بوست جايط من زول جايط
اترددت كتير قبل اكتب وامكن امسح البوست بعد شوية لكن عايز اتكلم عن نفسي شوية حاسي اني محتاج اتكلم وياريت البعلق يفيد ولا يسكت
الحمد لله علاقتي مع ربنا كويسة إلى حد ما بقوم بكل الفروض وصلواتي بصليها ومرات بزود عليها نوافل إذا مقدرتي سمحت لي وعلاقتي مع القرآن ما بقرا من المصحف لكن بستمع يوميا واكرر مع الاستماع حفظت كم سورة ، ربنا ما مقصر معاي الحمد لله دعواتي أغلبها بيستجيب لي ويحققها ولا يبعد عني حاجة ومسهل لي في حياتي كتير الحمد لله ، علاقتي مع امي وأبوي كويسة وطبيعية وتعاملي معاهم وتعاملهم معاي كويس ، الزول البشوفني يقول بس ده ياهو ولمن يقعد يتكلم ويتحاور معاي يطمن انو احساسو كان فمحلو الزول ده كويس وهو ما عارف الإنسان ده جواهو محيط جايط لاي درجة لكن مسيطر عليهو ، نجي لي مشكلتي بحس اني دائماً مضغوط وما عملت الحاجة الكافية وبعاتب نفسي على اشياء ممكن تكون ما بيدي وااي تفصيلة اقعد اعيد واراجع فيها واشيل ليها هم مع انو عارف ربنا لو خير حيسهل لي ولو شر حيبعدو عني بس التفكير ما بقيف وبي سبب الحياة حاسي اني بقيت متناقض مع نفسي يعني افكر واحس واقيس مع الواقع في أصغر شي وما قادر اتصرف والآخر اخليها تجي زي ما تجي ، يعني مثلا اجي عايز اذاكر اقوم اشتري الأقلام والدفاتر وانزل المحاضرات واجي عايز افتح المحاضرة القى نفسي ما قادر اقرا وانو لسه في زمن فاشغل نفسي بأي حاجة تانية مع اني الحمد لله كنت متفوق لكن اتراجعت شوية ، ولا مثلا اخش كورس وابدا فيهو اوصل مرحلة كويسة وفجأة اقيف وقدر ما احاول ارجع اكمل ما اقدر اخر شهرين بديت ٣ كورسات وقطعتهم وكل ما احاول اكمل القى نفسي ما طايقة شي ، أو اجيب الاكل واكون جيعان ونفسي في الاكل بس اول ما اكل شوية تاني الا اغصب نفسي على الباقي ومرات ما اكملو ، وحاليا بفكر اكمل الجامعة اللي هي بتشتغل كل حين وحين ولا اسعى وأشوف حياتي ووقت ما استقر تاني ارجع اقرا مع انو تخصصي سمح وبحبو بس حاسي نفسي متعطل شديد بسبب الجامعة ، أو انو اعيش بعيد عن ناس بيتنا وانضغط واسعى براي ولو ربنا وفقني اساعدهم وبين اقعد معاهم واساعدهم بي وجودي وشغلي البسيط الحالي واتحمل ضغوطات البيت وزي ما يكون يكون ، كلامي كتير بحاول اختصر ، عارفين احساس تكون انسان متمسك وعارف الغلط وما بتكون عايز تعملو لكن نفس الوقت حابي تجرب وانو ربنا بغفر ليك لكن ممكن ربنا يقبض روحك وانت بتجرب وتكون نهايتك كعبة فتقوم تعصر نفسك و تتقي ربنا تخلي التجربة وتحمد الله وتكون مطمن انو ربنا حيعوضك خير ، وصلت مرحلة حاليا محتاج ااي موقف افرغ فيهو كل الكتمة الجواي مع انو متاكد غالبا لو حصل الموقف حاكون متجمد وما يحصل شي ، في افكار ما قدرت اوصلها كاملة لكن حاولت اكتب جزء منها ، لو زول فهم البحصل ده ولا مر بي فكرة من الأفكار دي يحكي وربنا يجزاهو الخير واسف على الرغي الكتير .