) mit 140 GW Solarusbau grächnet. In Realität sinds 440 GW gsi. 2025 scho 698 GW.

Elektroautos hed me au massiv unterschätzt

Sälbst 2020 hed OECD no im optimistischte Szenario gseit: "245 million vehicles in 2030" (Sitte 20 Zile 1)

Hüt schätzt scho s Durchschnittszenario 250 Millione.

Chömmer zu Batteriepriise.

Die sind nid nume bezüglich Elektroautos wichtig, sondern au bezüglich Stromnetz und für Hushält wo Solar in dr Nacht wennd verwende, essenziell.

Au do händ sich d Experte enorm verschätzt.

Nature

>they do point to price reductions, reaching around $100/kWh in 2050, in line with the predictions of the IEA. However, actual market developments show that pack prices already decreased to that level in 2024

Zuedem hend d Batterie mittlerwiile ei VIEL höcheri Lebensduur, Energiedichti, Ladegschwindigkeit und Sicherheit als no vor 5 oder 10 Johr. All das bi weniger energieintensiver Produktion und mit weniger problematische Materialie.

Zu allne dene Pünkt:

nomol Nature:

>Currently most papers either fail to account for learning (e.g. Larson et al.) or use expert forecasts that are often conservative, heterogeneous, and underestimate technological learning.

Will heisse, dass die wo d Prognose in dene Gebiet mache, sälbst wenn sie zu pessimistisch sind, s negstmol nid weniger pessimistisch schätze.

Au die extremste Szenarie für d Klimaerwärmig wärde mittlerwiile nach unde korrigiert: ( Abschnitt 2.2.2 )

>the CMIP6 high emission levels (quantified by SSP5-8.5) have become implausible, based on trends in the costs of renewables, the emergence of climate policy and recent emission trends 

Das alles söll nid heisse, dass me sich cha zrugglähne und chille, sondern, dass sich dr Ufand lohnt. Ingenieure und Wüsseschaftlerinne gäbe täglich viel Härzbluet drfür, dass mir technischi Fortschritt mache, vieli "Normalos" sind au im Alltag bemüeht. Jä, unser Papierröhrli bringt nüüt gege dr Ukrainekrieg, aber uf globaler Ebeni händ mir scho viel erreicht und d Ussichte sind nid so düster wie das Einigi denke (oder wennd denke zum gschiid töne?)

Und für alli wo jetzt scho hässig sind weg so viel Positivem:

Witteri positivi entwicklige us de letschte Johr:

• Sit 1990 isch dr Ahteil vo Mensche in extremer Armuet öppe 75% chlinner worde.
• Anstatt 9.3% wie im 2000 stärbe "nume" no 3.7% vo de Chinder unter fünfi.
• D Lüüt läbe im schnitt 7 Johr länger als im Johr 2000 und das bi glicher Gsundheit in de letschte Johr.
• Pocke (300 Millione Toti im 20. Johrhundert) usgrottet.
• Chinderlähmig 99% weniger als 1980
• HIV isch vonere fast sicher tödliche Krankheit zunere meist behandelbare worde.
• Dr Ahteil vo Kinder wo Kinderarbeit müend mache hed sich fast halbiert sitem Johr 2000
• S Ozonloch erholt sich, will d Wält kollektiv beschlosse hed kei FCKW meh z benütze.
• Toti durch Naturkatastrophe sind, vergliche mit em 20. Johrhundert um mindestens 85% gsunke, bi viel höcherer Weltbevölkerig.
• D Rächt für Queeri händ sich in vielne Länder enorm verbesseret.
• sit 1955 isch dr Ahteil vo Analphabet:inne um 70% gsunke.
• Gwässer in Industrieländer sind viel suuberer als Früener
• Blei im Benzin und Blaui Rauchwolke us Uspüff sind kei Thema me. (Usser bi Töfflibuebe)
• Anstatt in 17 Staate wie 1977 isch mittlerwiile in über 110 Staate d Todesstroof vollständig abgschafft.
• Trotz Ukraine, Gaza, Sudan usw. gids viel weniger Kriegstoti wie im 20. Johrhundert. (sälbst wenn me die beide Weltchrieg userächnet)

(Quelle sind eifacher ufzfinde für die Sache, ha nümm möge alles verlinke wie witter obe)

Mir isch klar, dass einigi jetzt Schnappatmig hend und grad ind Taste wennd haue, was alles "NEGATIV!!!" isch, will sie so viel Positivs nid eifach chönne stoh loh. Mir isch bewusst, dases viel negativi Sache gid (z.B. 3.7% Kinderstärblichkeit isch immerno viel). Zuedem gids au vieli Sache wo sich verschlächteret hend, wie z.B. Fettleibigkeit, Trumpismus oder Polarisierig in westliche Gsellschafte.

