مشكلة عويصة
انا بت بدرس في جامعة خارج السودان في كلية كويسة مع اهلي ، لكن المشكلة هي اني عاوزة اشتغل بدراستي دي واجيب قروش يعني عاوزة اغترب لانو شايفة بقدراتي دي ممكن اجيب قروش كتيرة في الغربة خاصة ان احنا اسرة كلنا بنات وما عندنا معيل تاني ،
بس المشكلة انو عارفة انو سفر البنت براها لا يجوز واضافة الى ذلك غير مقبول مجتمعيا، معظم البنات البعرفهم سافرو بعد ما اتزوجوا ، دا غير انو لو اغتربتا هتقل فرصي للزواج بنسبة ٩٨ في المية ، ولو رجعتا السودان اصلا مستحيل القى شغل وحتى لو لقيت ما هيعمل لي شي ، فانا عاوزة ازود فرصي في الزواج لكن ما عارفة اعمل شنو لاني ما ولد ممكن اغترب وارجع البلد اقول عاوزة اعرس واسوق مرتي معاي (حاسداكم يا الاولاد ) .
المخليني عاوزة الغربة شديد انو في نسوان كتار قريبين بعرفهم عوانس فخايفة اني لا الم في عرس ولا اكون دعمتا اهلي ،خاصة اني شخصية انطوائية وما قادرة اكون صداقات مع بنات اصلا خلي اصل مرحلة ارتبط عاطفيا مع ولد مع اني راغبة في الزواج والانجاب عادي جدا ، مع العوامل دي كلها مجتمعة عملتا احصائية انو نسبة زواجي منخفضة .
وكدا انا هكون قاعدة كشخص بلا هدف في الحياة مع امكانيات مهدورة وما لاقية آكل ولا اساعد اهلي ولا زول يساعدني فاهمين المعادلة الصعبة ؟
يا ريت لو بت مرت بحاجة زي دي تفتيني او زول عندو نصيحة ايجابية يقولها .
اردموني يا جماعة انا بحب الreality checks بس يا ريت بصورة بناءة مش ردم من اجل الردم وخلاص عشان النفسية منتهية والزول ما ناقص .