ثقافة لوم الضحية وانتشار كلمة 'مازوخية'
فيه موضوع فاقع قلبي من زمان وابغى اتكلم فيه
في مساحات النسوية بتويتر، كلمة مازوخية كانت تستخدم للنساء الذكوريات اللي يحرضون ضد جنسهم وضد حتى انفسهم بوعي كامل لانهم يرضون العبودية (مع تحفظي عن استخدام هذي الكلمة حتى في هذي الحالة) ومع الوقت تحور استخدام الكلمة وصاروا الناس (غالبًا ملحدين، نسويات، متشدقين الحرية والتنوير) ينادون كل مرأة مضطهدة ما تمردت مازوخية…
المثال اللي شفته قبل شوي بصب ملحدين، سكرين شوت لبوست وحدة سعودية موظفة تبغى حلول، تقول الحياة مع اهلها صارت لا تطاق وصارت تفكر بالزواج كمخرج. قالت لها وحدة اطلعي من عندهم واستقلي، ردت البنت انه كيف كذا احنا بمجتمع محافظ وما عندنا مهرب الا الزواج او الموت
كل الردود عليها بصب الملحدين كانت انها مازوخية او تحب اهلها وان 'البس يحب خناقه' ومافيه فايدة تنصحونها
صوروا البنت انها وحدة راضية على وضعها ومتحملة عشانها قالت ما تقدر تستقل
عايشين بفقاعة واصحاب امتيازات متناسين ان حتى الموظفات كثير منهم معتقلات منازل وقبايل البنت ما تطلع من عندهم الا متزوجة او ميتة. ولو حاولت تستقل وتتمرد ما فيه جهة تحميها وتضمن سلامتها ومع ذلك ينظّرون على هالنساء وينادونهم بالمازوخيات الراضيات عن وضعهم
يحزنني كيف اختفى التعاطف مع المضطهدات وكيف انتشر خطاب تمردي وخاطري بحياتك ولا انتي مازوخية وكيف المجتمعات والمساحات اللي مفروض تكون ملجأ يتفهم اضطهاد النساء بمجتمعنا صارت مجرد وجه اخر من نفس منظومة شيطنة النساء بس بلفة لبرالية. لو اشكتيتي نفس الموضوع عند محافظين بينادونك فاجرة وعاهرة لأنك تبين تطلعين ولو شكيتي عند ملحدين بينادونك مازوخية وعبدة اهل لانك رفضتي تطلعين
بالحالتين انتي الغلطانة
يمكن انا متحيزة واعتذر لو كانت نظرتي قاصرة ولكن اعرف نساء عايشين مع اهلهم وصلوا الثلاثين الاربعين موظفات ورفضوا الزواج وما زالت كل حركة لهم مراقبة مع انهم مو راضين واعرف انه مو بيدهم ولا يقدرون يسوون شي بدون ما يخاطرون بسلامتهم وارفض الومهم مهما كان لأني شهدت وعشت معاهم العواقب اللي صارت على ادنى محاولة تمرد
فضفضة سريعة من وحدة بينادونها ذاك المجتمع مازوخية، اعتذر لو كلامي مو مفهوم او ملخبط لاني كتبته في حالة حنق لول