عقلية بعض الذكور البالغين
في حاجات كتير بتبقى معروفة وبديهية اوي بس مش بنحب نقولها زي ماهي كدة وبنفضل نجملها بالكلام, منها طريقة تفكير بعض الذكور اللي هو أغلبية
خلينا صرحاء ومباشرين, أغلب الذكور البالغين في مصر بيبصوا للإناث على إنهم كائنات أدنى منهم, زي العبيد في السوق زمان كدة. كلمة اتجوزت واحدة ست في دماغه ترجمتها امتلكت واحدة ست, هي وولادها ملكية خاصة بيا وطالما هي بتصحى الصبح تبوس ايدي وتقول صباح الخير ياسيدي وتنده للعيال ييجوا يبوسوا ايد سيدهم(أبوهم زي مابنفضل نقول) وهما ييجوا جري ويتخانقوا على مين يبوس الأول, وبيعاملوني على إنني مولاهم وإلي المصير, يبقى انا هرضى عنهم واديهم عينيا الاتنين وكل اللي نفسهم فيه عطفا مني عليهم. انما هيعصوا ربهم.. قصدي انا مالكهم, أو أبوهم زي مابنحب نقولها تاني, يبقى هطردها من رحمتي هي وولادها لو أشركوا بيا وفضلوها عليا. انما لو ولادها جولي خاضعين تائبين هرضى عنهم واديهم عينيا الاتنين ويبقوا ولادي ساعتها مش ولادها
لو هنطبق النموذج ده في تفسير تصرفات الكثير من الأنطاع هتلاقيه متناسق كتير عن التفسيرات التانية
ليا صديقة مش متجوزة بتشتغل مدرسة في المدرسة بملاليم بس لازم ابوها يتأكد انها مخلصة كل فلوسها على البيت ويقولها هاتي معاكي أكل وحاجات بيت وهو مش محتاج اصلا, بس هي عقلية هي البنت دي ملكية, ملكي انا, يعني ماتملكه هي أملكه انا
وده عُرف خالص, مالهوش علاقة بالدين. الدين بيقول البنت لو مليونيرة كل حقوق أهلها عليها لو مقتدرين انها تخش عليهم باتنين كيلو فاكهة ومالهمش حاجة تانية. ولو عندها مصنع تقدر تشغل جوزها العاطل عندها عامل في المصنع ويقبض زيه زي زمايله وهو مجبر يصرف عليها بالكامل من مرتبه اللي هي بتديهوله من غير ماتصرف هي ع البيت جنيه زي ماقال الإمام الشافعي
هتقولي ايه السبب في كدة؟ التربية والتعليم. لو بننشئ الأطفال على انهم بشر متساويين رغم الاختلافات بينهم مش هيحصل كدة
بس يعمل ايه التعليم في وطن ضايع