ثقافة قز مقرفة ولازم المجتمع يستهجنها
اللي قاعد يصير برا مو طبيعي، ووصلنا لمستوى انحطاط يخرّع، لدرجة إن محد قام يستحي. التحرش بالبنات وصل لمستوى مو طبيعي، لدرجة إن حتى أختي ما قامت تطلع بالليل. لأن وايد شباب عبالهم إن مجرد نظرة منهم معناته إن البنت معطيتهم ويه.
شنو اللي فجأة خلى الشباب عندنا شفقانين جذي؟ أدري إن في أزمة وحدة وفراغ، بس اللي قاعد يصير مو بس بسبة هالوحدة. هالشباب يتصرفون جذي حتى وهم طالعين بشلّات ومجموعات كبيرة مع ربعهم، عشان جذي يحسون إنهم مستقوين ببعض. شفت هالشي بعيني وأنا أتمشى بالخيران مول؛ شلّة كبيرة قعدوا ينبحون على بنت جنه الوضع طبيعي ولا حسوا بأي ذرة حيا
هالثقافة بدت كلها بسبب تيك توك. أكثر شي أشوفه رياييل ينزلون مقاطع ويكتبون كابشنات إن مجرد نظرة بعينك بكوفي عادي معناها إعجاب أو حتى يلمحون لأشياء أوصخ، وكأن المكان صار للمغازل. وحتى بعض البنات ينزلون نفس هالنوع من المحتوى. الطرفين قاعدين يشجعون هالسلوك المقرف.
إحنا محتاجين قوانين مثل بعض الدول الأوروبية. أشوف إن منع استخدام وسائل التواصل الاجتماعي للي أعمارهم أقل من ١٦ سنة راح يفرق وايد ويرد بعضهم لصوابهم. بالنهاية إذا استمر الوضع، كل جيل بيعتبر هالثقافة طبيعية لأن تيك توك قاعد يقنعهم إنها عادية