بكتب هاض الموضوع بعد ما وصلنا أنا وعائلتي إلى مرحلة بطلنا نعرف فيها ايش نعمل
السلام عليكم جميعًا
بكتب هاض الموضوع بعد ما وصلنا أنا وعائلتي إلى مرحلة بطلنا نعرف فيها ايش نعمل وبتمنى من كل يلي رح يقرأه أنو يقرأه كامل قبل ما يحكم لأنو الموضوع بالنسبة النا مش مجرد خلاف عائلي بسيط وإنما قضية أثرت على بيت كامل واستنزفتنا نفسياً وعائلياً خلال الأشهر الماضية...
قبل ما أحكي بحب أنو أوضح أنو والدي متوفى من ثلاث سنوات وأخوي يلي رح أتكلم عنه هو أخوي الأكبر...
عائلتنا بتتكون مني ومن اخوي و3 بنات فبعد وفاة والدي صارت مسؤولياتنا أكبر وأكثر حساسية فأي قرار مصيري رح ينعكس على الأسرة كلها...
أخوي قرر الزواج من وحدة أكبر منه بحوالي 10 سنين هي مطلقة وعندها بنت عمرها 14 سنة ووالد البنت لسا موجود بحياتها فالتواصل مستمر بينهم...
من أول يوم رفضنا ما كان بسبب إنها مطلقة أو بسبب فرق العمر لحاله لكن شفنا عدة أمور اجتمعت مع بعضها فرق عمر وتجربة زواج سابقة ووجود بنت مراهقة واستمرار ارتباط طليق بحياتها بوجود البنت واسباب طلاق لا توضع على الرف...
بالنسبة إلنا هالأمور بتخلّي القرار أكبر بكثير من مجرد قصة حب أو تعلق احنا عائلة مترابطة جداً ومن زمان متعودين أي قرار مصيري نتشاور فيه فما تعاملنا مع الموضوع بعصبية أو رفض مباشر من البداية بلعكس جلسنا معه كثير حاورنا أكثر من مرة... مرة جدي،أعمامي، أخوالي، وأشخاص إلهم مكانة واحترام تدخلوا وحاولوا يقنعوه بهدوء بس النتيجة واحدة ما تغيّر حتى إنو هو جاب شخص إلو مكانة ليكون وسيط بينه وبين العائلة وانتهى الكلام بلا نتيجة أنا شخصيًا كتبت الو رسالة طويلة أوضحت فيها كل مخاوفي عليه طلبت منه بس يتأنى ويفكر مرة ثانية قرأها وما رد أبدًا وبعدين حذفها كأنها ما كانت وبعد ذلك حاول يدخل جدي ويضغط عليه اكثر من مرة وكل مرة ينرفض بالأخير راح مع أشخاص من خارج العائلة وقرأ الفاتحة رغم الرفض الكامل من كل أفراد الأسرة ومع الوقت صار يستخدم أساليب ضغط على العائلة حتى توافق حتى إنه يتحدث مع الطرف الآخر ويقول إنه رح يضغط على أمي لأنه بيعرف إنها عاطفية وبيحاول يستخدم هالجانب عشان يغير موقفها فصارت الأمور كإنه فرض أمر واقع أكثر من حوار اليوم حاسس إنا استنفذنا كل وسائل الإقناع الممكنة ما قصرنا بالحوار ولا الاحتواء وبالسياسة وحتى رحنا في لأكثر من شخص روحاني بيعالج بالقرآن لكن ع الفاضي ولا بأي طريقة ممكنة قدرنا نغير رأيو.
الموضوع مستمر من شهور مش قرار أخذه بيومين أكثر شي بيقلقني إنو هالقرار هاض حسب رؤيتي ما رح يأثر عليه لحاله ممكن ينعكس على مستقبل اخواتي وخواتي لسا في بداية حياتهم. وانا خايف تتحمل العائلة كلها تبعات قرار شخص واحد أخوي اليوم مستعد يخسر علاقته مع والدته وجده وأعمامه وأخواله وإخوته مقابل هذا القرار وهذا أكثر شي قاهرني وبرجع بنوه والله إحنا جرّبنا كل شي بالحوار واللين والناس اللي بيحترمهم، بس بدون نتيجة. هو مصرّ بشكل غريب لدرجة إنو ما بيسمع لحدا.
سؤالي إلكم هل في أي أسلوب واقعي ممكن نعمله؟ ولا لازم نتقبل إنو هاض قرار رايح يصير سواء رضيّنا أو لا؟ بدي رأيكم بدون تجريح بدّي بس أفهم شو ممكن نعمل؟؟؟