أنا صاحب القناة و عندي كلام عايز أقوله
إزيكم يا رجالة، حد بعتلي بوست او معرفش بتسموه ايه عالمنصة دي قريت التعليقات و شوفت حاجة مش عجباني.
مبدأيا أنا معنديش اي مانع اطلاقاً من النقد، الكوميديا او المحتوى بشكل عام شئ نسبي جدا، في ناس بترفس عالارض من كتر الضحك على علي ربيع و عادل إمام، بالنسبالي الاتنين ارخم من بعض لكن دي كوميديتهم و ليهم جمهورهم.
ناس بتعشق حاجة اسمها الدحيح و شايفين انه من حقه إسحاق نيوتن يغسله شراباته و بالنسبالي ده مجرد مؤدي بيسمع كلام و ينقله.
بالتالي حقك اللي بيضمنهولك السوشيال ميديا بالتعبير عن رأيك ف انك تقول عليا رخم و دمي تقيل أنا احترمه جدا بالعكس أنا بحاول أطور من نفسي من خلال النقد،
بس لما تنقد خليك بني ادم، يعني الولا اللي بيقول " طريقة مونتاجه رخيصة " لو كلف نفسه ثانيتين هيلاقيني كاتب في وصف القناة " بعمل ميمز رديئة "، أنا لو عايز اعمل مونتاج احترافي خزعبلي كنت قبلت عرض من عشرات العروض اللي اتقدمتلي من شركات كتير، اللي بيميز القناة هي " الردائة و الرخص " رغم ان الفيديو بياخد مجهود فوق ال٣٠ ساعة شغل عشان يخلص.
الولا اللي كاتب اغلب متابعينه أطفال أنا سايبلك احصاىية من آخر فيديو ( اعبط فيديو منزله عالقناة ) هتلاقي اللي متابعني فوق ال٣٥ سنة اكتر من اللي متابعني تحت ال١٨ سنة.
أنا متفهم جدا ان في ناس شايفة ارائي عامة هابلة متخلفة إلى اخره، و ده طبيعي يعني انت لو كيمتي او اوتاكو او علماني و متخفي ف المنصة دي اكيد هتكون عايز تولع فيا.
و ف الاخر قولتها زمان و بكررها دلوقتي، محتوايا غير تعليمي غير وثائقي مجرد محتوى ترفيهي ( للي حابب النوع ده ).
انت لو بتاخد مني معلومات بشكل صارم فا انت عندك مشكلة.
اللي ياخد معلومات من قناة بتجزم ب ان الكسير الخلود الخاص بعادل إمام مدفون في ارض قاحلة في الوادي الجديد محتاج يطور من تفكيره شوية.
لو عايز تتعلم اقرا كتاب اسمع اوديو بوك سكرول مقالات و ده اللي أنا شخصيا بعمله.
نهايتةً القناة لا تعنيني بشى من الناحية المادية، من الاخر لو زهقت منها هقفلها ف ثانية إلا ثانية، الدافع الوحيد اللي مخليني أكمل ان فيه فوق ال٢٠٠ الف إنسان بينتظروا فيديوهاتي لأنها سبب من أسباب سعادتهم حتى لو على سبيل الربع ساعة كل شهر.
طولت عليكم و بشكر الداعم و الناقد على حد سواء و اتمنالكم السعادة.