u/ElodinDanGlokta

درخت زرد ہیں سورج نڈھال لگتا ہے
زمین و چرخ سبھی کچھ وبال لگتا ہے

یہ کیسا دزد حنائی ہے تیرے ہاتھ اوپر
کہ دن دہاڑے بھی ماہ کمال لگتا ہے

لبوں پہ رنگ حنائی ہے چہرے زرد سے ہیں
تمام شہر مجھے پائمال لگتا ہے

زہے زمانہ کبھی وقت ہی نہیں ملتا
کبھی تو دن کے گزرنے میں سال لگتا ہے

زوال شخص شناسی نے ایسا لوٹا ہے
علی ظفر بھی ہمیں دانیال لگتا ہے

سیاہ زلف اگر ہاتھ شاتھ میں آئے
تو زرد شرد کبھی لال شال لگتا ہے

نہ شور شاعری میں ہے نہ شور مے نوشی
دہن بھی کام سے کچھ کوتوال لگتا ہے

واعظا درس نہ دے ہم نے تو مر جانا ہے
اور اک تو ہے کہ تو نے تو گزر جانا ہے

ہائے اللہ رے دنیا سے بچانا مجھ کو
وعدۂ زیست کیا تھا سو مکر جانا ہے

کہو جوتِش کہو گردش ہمیں کیا اس سے خلش
ہم نے تو در سے ترے چاند نگر جانا ہے

اور افسوس کو افسوس پہ لادو کہ مجھے
باندھ کر دل پہ ذرا رخت سفر جانا ہے

تو ہوا عہد سے آزاد مبارک ہو تجھے
اے سبک سر ترے تعریضؔ نے مر جانا ہے

آپ کے راز جانا کرتے ہیں
بس یونہی دل برا نہ کرتے ہیں

ایک مدت سے آرزو ہی نہیں
خواست بھی تو خدا نہ کرتے ہیں

ہم دو ٹھہرے سلیم انار کلی
اب کہیں گور خانہ کرتے ہیں

مے کدے میں شراب یا چکنا
بس یونہی آب و دانہ کرتے ہیں

دل ناکام کچھ نہیں کرتا
اور ایک آپ کیا نہ کرتے ہیں

مے پلائی رقیب کو گھر میں
دشمنی دوستانہ کرتے ہیں

اور ہم سے رہا نہ جائے گا
نام تیرے زمانہ کرتے ہیں

درس و اصلاح تو ہوئی ہو گی
باتیں کیوں جاہلانہ کرتے ہیں

لوگ دنیا میں دو طرح کے ہیں
ایک جو بات جانا کرتے ہیں

“آسماں سندھ کی زمیں کی ہے”
بس فرشتے بہانہ کرتے ہیں

رات کو پائے اور پراٹھے کھائے
ہم ڈنر ناشتانہ کرتے ہیں

شاعری کر نہیں سکے تعریضؔ
آپ بس ناچ گانا کرتے ہیں

ہم دل جگر کی ایسی کی باہم لگا دیے
جیسے بھی تھے وہ درہم و برہم لگا دیے

جو اشک میرے حصے کے تھے ختم ہو گئے
بھولے سے زندگی نے بہت غم لگا دیے

یوں پیچ و تاب ہی میں مری عمر کٹ گئی
گیسو سنوار کر جو ذرا خم لگا دیے

جن کو بہشت کا تو ذرا تجربہ نہ تھا
وہ لوگ کیوں زمین پہ یک دم لگا دیے

جس فصلِ بے ثمر میں کوئی گل نہ کھل سکا
کس نے وہاں پہ عشق کے موسم لگا دیے

میں بھی بھرا غبارِ جنوں میں گیا وہاں
ان نے بھی ٹیکے عشق کے کم کم لگا دیے

اب دل زمین پر سبھی جھگڑا فساد ختم
ہم نے کسی کے نام کے پرچم لگا دیے

تعریضؔ دیکھنے کو گئے تھے حرم میاں
خاطر میں کس کی عجوہ و زمزم لگا دیے

ہونے کو اس نے کہہ دیا یک بار ہو گیا
عجلت میں کارخانہ تو مسمار ہو گیا

