يا اهل الخبرة افيدوني ! هل المدير سايكوا ولا المشكلة عندي ؟
ياريت حضرتك تقولنا إزاي نتعامل مع المدير اللي طول الوقت بيقلل من شغل الموظف، ومهما حقق من نتائج مبيعترفش بيها، لكن وقت المرتب يفتكر أي خطأ أو تقصير؟
أنا شغال Performance Marketer، عندي 21 سنة، وماسك أكتر من 11 Account و11 Business، وبقالي 8 شهور في الشركة. النهارده اتخصم مني 2000 جنيه من مرتب 8000 جنيه بسبب نتائج عميل، رغم إن المشكلة الأساسية كانت في أكتر من نقطة خارج نطاق شغلي:
- الـ Account Manager كان فيه ضعف واضح في التواصل مع العميل، وبلغت الإدارة واتكلمت معاه أكتر من مرة.
- فريق الكرييتف كان بيطلع إعلانات ضعيفة، وده أثر على جودة الـ Leads.
- العميل نفسه كان بيشتكي إن الصفحة أو العرض اللي بيدخل عليه مفيهوش Value كفاية تخليه يكمل.
- فيه عوامل كتير في الـ Funnel كانت محتاجة تتظبط، لكن في النهاية اللوم كله اتحط عليّ.
المشكلة إن دي مش أول مرة أفكر أمشي. كل مرة أقدم استقالتي المدير يقولي: "أنا عايز مصلحتك"، و"لو خرجت مش هتعمل حاجة"، و"كل الوكالات كده"، و"أنا بستثمر فيك وبحبك"، لكن على أرض الواقع مفيش تقدير للنجاحات، وفيه تحميل مسؤولية لأخطاء فرق تانية.
مع ذلك، خلال الفترة اللي اشتغلت فيها حققت نتائج كويسة:
- ساهمت في نمو حساب من 0 إلى مليون جنيه.
- وساهمت في نمو حساب تاني من 150 ألف إلى 500 ألف جنيه.
دلوقتي محتار: هل أكمل على أمل نجاح بعض الحسابات الجديدة، ولا أمشي وأستثمر الوقت ده في المذاكرة وتطوير مهاراتي وسد الـ Gaps اللي عندي، وأدور على شركة أكثر احترافية وتقديرًا للمجهود؟
خصوصًا إن أغلب الناس اللي استشرتهم شايفين إن المشكلة مش في الأداء فقط، لكن في أسلوب الإدارة نفسه.
حابب أسمع رأيكم وتجاربكم.