u/_whonain

Sadak par niklein to manzil ka pata nahi,

Jaan chali jaaye kisi ki, kisi ko parwah nahi.

Mere zehen mein aaj ek sawaal utha hai,

Apne dil se poochho, kya hum azaad hain?

Paani ke liye taraste hain, garmi mein tadapte hain,

Gas kabhi aati nahi, cylinder ke paise bharte hain.

Jin bunyaadon pe tha ghar, woh bhi barbaad hain,

Apne dil se poochho, kya hum azaad hain?

Aurat ghar se nikle to khauf uska saath chale,

Apni izzat aur apni hurmat ko kaise woh sambhale?

Insaf karne wale hi jab khud sawaalon ke daagh hain,

Mehfooz nahi koi, to phir keh do, kya hum azaad hain?

Na parhai hai, na sehat, aur ye baat jhoot nahi,

Is mulk mein to masoom bachiyan bhi mehfooz nahi.

Jurm badhte ja rahe hain, mujrim hi abaad hain,

Apne dil se poochho, kya hum azaad hain?

Koi naujawan apni jaan ki baazi haar jaata hai,

Koi chor raah chalte hi goli maar jaata hai.

Jab qanoon hi jurm ke saamne laachaar khada ho,

Apne dil se poochho, kya hum azaad hain?

Insaf ki umeed ab nazar nahi aati,

Har guzarti tareekh wahi kahani dohrati.

Ghareeb ke liye saza, ameer ke liye riwayat hai,

Apne dil se poochho, kya hum azaad hain?

Phir bhi is mitti se bepanah pyaar hai,

Badlega ek din ye mulk, bas dil ko intezaar hai.

Watan ke liye qurbaan ye jaan bhi tayyar hai,

Aaj phir dil se poocha... shayad hum waqayi azaad hain.