زنجیر التفات کہاں لے گئی مجھے
آزاد مرد کیسے گرفتار ہو گیا

دارو دوا کی مجھ کو ضرورت نہیں طبیب
یوں ہی کسی کے عشق میں بیمار ہو گیا

ہم کو بسنت میں جو حویلی دکھی تری
اڑتا پتنگ نقش بہ دیوار ہو گیا

جب چودھویں کی رات میں خواب آئے یار کا
بس یوں سمجھیے چاند کا دیدار ہو گیا

ذلت ہے شاعری میں یا لذت در جنون
تعریضؔ تیری سن کے غزل خوار ہو گیا

کہیں دور سے کچھ افق تاب آنکھیں تمہیں جھانکتی ہیں
کبھی ان افق تاب آنکھوں میں جھانکو
کبھی تم بھی دیکھو
کہ ان کہنہ آنکھوں میں ہے آشنائی کہن کی
انہیں تم افق تاب ہی مت سمجھنا
ہاں مانا کہ ان میں تمہیں اپنے حال اور ماضی کی پرتیں ملیں گی
عین ممکن تمہیں استعارے دکھیں گے
کہیں عاقبت کے کہیں پر عقوبت
نہ ان استعاروں کو سچ مان لینا

فریب و دغا اور حیلہ
یہ ان کہنہ آنکھوں کی کہنہ پھبن ہیں
ازل سے وہ آنکھیں اسی میں مگن ہیں
بہت لوگ ان آنکھوں کی تابندہ شوخی میں غرقاب ہوتے ہوئے مر گئے ہیں
گھر و بار چھوڑے
کسی ناخدا کو لیے
وہ سفر کرتے کرتے
ان آنکھوں میں مجذوب ہو کر وہیں رہ گئے ہیں
وہ جس سر زمیں سے نکل کر گئے تھے
وہ بستی بہت دور کھو ہی گئی ہے
وہ اب اس زمیں کے نہیں ہیں
ان آنکھوں تلک بھی رسائی کہاں تھی
وہ اب بس کہیں کے نہیں ہیں
اسی بے نشان اور بے نام دریا میں یوں ہی بہے جا رہے ہیں
وہ اب بھی ان آنکھوں میں مجذوب ہیں

اسیرِ کہن تھا افق تاب آنکھوں کا میں بھی کبھی
وہ آنکھیں جو کوئی زمانے سے مجھ کو تکے جا رہیں تھیں
ان آنکھوں میں مجذوب ہو کر سمندر کنارے تلک میں گیا تھا
وہ آنکھیں
افق تاب آنکھیں
کہ جن میں سبھی دیو سارے خداؤں کا سایہ دکھا تھا
وہ مژگاں
وہ مژگاں کہ جن پر کہا میر نے
“دکھائی دیے یوں کہ بےخود کیا
ہمیں آپ سے بھی جدا کر چلے”
وہ آنکھیں
فلک تاز
آنکھیں
وہ مژگاں
نظر ساز
مژگاں

میں ان میں کہیں چور ہونے لگا تھا
دوئی سے بہت دور ہونے لگا تھا
میں ان میں خود اپنے کو کھونے لگا تھا

کئی سال میں ان کو دیکھے گیا
سمندر کنارے پرکھتے گیا
وہ لہریں بھی آنکھوں کی مجذوب تھیں
انہیں بھی وہ مژگاں ہی مطلوب تھیں

اٹھی جو کوئی لہر اٹھتی ہوئی
مرے دیکھتے اک مژہ پر لگی
وہ شوخی وہ تابانیِ چشمِ خشک
جلی لہر، ابلے سمندر کی مشک
یہ بدبو مری سانس میں جب چڑھی
کھلی آنکھ، دیکھا میں آتش زنی
نہ بے دار ہوتا نہ آتا نظر
کہ آنکھیں محرک نہ مژگان تر

وہ ساکن تھیں جامد تھیں اٹکی ہوئیں
مگر میرا جوہر پرکھتی ہوئیں
میں گھبرا کے کچھ دیر تک چپ رہا
ان آنکھوں کو دیکھے ہی دیکھے گیا
وہ شوخی و عشوہ و غمزہ زنی
کا
اثر تک ان آنکھوں میں باقی نہی