Dä Post hed nid dr Ahspruch die Sache gegenand ufzwiege, sondern ufzzeige, dass me s Positive, dr Natur vo dr Sach gschuldet, weniger wohrnimmt und dass Zynismus, Pessimismus und Nihilismus, au wenn sei verlockend sind, sälte Ahbrocht oder hilfriich sind.

Nei dr Gedankestrich vom Titel isch nid Chat-GPT

Ich lies im Moment uf schwizer Subs die ganz zit politischi Posts zu dere Abstimmig, fast immer nume us einere Richtig. Fast immer mit Todschlagargument und eigentlich nie Usgwooge.

z.B. d Ussag vo z wenig Pflegekräft für d Boomer Generation.. D Bevölkerigspyramide isch jetzt scho relativ grad. (nochhaltig) Grad au im Gegesatz zu unsere Nochberländer. Es hed e chli wenig unter 25 jährigi, aber langfristig chas nid s Ziel si, eifach alles immer durch Migration ufzfülle. Wenn d Lösig uf die gringi Geburterate eifach "Migration" isch, denn fehlt am Staat dr Druck öppis für Familie z verbessere. So chömme eifach nume neui Lüüt noche und merke "Hey s isch nid so geil Kinder z ha" und hend denn kei Chinder und s bruucht wieder neui Lüüt wo me wieder muess integriere etc.

Au das mit de Bilaterale isch nid ganz klar. D EU wird kei Freud ha, aber simmer ehrlich, in dr EU wännd die meiste Staate au ihri Migration überdenke. Mittelfristig werde die au ihri Gsetz ahpasse. Dorum chas sehr guet si, dass mir miteme Blaue Aug drvo chömme, im beste Fall nähme sie sich an uns e Bispiel, will sie merke, dass ihri Bevölkerig GENAU DAS au will.

In dr Schwiiz läbe momentan über 9 Millione Mensche. D Initiative will das bi 10 Millione stoppe. Scho mit 9 Millione händ mir uf unserer Siedebare Flächi, wo wäge Bärge und Seeä usw. nid drzue zelle und nume rund 1/3 vom Land isch, e Bevölkergisdichti vo 660 Lüüt pro m^(2).

https://www.swissinfo.ch/ger/gesellschaft/schweiz-mittelland-agglomeration-/45870692?nab=0

Frankriich hätt bi dr gliche Bevölkerigsdichti uf dr Siedelbare Flächi, konservativ gschätzt, 260 Millione anstatt 69 Millione Ihwohner.

Au bezüglich Abstimmigsgelder.. D "Nei" Sitte hed dütlich meh Geld, obwohl d Umfroge öppe 50/50 sind. Die mit VIEL gäld sind drgege, aber das sind zuefällig au die wo nume die positive Uswirkige vo dr Zuewanderig gspüüre. Z.B. Economiesuisse zahlt 5 Millione für d Kampagne GEGE d Initiative. Die sind jetzt nid grad bekannt drfür d Ahliege vo uns Pöbel z unterstütze. I gseh das eher als Zahlig, will sie somit witterhiin billigi Arbeitschräft chönne ins Land hole anstatt tüüri Schwiizer z beschäftige oder umzschuele. In vielne Firmene hesch, sälbst mit eme Uniabschluss e scheiss Lohn, wills eifach e Usländer mit Handkuss für weniger macht. Damit denn d Aktionäre ihri Dividende chöne bhalte.

Grad die wo uf dr Kippi sind, löhnd euch nid Angst mache vor irgendwelche Schwarzwissussage. Numme will uf Reddit die meiste drgege sind heissts nid dass dene ihri Ahsicht stimmt.

Göhnd go abstimme.

EDIT: 25% vo de Lüüt wähle ufe.. 75% wähle abe.. isch villicht für einigi no interessant z gseh wie uf Reddit öppe so d Verhältnis sind.