Tunisia : people pray and the government steals
موضوع خارج عن التكنولوجيا لكن اخترت القروب هذا خاتر الأغلبية شباب كيفي بعقلية متقاربة
و باش نحكي بلوغة يفهمها الناس الكل
مؤخرا لاحظت بارشا ناس تنقد في السلطة في تونس و بعد يختموها ب
"يجي نهار و نرتاحو مل المافيا للتحكم في البلاد"
و بعد يسكتو و يبقو يستنو الحل أو المعجزة اللي عمرها لاهي باش تصير
نهار أذاكا ما يجي كان ما الشباب يلم بعضو و يناضل و يحارب على العدل من خلال ضغط مدني منظم, و ينحي عقلية عدم الاهتمام أو الهروب بالهجرة للخارج أو الرضاء بأقل حاجة
لازم ينحي السلطة من يدين كمشا شياب كلهم جشع , وعود كاذبة و يخدمو في مصالح أجنبية و ميحبوش الشعب يكون واعي و مستقر و مثقف كيما دول المتقدمة
الشعب التونسي زادة عندو نفاق كبير حيثو أغلبية كبيرة مسلمة (او تدعي ذلك) و تخدم عل الاخرة قبل الدنيا , وقت لي هو راضي بالفقر و الذل في دولة فلوسها و ثرواتها تتسرق قدامو و هو خايف مالحبس أو الموت و ميحبش يحارب
و هذا شخلا الكهول تمشي بعقلية مسمار في حيط و دوب ما يلقو أقل فرصة يكبش و صعيب يضحي بشوية الإستقرار لعندو أو يساهم في كشف الفساد
ثورة 2010 ما نجحتش في بناء دولة قانون عادل خاتر بدلتو كان رئيس الدولة و خذيتو شوية حرية تعبير لكن خليتو الحكومة كلها شياب الي ستغلو الثورة لصالحهم و الرؤساء لي جو لكل ما حاولوش يفككو العايلات لي تسيطر عل الاقتصاد
و زادا وقتها ما طالبتوش بقوانين تضمن الشفافية و مراقبة مستمرة للمسؤولين من قبل الشعب و محاسبتهم
و السبب الأكبر لهذا الكل هو عدم وعي الأغلبية بالسياسة أو خوف الأقلية الواعية من القضاء الفاسد و انعدام الثقة في البدائل
و كان باش يبقو كعبتين أكهو يحاربو علا تحسين وضع البلاد راهو باش نبقو هكا للأبد
أقل حجا تنجم تعملها اليوم هو توعية الناس