u/Chemical-Bluejay-528

الكاتب روبرت لويس ستيفنسون (كاتب أسكتلندي )يحب يغوص في عمق الحب ويتفلسف فيه ويقولك: الحب كي يبدا، راه “وقوع” حقيقي. وهاد “الوقوع” عندو علاقة بالجذر اللاتيني cadere (يعني يسقط أو يهبط)، نفس الجذر تاع “accident” و “coincidence”. يعني الحب صدفة ولكن صدفة تقلب حياتك. بعدها، يجيب كلمة passion (الشغف)، ويرجعها للجذر اللاتيني patior (يعني “نعاني” أو “نحتمل”). يعني هنا راه يقول :الحب لي ما فيهش معاناة راه حب ناقص والمعاناة هي لي تعطيه قيمتو. المهم، كي توقع في الحب لازم تصبر. والصبر عندو جذر لاتيني آخر هو patientia (نفس جذر “باسيون” تقريبا، ولكن بتركيز على التحمل والثبات). ذرك راك حبيت و طحت و كذا واش يخلي الحب هذا يُعمر ولا يستمر هنا عمي ستيفنسون يقول أن “الصدق” (veracity) هو لي يخلي الحب يعمر، و veracity جات من اللاتينية verus (يعني “الحقيقة” أو “الصحيح”) يعني بلا صدق، الحب شغل نار بلا حطب (ميمكنش).

ذرك ستيفنسون يوصف كيفاش الحبيبين يتقدمو نحو بعضاهم بشوية بشوية، شغل زوج اطفال لي يدخلوا الضلمة. الجذر اللاتيني لي هنا هو gradior (يمشي أو يتقدم)، ونلقاوه في كلمة “progress”. يعني الحب تطور وتدرج، مش قفزة وحدة.

الحب بالنسبة لستيفنسون هو magis (أكثر من العادي، من اللاتينية “أعظم”) و يقولك إذا بغيت تفهم الحب، انسى النظريات، عيش الوقوع (cadere)، تقبل المعاناة (patior)، كن صادق (verus)، وتقدم بشوية بشوية (gradior).

ذرك هذا ستيفنسون من اسكتلندا (رغم انو معاشش فيها بسبب مرضو )و يعرف الحب رغم انو الجو كئيب عندهم و البرد داير رايو و راه يتفلسف فالحب و انت/ي لا ، المهم هاذي هي الفلسفة، باقي عليك التجربة .

و كيما قال احد الشعراء :قلبي وقلبك عند البوشي معلقين ، احي عليك و عليا

والسلام.

هذا مقال داروه فال independent

نهار الجمعة لي فاتت ايا تفكرتو قلت نعاود نحكيو عليه

لكونفوشيوس وسقراط و هذوك الجدود اللي عاشو قبل 2500 عام تقريبا… راهم رجعو

في معرض بأثينا سمّاوه "لقاء وتنوير: حوار عبر الزمن والمكان"، دارو حاجة تقول "آپديت" للفلاسفة، وجابوهم بالذكاء الاصطناعي وتجارب تفاعلية تخليك تحس روحك في زمن الـ 800 قبل الميلاد، اللي سماه الفيلسوف الألماني كارل ياسبرس "العصر المحوري". تصور بلي في هذاك الزمان، الشرق والغرب ڨاع صرات عندهم ثورة بالأفكار بلا ما يهدرو مع بعض، بصح خرجو بنفس الأسئلة.

الجانب الشرقي طلعلنا بكونفوشيوس والطاويين والموهيين والشرعيين، الكل قاعد يقول: "كيفاش نبنو مجتمع منظم؟ وكيفاش تكون الأخلاق بين الناس؟".

الجهة الغربية جات بسقراط وأفلاطون وأرسطو هدرتهم على العقل والمنطق والقوانين نتاع الطبيعة.

و المثير للاهتمام : في زوج بناو جامعات للحوار والنقاش في نفس الوقت تقريبا

أفلاطون فتح أكاديميته في أثينا عام 387 ق.م، وفي الصين القديمة فتحو "أكاديمية جيشيا" في لينزي (اليوم زيبو في شاندونغ) من 374 ق.م لـ 221 ق.م، بتمويل الدولة بصح تسيير خاص، وكانت جامعة خاصة بلا بيروقراطية. جابو كل المدارس الفكرية: كونفوشية، شرعية، طاوية، موهية، منطقيين… يقرّيو، يتناقشو، وينصحو الحكام بلا مناصب رسمية.

