الحقيقه الصادمه الي محد يكولها الكم عن التكميم( قص المعده)
سويت التكميم طبعا قبل شهرين وهاي تجربتي اني طبعا كان وزني ١٠٠
ف اني حالي حال اي شخص يفكر عمليه التكميم خلص هي الحل السحري لا دايت ولا هم يحزنون اقص معدتي وأنحف بدون تعب بدون شي واقوى شي يصير عندي تساقط شعر وينحل والعمليه ما توجع
بس الحقيقه مختلفه …
العمليه المها عشره أضعاف القيصريه يعني مادري شنو اكول الكم تمنيت نفسي ميته ولا عشت هذا الوجع واقسم بالله ما اتمناه لعدوي ومستمر أسبوعين بعدين يبدي يخف
الدماء والافرازات الشحميه والدهنيه والدمويه من كل مكان
الماي وهذا شي صدمني جدا يا اخوان الماي طول عمرك مارح تكدر تجربع ( ترتوي) ماي مثل الشخص العطشان لا لا مجرد راح تكون دفعات صغيره بين كل وحده وحده خمس او عشر دقايق واذا كثرت تتقيأ هالشي صدمني بس السبب ان الماي كتلته الفيزيائيه اثقل من سفينه داخل المعده الي فقدت احماضها مع القص!
طبعا اكيد اكل مارح تكدر تاكل بعد شهر ونص
من بديت اكل طبعا وزنت ووزني نزلت حوالي ٣٠ كيلو وثبت اله فتره
لاني اعتقدت مثل هواي ناس ان التكميم الحل السحري يا اصدقائي
بس الصدمه ماكو شي اسمه حل سحري انت سويت التكميم عامل مساعد ومسرع
انت لازم تلتزم بدايت وتمنع السكريات والدهون والخبز و و و طول حياتك
وهاي ثاني يوم الدايت ونزلت ٣٢ كيلو لحد الان
الشي الي صدمني اكثر ان 70% من الي يسوون تكميم يجيهم ارتجاع واني منهم هسه السبب ان الأحماض تتراكم ورا بعض هواي المعده صغيره كلش ما تعرف شلون تصرفهم ف يصير ارتجاع
والاصدم همين ان العلكه والمكسرات والقصبه ( مزازه العصير) والجمع بين الاكل والشرب ممنوعات منعاً باتا لمدى الحياه لأنهم يوسعون المعده !!!!!!
هواي بعد اكو تفاصيل صادمه بس اني شوي شوي جاي اتعلم عنها ❤️