هل فيه امل ليا؟
سوري على الكلام الكتير، وياريت الي عنده نصيحه يكتبها في الكومنتات ميجيليش خاص الا لو كانت بنت
انا بنت عندي حوالي ١٧ سنه، مكانش عندي أصحاب خالص من وانا في اعدادي لحد ٣ ثانوي الي انا فيها حالياً
انا انسانه عاديه جدا معنديش توحد ولا حاجه، هو الفكره أن مامتي كانت عندها اكتئاب شديد لما كان عندي ١١-١٢ سنه ومكانتش بتوديني المدرسة خالص، وكان اخواتي وقتها كلهم في الجامعه ف محدش كان عنده وقت ليا، ف قضيت معظم طفولتي في البيت على النت وده اثر على حياتي الاجتماعيه لما كبرت لحد دلوقتي
ف لما بقيت في اولى وتانية اعدادي، مكنتش عارفه اتكلم عن ايه بالظبط ، كنت بشوف الناس بيتكلموا عن تجاربهم الحياتية و انا حرفيا كل طفولتي قضيتها على النت وساعات كل الي بعمله في الفسحه اني كنت بروح الحمام واقعد اعيط
حتى وانا في اولى ثانوي اهلي كانوا حابسيني في البيت ومكانوش بيخلوني اروح المدرسة أو يعتمدوا عليا في أي حاجه، وكنت بغيب كتير عشان انا مكنتش بحب أروح هناك واحس بالوحدة
في تانية ثانوي عرفت وحده وكانت بتتحايل عليا ابعتلها نودز وتوريني نودز صحباتها وبطلت اكلمها، هو حوار كبير عامتا بس مش هتطرق ليه كتير عشان انا عارفه أن بتوع reddit هيسيبو البوست كله ويركزوا على دي
المهم اني بحس أن عمري ما هتخطى العقدة الي امي سببتهالي من الصغر أو اهلي كلهم سببوهالي عشانهم كانوا protective اوي
ساعات بتمنى إن كان عندي أصحاب وبعدين حصلت مشكلة وسابوني مثلا، عشان اعرف على الاقل أن عندي فرصة أن يكون عندي أصحاب، بعدين افتكر اصلا اني كنت برفض صداقة معظم الناس عشان بخاف اتأذي أو يستغربوني أو بحسهم بيصاحبوني بسبب شفقتهم عليا بس
للمعلومه اخواتي مش وحشين لدرجادي بالعكس كنا بنخرج كتير وبنسافر كتير مع بعض، وانا يعتبر عندي رأي وعمره ما حد فرض عليا حاجه، خصوصا اختي كانت اكتر وحده برتاح بالكلام معاها، وعندي شخص بحبه كمان واتقابلنا كذا مره وعملنا ذكريات حلوة كتير
بس اول ما اخواتي اتجوزو عرفت اني وحيده اوي، ويمكن ده السبب الي كان مخليني مبحاولش، عشان كنت بحس اني لازم اكون حد تاني مع الناس الي بتعرف عليها عكس لما اكون مع اخواتي
هل هعرف فعلا اعمل أصحاب في جامعه؟