هيا اليوم في المعرض في أثينا خلاو هاد التاريخ و الفلاسفة يعاودو يعيشو كي شغل Edo tensei مي بالذكاء الاصطناعي .

في شاندونغ (موطن كونفوشيوس ومنشيوس)، المعهد التكنولوجي "تشيلو" بنى مبنى "جيشيا" اللي يحيي الروح القديمة: محاضرات، حوارات، وتقنيات رقمية وفنون مختلفة، باش الطلبة والأساتذة يعيشو روح الحرية الفكرية وتقبل الآخر.

المعرض ورى التوافق العجيب بين الحكماء: منشيوس قال: "الحكيم أولا يوضح فهمه لنفسه، ثم يستعمل هذا الوضوح لينور غيره." والإغريق قالو: "التعليم موش نعمرو بيدون، بل هو إضرام شعلة." الفكرة وحدة: الأخلاق والمعرفة بالإلهام.

واش هو الهدف لي خابين يوصلوه ؟ كما قال البروفيسور يانغ تشاومينغ: "المعرض في اليونان راه موش فقط حوار متكافئ بين الحضارتين، بل توصيل حقيقي لقيم كونفوشيوس واستمرارية الحضارة الصينية، باش العالم يفهم الصين بالفعل."

الأستاذ "تشي" زاد ووضح بلي الكونفوشية كانت هي الأساس، وكونفوشيوس جمع "الكتب الستة" اللي صارت منهج مشترك لكل المدارس في أكاديمية جيشيا.

وفي وقت اللي العالم مخلوع بمشاكلو، يقول الباحث "فو يونغجو": بالمساواة والاحترام والتسامح والتعلم المتبادل، الحضارات تقدر توصل لتفاهم وتطور مشترك.

الخلاصة : في اليونان دارو ملتقى فلاسفة الشرق والغرب بالذكاء الاصطناعي، ووراو بلي أفكارهم تقدر تخدم حتى في زمن الواي فاي والسوشل ميديا، والمهم: اللي "صح "كيما كونفوشيوس وسقراط، "صح" حتى اليوم.

خلينا نبداو بحاجة بسيطة: اغلبنا اذا مش كلنا حسينا برواحنا خايفين ملي نحسو الأمور ولات غامضة ولا ماشي واضحة؟ تقول "واش راح ندير؟", "واش رايح يصرى غدوة؟", "نخاف نغلط فالديسيزيو تاعي". و كي تلقى واحد ولا فكرة تعطيك جواب قاطع و بلا مناقشة، ترتاح و لسانك يقول"الحمد لله لقيت الحقيقة!". هاذ الإحساس هو اللي فروم يسمّيه "الهروب من الحرية" ولا "الخوف من عدم اليقين". و هو يقولّك بالحرف: "المهمة لي لازم نحطوها قدام عينينا ماشي باش نحسو بالأمان، بصح باش نقدرو نتحمّلوا عدم الأمان" (The task we must set for ourselves is not to feel secure, but to be able to tolerate insecurity). الفكرة هذي عجيبة و ان شاء الله نحاول نوصلها على حسب عقليتنا هنا فدزاير .

علاش خايفين من الغموض؟ علاش نحبّوا اليقين الكامل ؟

تخيّل معايا روحك راكب طاكسي فالعاصمة، و السائق طايح فالهدرة و يقولّك "البلاد رايحة للتهلكة، بصّح كان نرجعوا للشريعة و نحكموا بصرامة كل شي يصلح". هاد النوع تاع التفكير يضربلك "اليقين القاطع" بلا ما تخدم مخك. علاش تعجبنا هاذ التعليقات؟ لاننا كرهنا الحيرة و "مانعرفش". المخ تاعنا يحب يلقى أجوبة سريعة و يغلق الملف. بصّح فروم يحذّر: كاين فرق بين الإيمان الحي اللي يخليك تسقسى دايما، و الإيمان الميت اللي يخليك تابع أعمى. الميت هو اللي تقول "هذا هو الصح، خلاص، نقطة على السطر". و الحي هو اللي تقول "أنا مقتنع بصّح نبقى نسمع و نتعلم و نراجع روحي".

