u/Few-Assumption840

سلام عليكم يشباب ايه الاخبار

من فتره كدا كان عندي شوية مشاكل ف البيت بتضغطني نفسيا ودا اثر علي دراستي وخلاني ف الترم الاول شيلت مادتين وانا ف هندسه حلوان ومفيش حوار السمر كورس عندنا بالتالي باقيلي مادة كمان اشيلها واعيد السنه..ومجرد اني محطوط ف الموقف دا تلقائي الضغط زاد عليا جدا ومع شوية مشاكل عائليه اكبر دخلت ف اكتئاب من اول رمضان وكمل معايا لبعد العيد وطول الفتره دي انا منزلتش الكليه ولا حضرتك محاضره واحدة ولا ذاكرت حتي ف البيت وجه امتحانات الميدتيرم مع الاكتئاب اخدت قرار باني مش هروح ولا امتحان منهم وفعلا دا اللي حصل

اصبحت محتاج ادخل الفاينال اجيب الدرجه النهائيه ف ال ٦ مواد اللي عليا عشان اجيب مقبول وانجح وطبعا مواد تقيله جدا وانا كنت بدات اخرج من الاكتئاب لما فعلا عقلي اقتنع ان خلاص مفيش ضغط مذاكره ولا ضغوطات ف البيت لاني قعدت ف اوضه لوحدي بمفتاح ومبتعاملش مع اهلي كتير غير للضروره والحمدلله خرجت من اكتئابي

بالتالي انا اخدت قرار اني اعيد السنه علي مواد اقل وخلاص واستغل الفتره دي ف شغل وكورسات لان موضوع الشغل مع هندسه كان صعب الاول بس كدا هيبقي سهل خصوصا اني محتاج فلوس لان بسبب المشاكل قررت اني برضوا مش هاخد من اهلي فلوس حتي لو دا هيكلفني اني اعيد السنه او اتفصل من الكليه

وبصراحه انا خلاص سستمت حياتي علي كدا بس بما ان الامتحانات قربت فكدا جروب الدفعه بدا يصحي ويتكلموا علي المواد وحد يخل السؤال دا ومش عارف ايه

فاا كلامهم بدء يخليني ازعل تاني اني مش هبقي مع نفس الدفعه وكمان هتخرج متاخر سنه واحنا اصلا ف هندسه ٥ سنين ف كدا هيبقوا ٦ او الله اعلم كام وغير كدا انا مش بحب الناس اوي ومبختلطش بيهم بسهوله غير لو في حد استريحتله واصلا بقالي ٣ سنين مع نفس الدفعه ومعملتش غير ٣ او ٤ صحاب بنروح نفطر بين المحاضرات وخلاص حتي مش بنتكلم واتس اصلا ف مبالك بقي لما انزل مع دفعه جديده كلهم عارفين بعض وانا الدخيل اللي عليهم وكمان دخيل مش اجتماعي وبيكره الناس

دماغي تعبت من التفكير لو حد عنده نصيحه او اي حاجة تساعد ياريت يقولها حتي لو هتختلف معايا ف قراري او اي حاجة ممكن تبقي انت صح وانا غلط عادي جدا...وشكرا لو قريت كل دا والله

السلام عليكم ايه الاخبار يخواتي

انا ف كليه هندسه وطبعا هندسه بتبقي ٥ سنين فا بتتخرج بعد صحابك بسنه والقصه اللطيفه دي

انا الحمدلله مش متفوق اوي بس عادي يعني اجيب جيد جدا مثلا ف كل المواد او جيد كدا يعني طالب عادي من الاخر

عندنا مفيش حوار السمر كورس وللاسف الشديد حصلي شويه ظروف ف الترم الاول خلوني مروحش امتحانين ومعرفتش المهم فا للاسف شيلت الاتنين ف الترم الاول ودا بوظ نفسيتي اكتر لان عمري مشيلت مادة ف حياتي وباقيلي سنتين غير دي واتخرج

جيت الترم التاني اللي قرب يخلص دا وللاسف جالي اكتئاب شديد بسبب شويه مشاكل تانيه كدا وفضلت حرفيا مبخرجش من البيت لمدة شهرين وطبعا مع الاكتئاب كنت شايل هم الكليه والمواد اللي بتتراكم عليا وانا معرفش حاجة فيهم دا غير ان الحضور مهم وكدا لان بيبقي في معامل وشغل عملي كتيير وحوارات هندسه بقي مش محتاج اعرفكم

