u/Ali-azher

حصل كلام مهم بيني وبين احد اعضاء الرابطة المعنية وهو الاخ لالو او مرتضى من اهالي ميسان، صار الكلام كالآتي يبدأ الكلام بسؤال مرتضى:

- علي شنو رأيك بل يكتبون كتاباتهم عن طريق الذكاء الاصطناعي؟

- ما عدنة اي اشكال وياهم لكن كون الي يكتبونة مبني على تجربة حتى لا تنهز الفكرة وتدمر من نفسهة.

- كلامك سليم علي.. متوقع منك.

- اشكرك اخي.. تتذكر قبل فترة من حجيتلك على النقاش الحصل بيني وبين عضو سابق بالرابطة حاول ينتقص من عملنة؟

- اي صدك علي اشرحلي شلون انتهى النقاش؟

- اجة هذا العضو السابق وجان جايب صديق ما اعرفة ويا عود حتى يناقشني بآلية عمل الرابطة وطريقة سيرهة.. ثق بالله يا اخ مرتضى واسمعهة زين،

الاجابة الوحدة الي كان يحصلهة مني كانت تنهي مجاميع من الاسئلة الي تراودة.. وكن على ثقة، لو لا التجربة لما استطعت ان ارد بشجاعة وحزم واخلاص تام للفكرة نفسهة.. الشجاعة بالفعل قادرة ان تنهي كل الكلمات الرنانة الي تصدر من اي انسان على هذي الكرة الارضية مهما على شأنة بنفسة..

لكن تعرف شلون انتهى النقاش؟

- شلون؟

- بعد ما نهيت النقاش سمعتهم قصيدة كتبتهة والكل ضحكو وصارو سعداء لكن الاقوى منهة.. الصديق الي جابة ويا اعلن انضمامة للرابطة المعنية وانو هو مستعد يكتب لأجلهة،

وهنا يكون نجح اتضاح الجمال الحقيقي بعد ما يدركة الغريب قبل القريب والحمدلله.

الرابطة المعنية

التاريخ: ٢٠٢٦/٨/١٥

إشراف: المسؤول الأول للرابطة

علي ملهم او علي أزهر حسن

- كل شكد تجي لبغداد علي، انتبهت عليك متونس.

- كل شهر اجي مرة استمتع بوقتي يوم كامل وارجع.

- بشنو تستمتع؟، ليش هو اكو ببغداد غير التلوث البصري.

- بالعكس.. الاصالة والارث والحضارة والناس الحلوة.

- هذي مو حضارتك ولا هذا ارثك، العراقيين الاصليين بقى عدد قليل منهم.

- المعنى لازم ينوجد بكل الاحوال، وهو انوجد بوجودنة احنة هنا.. الاقدار فوق الاستيعاب وحكمهة افضل من حكمنة بهذا الوجود، وجودي وجودك الان.

- ممكن توضحلي؟

- مثلًا هسة عندي حساب اجنبي متابعة بمختلف البرامج يسوي الاكل المكتوب على الالواح الطينية، وبحكم انو العراق مسوي هواي سوالف فمن الاعتيادي انو نحصل سخرية من عدد هائل من الي ميعرفون اي شي عنة.

- كمل..

- لكيت الما عايشين هنا يسخرون والعايشين هنا يدافعون، بغض النظر على انو الموضوع بسيط لأن هو عبارة عن اكل الا ان هو رائع ان تشوف طريقة الحب الي يعبر بيهة المواطنين العراقيين على الارث وان كان مجرد اكل، اني عندي اشياء هنا يا اخي لو ما مصورهة فيديو او صورة محد جان راح يصدكهة..

بغداد كلشي بالنسبة الي واحبهة من قبل لا احبهة.

- حقك.. خاف عندك حبيبة منا؟

- لا والله بغداد حبيبتي !

الرابطة المعنية

التاريخ: ٢٠٢٦/٨/١٥

إشراف: المسؤول الأول للرابطة

علي أزهر حسن او علي ملهم.