میں تم سے بھی کہتا ہوں اے میری جاں
ان افق تاب آنکھوں میں جھانکو
کبھی تم بھی دیکھو
ان آنکھوں میں ڈھونڈو سکون و جمود
کہ مخفی نہیں ان میں ہست اور بود

وہ غدار آنکھیں
وہ مکار مژگاں

سمندر کنارے پہ بیٹھے رہو
انہیں تم بھی دیکھے ہی دیکھے چلو
وقت کی ریل جب ختم ہو جائے
ساعتیں جب سبھی بھسم ہو جائیں
چٹانیں بھی روئی طرح نرم ہو جائیں
برف ساری پگھل کر بہت گرم ہو جائے
جب وہ آنکھیں بھی بےزار ہو کر جھپک لیں
تو پھر لوٹ کر واپس آنا

یہ زخم دل تھوڑا دائمی ہے نہ بھر رہے گا
لگے گا بھرنے ہی تو لگا ہے مگر رہے گا

نہ فصل گل ہے نہ مے کدہ ہے نہ شاعری ہے
تمہی کہو بلبل اس فضا میں کدھر رہے گا

مزاج پرسی کے وقت بھی یے کہے ہے ہرجائی
گلہ خدا ہی سے مل کے کرنا اگر رہے گا

یہ سرمدی سا مکاں بنا کر ہمیں نہ بیچو
نہ ہم رہیں گے نہ تم رہو گے نہ گھر رہے گا

نظر شرربار ان کی ہوتی ہے ہم پہ ہر وقت
ہماری آنکھوں میں اک سمندر مگر رہے گا

تمہارا تعریضؔ ڈھیٹ بھی اور مست بھی ہے
جو جی میں ٹھانی سو ٹھن گئی ہے وہ کر رہے گا

اس بحر کے ارکان ہیں “متفاعلن” x4۔ لیکن میں نے بعض جگہ لوگوں کو پہلا رکن “مستفعلن” بھی کرتے دیکھا ہے۔ کیا کلاسیک میں اس کی اجازت ہے، یا پھر یہ جدید دور کی تخلیق ہے؟

رات کو یہ چاندنی یوں ہوئی دشمن تری
روشنی تیری تھی ایک دوسری ایضاً تری

عکس ہائے آئنہ سب تری تصویر ہیں
جانتا ہوں بس تجھے تو کہ “از من من تری”

رات کو یہ چاندنی یوں ہوئی دشمن تری
روشنی تیری تھی ایک دوسری ایضاً تری

عکس ہائے آئنہ سب تری تصویر ہیں
جانتا ہوں بس تجھے تو کہ “از من من تری”

ملنے شیطان کبھی آئے ہائے
پھر ہمیں دیکھ کے شرمائے ہائے

لفظ حسرت ہے کہ اوئے ہو ئے
لفظ آرام ہے کہ آئے ہائے

کاش آ جاؤ مگر اور نہیں
لفظ یہ سارے سکھا جائے ہائے

شبِ ظلمت میں کبھی آپ ملیں
اور کہیں ابر برس جائے ہائے

درد و آزار و غم و رنْج و خلش
سب ترے ہجر کے ہیں سائے ہائے

رات گو ہجر میں گزرے پہ ملیں
صبح لاہوری سری پائے ہائے

واللہ بہت مشکل و نقصان سے نکلے

ہم جب سے کہ اس قید دل و جان سے نکلے

پرچہ ہے وفا کا تو بہت سخت سنا تھا

پر سارے سوالات تو آسان سے نکلے

ہاں ٹھیک ہے ذرے پہ تحیر ہے مجھے بھی

حیران ہوں سب دہر پہ حیران سے نکلے

حلوے سے کہ اس کو بھی کوئی ربط تو ہو گی

مہدی کا بھی امکان ہے ملتان سے نکلے

کیوں اشک مرا آنکھ سے ٹپکے گا پلک تک

صحرا میں اتر آئے جو باران سے نکلے

ہم کونسے غالب ہیں کہ بے آبرو ہوتے

کوچے سے ترے ہم تو بڑی شان سے نکلے

سب بھول چکا رنج جو دنیا نے دیے ہیں

اور یاد تو کیا آپ تو نسیان سے نکلے

جنات سے ایمان بھی اٹھ جائے گا تعریضؔ

گر عشق کا یہ بھوت مری جان سے نکلے