u/Hero_tact_Miles

شو صايرة اسعاد اللابتوبات حالياً؟ شي مو كتير خارق بس للدراسة (مو معلوماتية)

انا حاحكي بصراحة. الوضع عالسوشال الميديا مختلف عن الواقع، سواء من الناحية الجيدة او السيئة. بوستات المحسوبين عالحكومة بتحسسك انو البلد ما فيها مليون مشكلة، و بوستات المعارضة بتحسسك انو البلد فيها مليون مشكلة غير المشاكل التانية اللي اصلاً لازم يتم الاهتمام فيها. بمعنى اخر كل طرف عم يركز عشي مو منطقي. كمثال، عندك الشام (اللي انا ساكن فيها، عم احكي شي شايفه بعيني) الطرقات مليانة وسخ، الشحادين معبيين الطريق، تنظيمات طرقية غير منطقية (متل ما عملوا بالشيخ سعد) تركيز عشغلات مالها طعمة بطريقة تافهة، ما في عدل بسلم الرواتب، مما ادى لفقر و مظلومية. و هاد لسا ما حكيت عالكهربا اللي خلت البلد تجن، و المحروقات (اللي متوقع بسبب حرب ايران، بس ما فيك تعزله عن باقي المشاكل)

المصيبة، وقت الواحد ينتقد، امة الله كلها بتهجم عليه لتقول قاتل شي قتيل. و كلو مفكر انو هو بيفهم بكلشي. موضوع الكهربا كمثال، الاستاذ الفهيم قتيبة ياسين بلش يبيض عالشعب المعتر اللي ما معو ياكل انو الكهربا لازم تغلى، و ما بتذكر شو قال بالضبط بس بتذكر انو حكى الموضوع بطريقة كتير مستفزة، بعدين في عالم بتحسها عم تمنن الناس انو ليكوا رفعوا الراتب، اي الراتب عم يطلع، بس الاستفادة منو ما عم تزيد. كان 25$ صار 70$، بس انا شو استفدت اذا كلشي غلي مع هالطلعة؟ و ليش انا كشخص مثلاً صرلي موظف من الله اعلم ايمتا (ما عم احكي عن حالي هون، عم احكي عن قصة بعرفها شخصياً) راتبي 70$، بينما اللي جاية جديد مو عرفان الخمسة من الطمسة عم ياخد 400$؟ مو ظلم هاد؟

بعدين شو قصة ورقة "اللا مانع" اللي هي موافقة امنية مقنعة؟ ليش رجعنا لموضوع الموافقات الامنية وقت البيع (عقارات)؟ و القصة ما عم تضل يومين و لا تلاتة صرلنا شهر و شوي عم نستنى الموافقة و ما كانت تطلع، مع انو ما علينا شي و تاكدنا من هالموضوع، لنكتشف بعدين انو ما عم يعطوا موافقات لحدا. ليش يعني ما عم افهم؟

البلد على كف عفريت، و وضعنا عم حس اسوء من وضعنا بنفس هالوقت السنة الماضية. الدولار عم يطلع مع انو المفروض ينزل او عالقليلة يضل ثابت. عم تنعمل استثمارات عمبدا العاطفة و تنفيع عالم مو المنطق التجاري او بناءً عحاجات البلد، بدال ما نحاول نتدرج بالشغل عم نقفز قفز مو زابط بالنسبة لوضع البلد. تعيينات مو منطقية كلها من دائرة ضيقة او ناس غير مناسبة بغير اماكنها.

طبعاً "المعارضة" مو انظم. كلو مفكر حالو الجهبذ الخطير اللي بيعرف يفك قضايا شيرلوك هولمز ما ربطها. بدال ما يحكوا عن شغلات مهمة بسلطوا الضو عشغلات مالها طعمة. قصة بتول بالنسبة الي كتير قصة مستفزة لانو كتير اخدت اكبر من حجمها بغض النظر عن موقف البنت، لدرجة انو قصتها صارت سيرة اللي مالو سيرة. طيب ليش؟ بحب ذكر المعارضة الكريمة انو لسا في ناس بالمخيمات، و لا هدول مو ترند؟ بحب ذكرهن انو الفقر نخر العالم، بس عم نحكي مسلمات لذلك نطنشها معلش مو مهمة في قصة اهم. الكذب شغال بقصص قد ما حاولت تركبها ما بتركب. كل واحد منهن بصورلي حالو البطل المغوار اللي مخابرات الاسد ما قدرت عليه.

و نقطة اخيرة، اللي برا البلد و مفكر حالو خاتم الدنيا مشان الله و الرسول لا تحكي بشي انت مو شايفو من الطرفين، لانو اللي عم يشوف و يعيش غير اللي عم يشوف بس. لسا في بقلبي كتير بس ما حاحكي اكتر من هيك هلا هاد بكفي.