مسألة طبيعية ان الانسان يتأثر بشخصية ويحبهة ويوصل مرحلة يعيش الاجواء والهواجس الي عاشتهة الشخصية نفسهة، شي لطيف لا بأس بي..

لكن الفشل الي شهدتة بأم عيني هو انو الشخص يتأثر بفشل شخصية فاشلة ويحاول يفشل نفس الفشل بس حتى يحس روحة فاشل لكن سينمائيًا،

ومن ابرز بواعث هذا الفشل هو عدم الثقة بالنفس وعدم القدرة على امتلاك اخطاء حقيقية تثبت هوية الشخص نفسة، صديقي العزيز القارئ او القارئة.. الانسان اذا ما يحط ثقتة بشي واحد بحياتة راح يكضي باقي عمرة مشتت بين هذا وهذا وما راح يحس بنفسة ارتكب أخطاء حقيقية تثبت على انو شخصيتة تمتلك معاني حقيقية.

الأخطاء ضرورية حتى تكمل شخصيتنة وهي جميلة وخلابة اكثر من تكون قادمة من نية صافية، مثل انو انت وثقت بهذا الشي وبعدين صار شي.. هذي تجربة واثبتت بيهة صفاء افكارك،

لكن انو تتأثر بفشل شخصية فاشلة وتحاول تفشل فشل سينمائي امام صاحبك هذا ما راح يخليك تمتلك اي خطأ..

راح يخليك فارغ وتضل كما انت في مكانك،

احذرو تمام الحذر من هؤلاء الاشخاص لأنهم ما يمتلكون اي شي غير انو يحاولون ينتقدون وهمة نفسهم ما ناقديهة.. والكتابة الي مثل هذي هذي اني ناقدهة قبل لا اكتبهة وبعد ما اكتبهة ايضًا منتقدهة.. اخيرًا،

ما هو الحل مع الفاشل السينمائي؟..

لا تجبرة على حلولك.. لا تفرضهة، اتركة يشاهدك، اذا اختار انو يستفاد منك راح يسويهة واذا اختار انو يهرب راح يهرب.

اكو مقولة عظيمة دائمًا اتذكرهة تكول،

"اضحك وسيضحك العالم معك، ابكي وستبكي وحدك."

صديقي القارئ او صديقتي القارئة، استمرو بالاستمتاع بالحياة ولا تستنزفون نفسكم.. كلشي ممتع😁💪.

الرابطة المعنية

التاريخ: ٢٠٢٦/٧/١٢

إشراف: المسؤول الأول للرابطة

علي أزهر حسن

اللحظة الي تقرر بيهة الاستغناء عن الاغاني لمدة معينة وعدم لبس سماعاتك للاكتفاء اكثر من سماع الاصوات الي براسك، هي وحدة من اقوى اللحظات الانسانية وهي لحظة اقل ما اكول عنهة..

قمة الموسيقية الانسانية،

الاغاني الهة قدسيتهة ونصيبهة من استماعنة الهة، والاحلى من الاستماع الهة هو الاستماع باستمرار للأصوات الي دلتك على الاشياء الصحيحة، الناس الصحيحة..

تخلص من كل المسمومين بحياتك وانتبه على نفسك،

ساعد الاخرين وانقذهم لكن انقذ حدودك ايضًا، حدودك مهمة وجميلة وناصعة البياض وحتى سواد التربة الي عندك ما هو الا ارض خصبة مليئة بالافكار والعجائب الي تنتظرك انو تسقيهة وتحبهة وتحصدهة،

رجائًا يا صديقي العراقي الحبيب، احصد نفسك العظيمة،

لا تهمل نفسك، حدد اهدافك بصورة واضحة وقوية، ابني ثقتك بشي لمرة وحدة بحياتك حتى تستمتع وما تشعر بالتشتت وتصير صاحب خبرة..

اهم شي ان يكون شيء جيد ويخدم البشرية وما يأذي احد..

نجاح اهدافنة هو نجاح لهذا المجتمع، انت تحتاجني واني احتاجك وشي رائع انو ما نحتاج احد عندما تنتهي حاجات الجميع بالحب الفاعل والقوي والمؤثر..

