u/Electronic-Coach4563

Hey! What is your batch number if you recently received your family finder DNA test result?

tama yuct n tiẓgi takswat. dihin izdɣ yudj urgaz ɣirs arba d trbat. arba ism nns Yidir d wulmas Yeṭṭu. tamṭṭut nns tamzgarut tmmut zik aya dxi ca iɣnca. iwa yawl allu ca yuct aḍnin. imil tahayakt tis snat ɣa tetacḍ araw nns.

isggaʷsn aya ur ɣa isrusa unẓaṛ. tdrus ɣirsn tmatca. acal nnsn ur ɣa yakka. argaz ur iɣiy ad yaf aɣṛum wass i ayt uxam nns. allig ituḥal yudj yiḍ agd tmṭṭut nns. inna as "matta buhyyuf a. ca ur nɣiy ad naf mara nstc araw nnɣ. i nkin d kmin abda ur ɣa itɣima agʷd yuct lḥact!"

tnna as "tssnd ma ara ngg. ad nawi araw nnk ɣr tiẓgi aska zik g tufut. aɣrmi ggutn tsɣarin. ad asn ngg afa. ad nuc ku yudj zigsn ca uɣṛum i dfir uya ad nddu ibrdan nnɣ ad itn nadj dihin. ur ad afn abrid iwra ɣr taddart. ad nili g ufra g tngarut"

irr ɣifs "ihi ur ɣiyx ad ggɣ aya i waraw inu. ul inu ad itubbi. trid ad itn tcn wuccn nɣ d mjɣyul"

tsɣuy ɣifs "a afɣul a aḥyuḍ mr nqqim am waka llaẓ ad aɣ inɣ akʷ nkni ur id ɣas araw nnk"

g yiḍ in. tamṭṭut ur tadja argaz nns ad ijn allig inna as waxxa ad igg askin nnakin g waska ɛad jnan. imil araw nnsn sɣdn wawal nnsn dxi llaẓ ur itn yadj ad jnen. qqimn war anudm g yiḍ in.

inna Yidir i ulmas "ɣas susm a Yeṭṭu. awr tggʷd ca. ad afɣ ca ufsay i uya"

aday jnen ibbas d tmṭṭut nns. iffɣ Yidir sg tiflut n addart. tetuḥal tamlli wayyur iɛla ca iẓṛa imẓyanen aɣuln imllaln sg wasid nns. isrs iẓṛa nnakin g uglmus nns i g ixba ibṭṭan nns. allig yaɣul s axam. inna i ulmas "ɣas ddu ad tjnd snɣ wasa mara ggx"

g waska. zdat ad iffu wass. tusa d tmṭṭut i tskkr Yidir d Yeṭṭu "kkrat a tarwa ixxan. ad nddu ad nbbi ikcciḍn ad ngg izduzn"

tuca i ku yudj zigsn ca uɣṛum i tnna asn "wahayakt i imnsi awr it tetat ca zdat as. ur ad awit ucx ca aḍnin"

g ubrid nnsn ɣr tiẓgi Yeṭṭu la tetasi aɣṛum dxi umas la itasi iẓṛa. asmi ibbas d tmṭṭut nns ur tuɛllun digsn. al iẓawḍ iẓṛa g wacal zdat as ɣas s tawil ḥma ur it sɣdn. allig awḍn jaj tiẓgi. ibbatsn inna asn ad smunen ikcciḍn aka ad ggn afa ad itn tsṛɣ. dfir uya tamṭṭut ibbatsn tnna asn "iwa wasa qqimat tama wafa. nkni ad nddu ad ngg izduzn. asmi nsqḍu ad nɣr ɣifun nddu ɣr taddart"

iwa qqimn waraw din. allig taduggʷat tcan aɣṛum nnsn. ɣaln smi ibbatsn la ibbi ikcciḍn dxi la sɣdn ca am uglzim la ikkat. imil ituḥal ɣas tarjajit uqbu n sɣart s waḍu. allig kkrn sg mjjint. tetuḥal tllast. Yeṭṭu tuṣṣ la tetru i tnna "maka s ara naɣul ɣr taddart"

inna as umas "gani ca n cwi. ad tali tmlli wayyur. ad naf abrid uxam"

allig tuli. Yidir yamẓ afus ulmas i iḍfṛ mani g llanin iẓṛa imllaln g ubrid. awḍn g tufut zik. nqqrn xf tiflut. triy asn tmṭṭut ibbatsn. "awili a iɣyalⵑ max tjnam cigan g tiẓgi. nenna ur sar taɣulm ɣr uxam"

imil ibbatsn immr dxi inɣa t wul nns asmi yadj itn g tiẓgi. zrin ca wussan. taɣul tmṭṭut in ɣr unswingm nnakin "akʷ matca tsqḍa. tqqim ɣas yuct n tuɣrift iqqan araw nnk ad ddun ibrdan nnsn. adwal a ad itn nawi ugar jaj tiẓgi ugar ugar allig ur iqqim illan ca ubrid iwra" allu ca ur iri urgaz nns. imil tamṭṭut nns iqqur uqrru nns. i am udwal anggaru. ur tuḥaln la djanen i sɣdn awal nnsn

allig ddan imarawn ad jnen. ikkr Yidir ad yax iẓṛa nnakin am unggaru. imil tqqn tmṭṭut tiflut g udwal ad s sarut. ca ur iɣiy ad iffɣ

