أنا ملحد وحبيبتي مسلمة، كيف صارحها بعد علاقة 7 سنين؟
يا جماعة الخير،
عم بكتب هون لأني عايش بصراع نفسي متعب، ومحتاج نصيحة من ناس ممكن يكونوا مرقوا بتجارب بتشبه تجربتي، او عندهم خبرة..
القصة باختصار:
تعرفت على بنت بالـ 2019، ووقتها كنت مسلم. من شي 3 سنين تقريباً تركت الإسلام. أنا كتير بحبها ووعدتها بالزواج، بس لحد هلق ما خبرتها إني غيرت قناعاتي. المشكلة إنها متدينة شوي، وحاسس إنو في احتمال 50% تتركني كرمال الدين إذا عرفت الحقيقة.
حالياً تنيناتنا بالجامعة وكل واحد فينا بجامعة شكل. حاولت أقنعها تنقل لعند جامعتي مشان كون قريب منها وإقدر مهدلها الموضوع واشرحلها ياه بالتدريج، لأني متأكد إذا خبطتها ياه بوشها مرة وحدة رح تنصدم، وممكن ما عاد شوفها بحياتي.
وين المشكلة بالنسبة إلي؟
من ناحيتي: ما عندي أي مشكلة بنوب إنها تضل مسلمة وتحتفظ بمعتقداتها. المشكلة هي كيف بدي صارحها بحقيقتي كشخص ملحد بدون ما تخرب علاقتنا.
المستقبل والولاد: هاد أكبر هاجس عندي.. حتى لو تقبلتني، خايف من تفكيرها بخصوص تربية الولاد بكرة، وخوفها إني "بدي فوّتهم عالنار". أنا ما عندي مشكلة إذا تقبلت نعلّم الولاد النقد والتفكير المستقل من هنن وصغار، بس مو وقتو هلق..
وكمان ما ننسى انو المسلمة ما بيصير تتزوج من شخص غير مسلم (هذا عدا عن إنو انا مرتد)..
سؤالي لإلكم في حدا هون مرق بتجربة بتشبه حالتي؟ كيف تعاملتوا مع قصة المصارحة؟ في عندكم أي نصيحة كيف افتح معها الموضوع بأقل أضرار ممكنة؟
.
.
يا جماعة، حاسس أغلب التعليقات راحت بموضوع تاني تماماً وبلشت تحكي بالقصص الأخلاقية وإني "لازم خبرها فوراً"..
أنا ما عم قول إني ما بدي خبرها بنوب! أنا أساساً عم اكتب البوست ومقرر خبرها، بس يلي عم اطلبو منكم ومن تجاربكم هو شو أفضل طريقة خبرها بدون ما تكون الصدمة قوية وتخرب العلاقة.
فبتمنى تركزوا معي على فكرة (كيف الطريقة) مو (إذا) لازم خبرها أو لأ..
وشكراً لكل حدا عم يساعدني.