كنت رافض الحياة من سن المراهقة وبشوف نتايج دا دلوقتي وبندم
مساء الخير
انا معرفش إذا كان هنا المكان المناسب لمشكلتي ولا لا بس واثق إن ممكن ناس كتير هنا عندها خبرة في الحياة اكتر مني وممكن تفيدني.
انا بعتبر نفسي واحد ضعيف الإدراك والوعي وعديم الخبرات الحياتية ولسا بكتشف الحياة متأخر. ودا بسبب إني كنت انطوائي طوال حياتي بسبب ترومات حصلت بسبب والدي كان متحكم فيا لدرجة كان مانعني أكلم بنات واعمل علاقات طبيعية معاهم ، ومن زاوية تانية كنت عايش في قرية يعني البيئة نفسها كانت مسببالي خنقة وأثرت على قدراتي العقلية والنفسية ، ودا كله وصلني إني أكون خجول بزيادة ولما بتعرف على بنات على الميديا بغرض الارتباط اول ما بيحسوا بكدا بيهربوا ، دا مثال توضيحي يعني من مئات الامثلة اللي بتوضح مشكلتي وحتى بعطل كتير في مواقف الحياة وبحس الحياة فاتتني أصلا وحتى في الجامعة مكنتش عارف أخلق علاقات صداقة مع حد ، كنت شخص اجتنابي وما زلت ، ودا مسببلي اكتئاب لأني حاسس دايما بالوحدة بسبب العزلة المتخلفة دي إللي بوظت وشوهت شخصيتي وبسببها مش عارف أنجح في الحياة. جربت كتير أتابع مع ثيرابيست ومفيش حلول عملية من ناحيتهم.. فا أنا بسأل إيه أقرب خطوة ممكن أعملها دلوقتي في حياتي أقدر منها أمسك الخيط واقدر اعيش واتفاعل مع الحياة واتقبلها لاني رافضها اصلا ودا شعور مسببلي شلل فكري وحاسس إني مش جيد بما فيه الكفاية دايما