القلق/الهلع والزواج
وصلت عمر أبغا اتزوج (شريك عمر-عائلتي الخاصة) ومستعدة للمسؤوليات (بصراحة كإخت كبيره المسؤولية انولدت معي) بس عندي مشكلة عظيمة وهي القلق عندي زايد عن اللزوم وبعد وفاة الوالد -كنت متعلقه فيه بشكل مرضي- شخصوني بالهلع والقلق العام. عمومًا على مدار السنين تعالجت بالسلوكي المعرفي بس حصلت ظروف في البيت وصرت الكير تيكر لأخ مريض، ملازمته سنوات بمعنى ما اطلع ولا اروح ولا اجي، نفسيًا القلق رجع ويتحول لخوف من العالم الخارجي لأني أطول في البيت ولازم اسوي ريسيت لنفسي بين فتره وفتره... عمومًا، صرت انخطب وارفض لهالسبب بس بيني وبين نفسي محد يدري.. وما ادري هل اقول مستقبلًا افضل اني أقول للخطيب عن موضوعي او اسكت؟ ماقد تعالجت بالادوية والهلع ماجاني من سنوات، الناس تحبني وتحب تاخذ وتعطي معي وشخصيتي تنمدح وكثير يجون يأخذون بنصائحي لأني بنظرهم عاقله وعقلانيه ولكن انا شخص قلق للآن وعلى إني ما اضنه مانع من الزواج وأشوف اني بكون زوجة كويسه بجانب رجل يُعتمد عليه ويحسسني بالأمان إلا إني احس لازم أعطيه خبر بس لو عطيته خبر أخاف بعدين يعايرني او يمكن يفكر من ناحية يعني اني غير مناسبة للزواج. ايش رأيكم؟ أحيانًا افكر لو ابحث في المواقع عن انسان ثاني يعاني من نفس المشكلة يكون افضل لأن اهلي عادي عندهم موضوع التعرف المحترم لفتره معينه بنية الزواج