რელიგიის მიმართ ქართველების ბრმად ნდობა
საქართველოში მოსახლეობის დაახლოებით 82-85 პროცენტი მართლმადიდებელი ქრისტიანია. საქართველოს მოსახლეობის 38-42 პროცენტი კი 50 წელს გადაცილებულია. ჩემი აზრით, არასწორი არ იქნება თუ ვიტყვით, რომ 50 წელს გადაცილებული ადამიანები შედარებით ნაკლებად პროგრესულად ფიქრობენ, რადგან მათ განათლება მიღებული აქვთ საბჭოთა კავშირში, ქვეყანაში სადაც აკრძალული იყო ბიბლიის, ყურანის ან სხვა წმინდა ტექსტების სწავლება და სადაც განათლების სისტემა მიმართული იყო სახელმწიფო ათეიზმისკენ.
ეს ყველაფერი გარკვეულწილად წინააღმდეგობაში მოდიოდა ქართულ კულტურასა და იდენტობასთან, რადგან როგორც ვიცით ქართველები განსაკუთრებით ვამაყობთ ჩვენი ქრისტიანობით. ამ შეზღუდვებმა მიგვიყვანა იმ მდგომარეობამდე, რომ ქრისტიანობის ღიად დეკლარირება და მისი სახელმწიფო რელიგიად გამოცხადება შეუძლებელი იყო.
საბჭოთა კავშირის დაშლის შემდეგ და საქართველოში რელიგიური თავისუფლების დამკვიდრებისთანავე ხალხმა დაიწყო პატრიარქისა და ეკლესიის თითქმის ბრმა მხარდაჭერა. ჩემი აზრით სწორედ ამ ბრმა მხარდაჭერის შენარჩუნება ზიანს აყენებს დღევანდელ საქართველოს მდგომარეობას. მოსახლეობის დიდი ნაწილი არ სვამს კითხვებს იმაზე ვინ არიან დღეს ცნობილი სასულიერო პირები, რატომ და როგორ აქვთ მათ ამხელა გავლენა, ძალაუფლება და ქონება.
50-60 წელზე გადაცილებული ადამიანები კი ხშირად თავს არიდებენ ამ კითხვების დასმას და თავს აჯერებენ რომ ისინი ქრისტიანები არიან და ცუდს არაფერს ჩაიდენენ, რომ ისინი არ შეიძლება იყვნენ კორუმპირებულები რადგან ქართველი ქრისტიანი ვაჟკაცი და სამართლიანი უნდა იყოს. მათ სჯერათ რომ ეკლესიას არ აქვს რეალური გავლენა პოლიტიკაზე რადგან საქართველო სეკულარული ქვეყანაა.
ზუსტად ეს კრიტიკული აზროვნება აკლია ქვეყანას. უნდა გავაკრიტიკოთ ის რისი გაკრიტიკებაც რთულია, რადგან სწორედ იქ არის ყველაზე მეტი პრობლემა, არეულობა და ძალაუფლების ბოროტად გამოყენება.
თუ მე ვცდები და არ მენდობით მაშინ დაუჯერეთ საქართველოს ერთ-ერთ უდიდეს მეფეს დავით აღმაშენებელს, რომელიც გამეფდა 1089 წელს და ეკლესიის რეფორმა და კონტროლი დაიწყო 1103 წელს. მან მკაცრად გააკონტროლა მაღალი სასულიერო პირები, რამდენიმე ეპისკოპოსი თანამდებობიდან გადააყენა და ნაწილი დასაჯა ან გადაასახლა მათი კორუფციის გამო.