راح تستمر كل هذي الاشياء بالعالم تصير،

راح يستمر كلشي بالحدوث، احرص على ان تهرب جميع شرور الحياة منك وما يبقة بجانبك الا حصاد نفسك العظيم اخلاقيًا وخلاصهة الابدي من كل اشكال التعاسة، شكد حلو من تشعر دائمًا بالقوة،

شكد عظيم من تكتشف دائمًا انو محاولة تربيتك لنفسك ونجاح هذي العملية التربوية هو نجاح شامل وكامل لكل ما يمر بقربك، مرة سمعت كلام حلو يكول:

"اذا كعدت يم عطار راح تمتلئ ريحتك بالعطور واذا صادقت عامل نظافة راح تتعود على تنظيف كلشي حولك."

وبالمناسبة، ما تحتاج مكان راقي حتى يثبت عظمتك، ولا شهادة عالية، كلشي يجي خطوة بخطوة.. امامك وقت لكلشي.. شكد ما تقدمت بالعطاء والاسناد الطيب لنفسك وتقبلت كلشي راح يكون كل همك الاخير هو بيت جميل واسرة تحبك،

وحلم عظيم ينتظرك.. تحققة.

نعم الشر موجود لكن هو ما يرهب الا نفسة وعائلتة ومن معة وما يستطيع ارهابك، كما يقول المتنبي..

الرّأيُ قَبلَ شَجاعةِ الشّجْعانِ.

هُوَ أوّلٌ وَهيَ المَحَلُّ الثّاني

فإذا همَا اجْتَمَعَا لنَفْسٍ حُرّةٍ.

بَلَغَتْ مِنَ العَلْياءِ كلّ مكانِ.

الرابطة المعنية

التاريخ: ٢٠٢٦/٧/٤

إشراف: المسؤول الأول للرابطة

علي أزهر حسن

☆معلومة اضافية☆

كل فكرة عظيمة هي نتيجة قلق عظيم.

- انا

موضوع مهم..

من لا يعرف كيف يختار نفسه، قد يختار الآخرين بدافع الحاجة، لا بدافع الوعي. وعندما يكتشف ذلك، قد يؤذيهم وهو يحاول الهروب من أزمته مع نفسه.

- علي أزهر حسن

مرحبا اصدقائي.. الفردية او الانفرادية بالذات حاجة حلوة لكن دواعيها يجب ان تكون دواعي صحية قبل لا الشخص يقرر الاقدام على الفعل بيهة،

الانسان بطبيعتة كائن اجتماعي، اهدافنة وطموحاتنة واساس سعادتنة المستمرة بهذي الحياة هي المشاركة، بالذات مشاركة الحب والاخوية الى كل انسان بجانبنة..

الاتحاد بين الاخرين اتجاه بناء الافكار والارتقاء بيهة هي مسألة صعبة بهذا الزمن لكن ليست معضلة!، بالذات بين اغلبية الشباب الحديث.. اغلب الناس كاعد تتجه اتجاه فردية مظلمة لا هي واضحة الهم ولا هي واضحة للمقابل،

والمشكلة الحقيقية مو بهذولة الناس، المشكلة الحقيقية هي بالمثقف الي يخاف ينجح بسبب افكار غيرة ويصير الفضل لغيرة مو للمثقف، و هذا مو صحيح،

كلنة قادة.. والقائد الحقيقي يدرك انو مسؤوليتة تنتهي يوم من الايام تنتهي لكن الاثر الجميل هو المهم انو يبقة.

صديقي القارئ المثقف، احنة رابطة ادبية..

الكاتب العراقي بالماضي كانت عندة حقوق ودعم مؤسسي جميل وبالرغم من كل ذلك.. كان محاصر ومقيد، اما الان.. اما الان يا صديقي، تطبقت مقولة،

"البعض عنده الشعور بالقيد اسهل من الشعور بالحرية"

في امان الله

باسمِ القلمِ نُحيي العَلَم!