حاليا انا امتحاناتي كمان شهر وبسبب الاكتئاب مروحتش الميدتيرم في كل المواد اللي هما ٦ وكان في فرصه اني اعوض بس اختارت اني معوضش ودا القرار اللي هيشقلب حياتي

اني اخدت قرار باني هسيب السنه تروح في مقابل اني استعيد حريتي واخرج من الاكتئاب وطبعا هعيد علي اللي شيلته بس

اخدت القرار دا لان كدا كدا كان باقي ليا مادة كمان اشيلها واعيد السنه وبصراحه انا نفسيتي متضمره ف اخدت القرار واستريحت الحمدلله

الفكره اني بس زعلان علي اني اسمي هيتكتب باقي في الكشوفات واني هتخرج متاخر عن دفعتي بسنه مش عارف اتقبل الوضع بس للاسف مكنش في حل تاني

لو حد عندة نصايح او حاجات اعملها ياريت يقول لان باذن الله ناوي استغل الوقت ف اني انزل شغل لان طبعا الشغل مع هندسه صعب جدا ومش عارف ممكن اعمل ايه تاني

حابب احكي حاجة بسيطه يعني واللي حابب يتناقش اشطا

انا عندي ٢١ سنة ونوعا ما قصير وانطوائي ومنغلق علي نفسي

من فتره حبيت اخرج من انطوائيتي وابقي اجتماعي واتعرفت علي ناس وبتاع وبقيت بتصور واروح اشتغل واجي وبتاع وقتها كنت ١٩سنة مثلا

لحد ما حد اتعرفت عليه سوشال سالني انت طولك كام

قولتله معرفش لان وقتها مكنتش مهتم بس عارف اني قصير عن اللي حواليا

المهم قولت ليه مروحش اقيس واشوف طولي وبتاع وساعتها عرفت اني ١٦٣ سم وكان تمام معايا معنديش مشكله لحد ما عرفت ان الشخص اللي سالني ١٧٧سم وبدات العقدة بقي في الرايحه والجايه كلام عن الطول وعن الشباب القصيره وبتاع لحد ما قطعت العلاقه دي هي كدا كدا كانت اونلاين ف اشطا مش حوار

بس من وقتها مش عارف ارجع متقبل اني ١٦٣سم لحد ما بقيت عندي ٢١سنه وروحت اقيس تاني طولي لقيته ١٦٠سم معرفش ازاي بس وقتها كنت ف اكتئاب اصلا وحابس نفسي ف البيت وبتاع

المهم الحمدلله انا احسن دلوقتي بس اللي خلاني اكتب البوست هو اني روحت لصيدليه من شويه كانت محتاجه ناس تشتغل معاهم دليفري فااقولت اروح هما كدا كدا جنب البيت وانا عندي وقت يعني

فا كلمت الدكتور وقولتله عايز اشتغل وبتاع لقيته بيقولي انت عندك مدرسه ولا لا....ضحكت فوشه ضحكه بائسه وقولتله لا انا ف جامعه وقربت اتخرج اصلا وبتاع وما علينا من باقي القصة

الفكره ان الناس بتحكم بالطول ودا طبيعي انا معاهم ولو مكانهم هعمل كدا برضوا غصب عني لان هو دا الطبيعي زي م قولت بس انا ك واحد عندي ٢١ سنه وطولي ١٦٣سم والمفروض اني ممكن اخطب واتجوز ف اي وقت وعشان انا ببان صغير ربيت دقني وبقت طويله عشان ابان كبير ف السن وبتاع وكل دا معمل مع الدكتور اي حاجة وقالي انت عندك مدرسه ولا لا ف الاخر 😆

فاا اشطا انا مش عارف اعمل ايه بس اتمني لو حد يقدر يديني نصايح يبقي زي الفل

وياريت الناس المعاقه بتاعه انا ١٨٠سم وحاسس اني قصير و ال٥ متر ويقولك انا قصير تركن علي جنب عشان الواحد فيه اللي مكفيه والله