الهروب من الحرية: كي نرمي العقل و نخليو الغير هوما يفكروا في بلاصتنا

فروم كتب كتاب مشهور "الخوف من الحرية" (Escape from Freedom) بعد ما شاف كيفاش الناس فالعالم تخلاو على عقولهم و تبعو أنظمة ديكتاتورية بلا ما تڨول "علاه؟". هو يقول: الإنسان كي يتحرر من القيود القديمة (العائلة، القبيلة، الدين التقليدي اللي كان يوجه كل صغيرة و كبيرة)، يحسّ روحه معزول و خايف، و يحوس على "سيستام" ولا زعيم يعطيه الأمان و يريحلو مخو. يشبه الحالة هذي بالطفل اللي كان مربوط فالحبل السري مع امو، فجأة تقطع الحبل وولا حر بصح تايه. باش يهرب من هاذ التيه، يربط روحه فـ"أمّ جديدة": زعيم، حزب، أيديولوجيا جامدة، ولا حتى ف"شريك" يحبو بمرض و يذوب فيه. بصح المشكل: كي ترمي حريتك و عقلك لواحد آخر، تولي عبد جديد بصورة عصرية، تولي ترقص على المقطع اللي يعجبهم، و تعيش فـ"وهم اليقين".

هيا ذرك نشوفو امثلة من واقعنا المعاش :

1. الدين المُقَوْلَب: كاين ناس يخلطوا بين الإيمان و التزمت الفكري. يقلك "هكا قاع لي قراو من قبل، منقدرش نسقسى". فروم ما يقولش ماتكونش مؤمن، بل يقول: الإيمان الحقيقي هو اللي يخليك تطرح أسئلة و ما تخافش من الشك، و اللي ينبني على التجربة الشخصية لا على تقليد أعمى. "راك مؤمن بالله؟ رانا معاك، بصح خدم عقلك، اقرا، افهم، و شكك هذا يزيدك قوة".

2. السياسة و "البطل المنقذ": وقت الانتخابات ولا الأزمات، تلقى انسان يقولك "هاذ القائد هو الحلو رانا معاه عينيا مغمضة"(كيما خرج. علينا واحد الفئة من اديولوجية متعفنة ف 2019 و وصلت بيهم يوصفو رواحم بقطيع قطط😅). هذه "الوصفة ولا لافورميل" بامتياز: تتخلّى على التعددية و السؤال و التسامح مع الشك، باش ترتاح فحضن واحد يعدك بالجنة. و كي يخيب الأمل، تكتئب و تولّي تقول "مكانش فايدة و لبلاد هذي مافيهاش .... ". فروم يشجعنا نقولو: مكانش حل واحد عندو الجواب الكامل. الحل فالمشاركة النقدية، تاع "نشوفو مع بعض" فالهدرة المفتوحة، و نتحمّلوا ما نعرفوش كلشي.

3. العلاقات العاطفية "الدمجانية": كاين كوبل يديرو "علاقة سيمبيوزية" (symbiotic): كل واحد يذوب فالآخر، ماولاتش كاين "أنا" و "أنت"، يخافوا لواحد يفوت الثاني(ينفصل عليه). يقول فروم: الحب الناضج هو أنا واقف على رجلي و أنت على رجلك، بيناتنا مساحة و احترام، ما نخلطوش في بعض. المهمة: نتحملوا عدم اليقين العاطفي، ممكن نحبك اليوم و يتغير مشاعري في الغد، بصح ما نخافش نعيش التجربة و نتعلم.

علاش "تحمل الشك" هو سر الحرية النفسية؟

فروم يشرح: العقل لا يولد يقين كامل أبدا. إذا تطلّب منك تكون 100% متيقن باش تتحرك، راح تعيش مرعوب و تابع لاي احد يعطيك هاذ اليقين المزيف. بعبارته: "المهمة هي أن نتحملوا الشك، نعيشوا بقلب مفتوح بلا ما نغرقوا." يعني ماتسكرش باب السؤال خوفا من الريح. الحياة بحر، و السفينة لازم تتمايل، بصح المهم تبقى طافي و قبطان يحسن الملاحة.

هيا ذرك وصلنا لكيفاش نطبقوها ؟

نديو امثلة على سبيل الحصر :

1. التربية: لازم نعلمو اولادنا بلي "مانعرفش" موش عيب. قول لولدك: "أنا ما نعرفش الجواب تاع السؤال لي سقسيتني، و نقراو عليه كيف كيف "(هنا ثاني راه كاين فكر و نقاش كبير فالموضوع هذا تاع الابناء دائما يشوفو ابائهم هوما لي عندهم الحقيقة الكاملة بسبب انو الوالدين في مجتمعاتنا معندهمش مصطلح "منعرفش" 😅، لهذا راح يكبار الولد و في راسو صنم يا باباه يا ماماه يا في زوج يا واحد من محيطو يا استاذو ... ربما نحكيو عليها هذي فالمستقبل ). كي تعودهم على الغموض يرباو على فضول علمي ماشي خوف من التقييم.