الرابطة المعنية

التاريخ: ٢٠٢٦/٦/٣٠

إشراف: المسؤول الأول للرابطة

علي أزهر حسن

☆معلومة اضافية☆

ضعف تمايز الذات (Differentiation of Self): مفهوم طوّره موراي بوين. يشير إلى الشخص الذي لا يمتلك إحساسًا مستقرًا بذاته، فيذوب في الآخرين أو يعتمد عليهم في تحديد هويته، ثم ينسحب أو يهاجم عندما يشعر بأن هذا الاعتماد أصبح يهدد استقلاله.

يدًا بيد فوق دجلة، جولة مع الشاعر حكيم العقابي.

أول ايام العيد بالشتة الراح التقينة اني واصدقائي بقامة من قامات شارع المتنبي.. الشاعر الرائع والمذهل حكيم العقابي، تحدثنة بالقصائد والعبارات الجميلة وسولفنة من العصر لليل😁.. بعد ما تأثرنة بقصائد بعضنة اخذتة من ايدة وتمشينة فوك دجلة بلحظة اعتبرهة من اجمل اللحظات بحياتي واني اتشارك المشاعر الشعرية بيني وبين رجل من زمان غير زماني..

اثناء المشي جان دائمًا يكلي

"لا توكف كلام ابني، سمعني كل قصائدك"

جان شي رائع اصدقائي.. بكل ما تعني الكلمة، لازم الكل تحب بغداد لأن بيهة اشخاص رائعين مثل هذا الرجل..

الى حكيم العقابي، شكرًا لك ولفخرك واعتزازك بنا وبمشاعر الشباب الجديد.. شكرًا والحمدلله دائمًا وابدًا.

الأديب يؤدِّب.

- علي أزهر حسن

لم تقتصر مهمة الأديب يومًا على استخراج آبار الجمال فحسب.. كنتُ أكرر دومًا هذا القول للجميع:

"الأديب يؤدِّب"

أرى في هذا العالم الكبير بحارًا من الجمال داخل قطرة صغيرة.. اسمها الوجود، ما إن تسقط هذه القطرة حتى نسقط جميعًا في الرحمة الكبرى،

حضن الأبدية.. نعومةً تتعدى كلمات العالم أجمع،

لن أتشائم من عالم الله.. ولن أتشائم من مجتمعٍ خلقني الله فيه.. لن أملّ من استعمال حروفه للكتابة والقراءة، قصيدةُ الحياة نستودع الله أبياتنا فيها..

لا أعترف بالملل، ونبذتُ التشاؤم منذ ولادتي. من الأشياء الممتعة، يا أصدقائي، أن نعرف أن الإخلاص للنفس أمرٌ كامنٌ في القدرة على التواصل المستمر مع المجتمع.. وهو ما يصنع قواعد رائعة للعيش،

من القواعد التي صنعتها لنفسي.. قاعدةٌ تُغنيك عن المشاكل والجدالات مع المخطئين بحقك: عندما يخطئ شخصٌ ما معك، ويكون الأمر محصورًا على انفراد بينك وبينه، سيكون هناك احتمالٌ كبير أن ينسحب من موقفه دون تبرير أو اعتذار، وهو ما يتركه يبدو طبيعيًا أمام الآخرين بالرغم من خطئه معك.. وهو الأمر الذي من الممكن أن يقوم بفعله مع شخصٍ آخر مثلك..

ببساطة، حتى تؤدِّبه:

احرص على جعل نفسك محاطًا بالآخرين دائمًا، ما إن يرى الجميع حقيقته، سيخاف منك المخطئ ويعتذر مباشرة..

المشكلة، يا أصدقائي، أننا في عراقنا الحبيب نرى الكثير ممن يشتكون من المجتمع.. من هو المجتمع؟

نحن المجتمع أخي!، أنا وأنت، صديقي/صديقتي القارئ/القارئة.. نتكاتف معًا لأجل مجتمعٍ أفضل!

تصبحون على حبٍّ كبير، إخوتي وأخواتي.

الرابطة المعنية

التاريخ: ٢٠٢٦/٥/١

إشراف: المسؤول الأول للرابطة

علي أزهر حسن