عايز اخذ القرار الغلط
انا شاب 20 سنه من صغري وانا لما حد يوصفني الوصف بيبقي ذكي او عبقري في دراسته. وهم عندهم حق. مش بذاكر ربع مذاكره أصحابي وبجيب درجات اعلي منهم بكثير. مش مجهود بل مجرد حظ او سرعه بديهة يمكن. لكن كل ده ومعنديش طموح. اصحابي فيهم اللي كان عايز يدخل طب واللي عايز يدخل هندسه او اللي عايز كذا وكذا. بس انا مكنتش عايز ادخل اي كليه ولا مهتم ولا نفسي انقذ حياه الناس فطب ولا حاجة. في ثانوي عام ذاكرت علي امل انه عقبال ما اتحط قدام اختيار ادخل انهي كليه اكون اكتشفت شغفي وبالفعل جبت مجموع طب بشري وبرضو فضلت زي منا. دخلت طب عشان هو اعلي قيمه ولسا في الكلية قضيت فيها سنتين. كل يوم في السنتين اللي قضيتهم في الكلية بفكر اني اسحب ملفي. كل يوم بشوف الناس حوالايا فرحانه بالكلية وبالدراسه وشغوفه بكونها طلاب طب الا انا. مش مهتم. حاولت افتح موضوع سحب الملف مع اهلي لكن كل مره نفس الحوار. يجيبوا اصحابهم وقرايبي يحكوا عن مواقف زي دي ودايما نفس الحكايه الحمضانه. اللي هي (الحياه دايسه علينا واصحابنا اللي دخلوا طب وبقوا دكاتره ما شاء الله الحياه عندهم ورديه). انا ناوي اخر السنه دي اسحب ملفي من الكليه لكن مرعوب من الفكره بسبب كلام اهلي.