2. فالخدمة و المشاريع: قبل ماتطلق مشروع، متسوّقش الفكرة المضمونة 100% (لازم نربح من أول يوم). المهمة هي تتحمّل المخاطرة المدروسة و تتعلم من الفشل. فروم يقول: الحب و الإبداع ينبعو من القدرة على تحمل عدم اليقين.

3. النقاش السياسي/ثقافي/اجتماعي: جرب تسمع وجهة نظر تعاكس رايك، و قول "ممكن نكون غالط". هاذي قمة القوة، مش ضعف. تولي قادر تفهم علاش الناس متخممش كيفك ، و تبني مواطنة حقيقية بلا تعصب.

4. علاقتك مع ذاتك: ماتلزمش نفسك تكون عارف كل خطوة. اسمح لنفسك تحلم، تجرب، تتردد. "عدم اليقين" هو اللي يخليك حي، و كي تتخلص من وهم اليقين المطلق، ترتاح نفسيا. تبقى كي الموجة: راكبها ولكن مكش متجانس معها.

الخلاصة :شوف اخي/اختي، الحياة ماهيش كتاب مسطور فيه أجوبة نهائية. اللي يقولّك 'أنا نملك الحقيقة' يبيع لك كذبة مريحة. الطريق الصحي هو أنك تكون مستعد تعيش الأسئلة، تتحمّل الشك مثل ما تتحمّل المطر في الشتاء، و تفتح قلبك على المجهول دون ما تخاف تضيع روحك. الحب، الحرية، و الفكر النقدي، تولد من هاذ الشجاعة: أنك تعيش بلا ضمانات، لكن بقلب مليان ثقة في قدرتك على المواجهة. في الاخير نتمنى تكون الفكرة وصلت و السلام عليكم .

نيتشه عندو رؤية مختلفة للحياة والآلام مقارنة بالبوذية والرواقية. الرجال هادوك كيما البوذية والرواقية يحاولو يبعدو المعاناة والهم، ولا يقللو منها، ولكن نيتشه يقول بالعكس، أن المعاناة هي حاجة ضرورية باش الإنسان يوصل للعظمة والكمال.الناس اللي تحاول تعيش مرتاحة وما تتعبش، هادوك ما يقدرش يبان فيهم أي إبداع ولا أي حاجة كبيرة. كيما الشجرة الكبيرة اللي تحتاج للعواصف والأمطار باش تكبر وتقوى، هكذا الإنسان يحتاج للصعاب والعراقيل. حتى نيتشه نفسه، يقول أن صحتو اللي تعبت وتاعسته (كان مريض لفترة طويلة) هي اللي ساعدتو يتعمق في الفلسفة وأخرج أفكاره العظيمة. المعاناة موش بالضرورة حاجة تحبطنا، بل هي اللي تخلينا نتعلمو ونفهمو الحياة بكل تفاصيلها. السعادة والنجاح الكبير ما يجوش من فراغ، لا بد من المقابل، لا بد من التعب والعناء. نيتشه يدعونا أننا نحبو قدَرنا (أو amor fati بالمصطلح الفلسفي)، ونرضاو بيه، ونقولو "نعم" للحياة بكل آلامها وأفراحها، وحتى الأوقات الصعيبة لازم نحسابو منها.كيما يقول نيتشه، "الألم العظيم هو اللي يحرر الروح". ويمضي في القول إن الإنسان العظيم، هو اللي يقدر يتقبل الحقيقة كاملة، ويحب حياتو بكل سلبياتها وإيجابياتها، وكأنها راح تعاد مليون مرة. هذا هو التحدي الحقيقي: أن تعيش حياتك، بكل ما فيها من ألم وفرح، كأنها حياة خالدة تتكرر كل مرة نفس الشيء، وتبقى مرتاح وانت تواجهها بكل قوة وإصرار.

في النهاية، نيتشه ما يقصدش أن المعاناة شيء نحبوه لأنفسنا، بل هو يريد أن نغير نظرتنا لها، ونشوفها كوسيلة مش غاية.