ماعرف ايش اللي جالسه امر فيه ولا افهم الحياه
انا ولدت من اكثر من شهر تقريبا ولا ودي اقول ان عندي اكتئاب مابعد الولاده لان احس كاني مراهقه مشخصه نفسها .
لكن كل اللي امر فيه غريب لدرجة اتمنى ان حياتي ترجع لقبل حياه الزواج ومايكون عندي اي شي اهتم فيه غير دوامي وصحباتي .
طفلنا جاء من غير استعداد نفسي ، بالنسبه لي كنت طول عمري اتمنى يعني وحلم حياتي اتزوج و يكون عندي طفل ف كنت فرحانه لكن زوجي كسر فرحتي بتصرفاته الغبيه مره ، كرهت البيبي وانا حامل وكرهت الفكره و دايم اندم ولا راح اكذب واقول كنت مبسوطه وماكان عندي شعور ١٪ اني احبه او اخاف عليه ، لدرجة لما الدكتوره قالتلي انه فيه مشكله ويمكن مايكمل و و و مازعلت ابد بالعكس كنت اقول احسن اذا هذا رد فعل زوجي انا مابغا.
كنت اتمنى اولد و نظرتي تتغير بس عجزت اكون اي مشاعر للطفل ، اخاف عليه فقط بس ماحس احبه ولا احس شي وبالغلط مرات احس ب اعصب منه ودي اصرخ عليه واتذكر انه طفل وماله ذنب بشي .
انا اسكن بمدينه بعيده عن اهلي ، جلست في بيتي اسبوعين تقريبا من الولاده وبعدين رحت لامي .
حرفيا زوجي مايسئل عني ولما يسئل عني اعرف ان فيه شي يبغاه مني والموضوع يكسر خاطري اكثر واكثر .
اهلي قاعده احس اني مضايقتهم والوالده تدور شي تهاوشني عليه وتغصبني عليه وانا يعني حالي حال نفسي.
ما احس بدعم ما احس بالحب ما احس بالامان ولا احس ب ولا اي شيء غير ان ولدي مسؤوليه على عاتقي ، ولا احس هذي الاشياء انا اقدر اوفرها طالما انا ما احس فيها.
لما لاحظت ان كل الناس تلعب مع ولدي وتدلعه وتحبه وانا ولا مره سويت هذا الشي ازعل على نفسي واكسر خاطر نفسي فعليا