عندي مشكلة مع خطيبي
أنا من سنة أتقدملي شخص صالونات عن طريق والدته و شافني واتكلمنا من على النت وعملنا خطوبة وهو كان مسافر برا
أنا في البداية مكنتش مقتنعة بيه بس وافقت علشان أهلي قعدوا يقولولي مش هتلاقي أحسن منه ومهندس وشغال برا وراتبه كويس وفرق السن مش كبير ٥ سنين.
بعد الخطوبة ب ٦ شهور نزل واتقابلنا وخرجنا و هو كويس يعني بس أنا مش حاسه بإنجذاب ليه
مش موضوع شكل هو شكله كويس بالعكس يعني هو جذاب بردو وبيهتم بنفسه وشكله بس هو فيه عنده مشاعر ناحيتي أنا معنديش نفس المشاعر دي
كان بيجي البيت ويتكلم معايا طريقته كويسه و محترم وبيصلي ولما بنخرج بيكون فرحان ويقعد يكلمني عن حياته وعن مواقف بس أنا ببقي مشغولة بالفون مش مشدودة ليه
هو جابلي هدايا خلال الفترة اللي نزل فيها ولسه مسافر من ٣ شهور وهينزل بعد شهر والمفروض هيحصل في الفترة الجاية دي ترتيبات الفرح
وأنا مش عارفه أوصلو ازاي إني مش حاسه ناحيته بحاجة أو أقول حتى لأهلي لأن هما مقتنعين بيه إنه كويس
أنا حاسه إني لسه موصلتش مرحلة إعجاب وممكن أشوف رجالة غيره أعجب بيهم
مش عارفة أعمل ايه وخايفة أفضل كاتمة الكلام ده لحد الفرح ويطلع قرار غلط إني كملت
وفي نفس الوقت مش شايفه حاجة فيه إنها عيب يتقال لاهلي علشان أسيبه
هو إنسان كويس ومجتد ويستاهل حد يحبه بس مش أنا حاسه إني معاه بمثل إني ساكته وأنا مش كده وهو فاهم ده كسوف
عايزة بس حد من البنات يقولي أتصرف ازاي واعمل ايه