حاسة أني اتلوثت
من قبل تالتة ثانوي وانا عمري ما فرق معايا اصلا شغل الناس يعني أنا ببص للناس علي أنهم اه ده مدرس ده مهندس ده دكتور تمام فلة. يعني عمري في حياتي ما فكرت بشكل الألقاب أو المكانة الاجتماعية.
كنت طول عمري بشوف الناس سواسية من منظوري وبحترمهم كلهم وشايفة أنه كلهم ليهم معنى ومكانة مش بس عند المجتمع عند ربنا برضوا وكل واحد له حكياته الخاصة والنعم واللحظات الصغيرة الي بتخلي حياته مميزة.
بعد النتيجة اتفجأت بنظرة الناس . تعظيم الي جايب مجموع عالي في دائرتي. وتحقير الي جايب قليل. وكمان. بدأ بقي شغل اه دي هتدخل طب دي صيدلة ده هندسة ده طب اوه بصوا ما شاء الله. وبعدين في الجانب الثاني اوه...ده جاب 60 في المئة اوه قدر الله وما شاء فعل ...
الموضوع بعدها زاد لأن كل الكلام كان عن النتائج وعن الكليات .
كل حاجة بقت عبارة عن تقيم لزمايلي وتقيم للناس حسب مجموعهم والكليات الي دخلوها.
الأمر بدأ يلوثني .
انا حاسة اني بقيت ملوثة .
مش عارفة ارجع افكر طبيعي كل الي حوليا عمي واخوالي واهلي وزمايلي والسوشيال ميديا والمجتمع مركز علي المواضيع دي وحجات زي الطب بدأت تلمع في عيني ...مش عشان انا عايزاه في الحقيقة أنا عايزة اكون مدرسة انجليزي. بس انا داخلة صيدلة . الموضوع غريب. حاسة اني اتلوثت . الموضوع محزن . انا كنت بقول هدخل ألسن. لكن مع ضغط الأهل والمجتمع ورغبة الأهل في حصولي علي مكانة اجتماعية وعدم معاناتي المعاناة والانتقاص الي هما عانوه بس عشان هما مش دكاترة ومهندسين. الموضوع غريب انا حتي مائلة للطب البيطري اكتر بس حتي ده لا عشان المجتمع هيعاملني معاملة وحشة أو هيبقي في احتقار ولو بنسبة.
الموضوع متعب جدا انا عارفة اني لسه اقدر احقق حلمي من صيدلة انا شاطرة في اللغة ممكن ادرس في كتير دكاترة ومهندسين بيشتغلوا مدرسين حاليا. بس ليه ؟ ليه اعمل كل ده عشان ايه؟ عشان ايه بجد.
انا اتلوثت وحاسة بحزن وغيرة من أي حد داخل طب مع أن اصلا هي مكانتش حلمي اوي يعني حلم الناس انا لو مني السن أو طب بيطري عشان بحب الحيوانات. انا بس غيرانة عشان الناس دي هتحظى بمكانة عالية في المجتمع المقرف ده. الي اصلا قارفني!
انا مش فاهمة بجد انا اصلا صيدلة حلم بابا ليا من عشر سنين نفسه بنته تدخل صيدلة انا داخلة عشان أسعده عموماً وعشان طبعا ميزة لقب "دكتورة"
بس هل ده كان اصلا حلمي؟
انا بعمل ايه هنا وليه
ليه المجتمع مهتم اوي كده بأنا هدخل ايه وهعمل ايه ويعاملني بناءا علي كده او يمكن انا الي مكبرة الموضوع لان انا قبل العكة دي وقرف ثانوية عامة كنت بشوف كل الناس سواسية ومش بتهمني وظيفتهم اساسا المهم محترمين ولطيفين . وده كان الي بيخليني احترمهم. بس كده . يمكن ده كله من مخي ومش الحقيقة. يمكن الضغط ده كله من مخنا ومش الحقيقة. وأنه احنا كلنا مكبرين الموضوع.