g waska tusa d tmṭṭut in aka tskkr arraw urgaz nns allu, i tuca asn ca uɣṛum idrusn sg tikklt tanggarut. g ubrid ifrtet Yidir aɣṛum g uxbu ibṭṭan nns i akʷ idwaln la iẓawḍ ca zdat as

tamṭṭut tawi icirran g jaj tiẓgi ugar agmi ur djin awḍn sg zdat. i allu ggan afa i tnna asn tmṭṭut "qqim daha ay icirran i allig tuḥlm tɣyim ad tjnm, i nkni asmi nsali sg ibbi ikciḍn da d nas ɣirun ḥma naɣul ɣr taddart, araw snen smi ɣas la tsḥilil ɣifsn imil ur ɣirsn mara ggn ɣas ad sɣdn awal nns

iwa allig tawḍ tmlli wayyur tbḍu Yeṭṭu aɣṛum nns i umas Yidir nna yad iẓawḍ wins g ubrid aka ad isinen abdrid, izri yiḍ i ca ur d yusi agʷd yudj, asmi kkrn sg mjjint tetuḥal tllast

inna Yidir i ulmas "gani ca n cwi al tffu tmlli, wasayn ad naɣul ɣr uxxam s uḍfuṛ n ifrtitn uɣṛum nna hn sbḍux g ubrid"

iwa dfir uya ca ur ufin ifrtitn nnakin, ijḍaḍ tiẓgi tcan ihn. caṛḍ wussan qqimn din icirran la rzzun xf ubrid uxam, imil nihni ɣas ɣa kcmn ugar g jaj tiẓgi

g wass wis caṛḍ ɛlan yudj ujḍiḍ iɣudan d amllal am udfl, tikli nnsn tbdd, itɣima nnag uqbu n tsɣart itinziz iwa bddn tama nns aka ad sɣdn izlan nns, dfir uya ifru zigsn i nihni ḍfṛn it allig awḍn i yudj uxam amẓyan, iqqim ujḍiḍ s aflla nns, allig usn d tama nns ufan axam in ijudar nns tubnan s uɣṛum d icrẓm nns s skar amllal

Izri wakud slln asɣuy n ca twsart g jaj uxam "may msn nna tetan axam inu?"

tffɣ ɣirsn, i nihni ggʷdn zigs imil tnna asn "a tarwa inu awr tggʷdat ca, ucat iyi ifassn nnun i awrat agidi ad nkcm, axam inu d winun ay tga" kcmn wumatn ufan ṭabla tetkuṛ s matca d aɣi icfin d kika. allig djiwnen ddan ad jnen nnag umɣḍṣ nnsn, araw ɣalnen is d nihni g ca n warjit ag llan

tawsart mqqar tẓil agidsn, nttat d trgu ay tga, tetiri ad tetc imẓyanen wa maxmi tbna taddart nns s urkti d skar, maca alln nns d izggʷaɣn ur tɣiy ad tɛlu issn

g zik tufut, zdat ad kkrn waraw, tkkr trgu ad ihn tɛlu tnna i uqrru nns "ay aggayn nnsn d izggʷaɣn d izurarn, mcta ad tcx ass a"

tumẓ Yidir, tawi t ɣr lkuri i tqqn ɣifs iqqim al isɣuy imil d amya

taɣul ɣr Yeṭṭu tnna as "kkr a m ifaddn smiḍnin, awi d iyi aman sg wanu i sggʷ ca n matca immimn i umak, ntta g lkuri iqqan ad yaɣul azurar ḥma ad ih tcx"

iwa tgg as aya, umas al iteta i ntat ihi

Ku ass g tufut, tawasart ɣa tddu ɣr Yidir i tetini as "uc iyi aḍaḍ nnk, ḥma ad ɛlux mk taɣuld d azurar mad tsuld"

maca Yidir ɣa as yakka yudj iɣs, tawsart nna ur llin ɣirs walln ẓilnin tɣal s tidt d aḍaḍ nns agga, ur d tawi anɣmis, tqqim ku ass ɣa tsqsa aqrru nns max allig isul d asddad mqqar izri yudj wayyur, ur iqqim ɣirs ṣbṛ i ur tsul tɣiy ad tgani tsɣuy xf Yeṭṭu "tssnd mara tggd ddu awi d iyi aman, umak yili d azurar ɣnd d asddad aska ad it nɣx ad it sggʷx ad it tcx, aska d ass nns anggaru"

tbda al tru Yeṭṭu allu i tettr "a bu itran, aws ax, mr d is uccan tcan ax ayn yif uya, s wakin ad nmmut sin nnx ur id am waka!"

tnna as twssart "a susm a taɣyult, ayn nnix ad it ggx"

g waska, tgga Yeṭṭu afa g ufṛṛan, tawsart triy tiflut nns akka ad tɛlu is d s tidt, tusa d Yeṭṭu zdat tyyu twsart tnfr itt s tzmrt, tnqqz twsart g jaj ufṛṛan s uxncuc nns, tqqn ɣifs Yeṭṭu tiflut ufṛṛan umzil, tqqim twsart la twaɣus dihin allig tmmut s wafa. trwl Yeṭṭu ɣr umas g lkuri, triy ɣifs tnna as "nkni d idrfiyn, tilelli s tngarut, tmmut trgu, axam ahayakt taɣul ɣas i winx!!"

ddan ɣr uxam trgu, rzzun akʷ idis akʷ ansa digs, ufan iẓṛa wurɣ d nnqra d akʷ anawn idrimn! mqqurn g uxam in, ur djin aɣuln d imẓluḍn am g umzgaru.