u/Icy-Response6124

فانواتو، دولة جزرية صغيرة في المحيط الهادي، ومهددة بالغرق حرفيا بسبب ارتفاع مستوى سطح البحر، قدمت امبارح في الأمم المتحدة مشروع قرار "دعم الرأي الاستشاري لمحكمة العدل الدولية بشأن التزامات الدول بخصوص التغير المناخي" أي أن المحكمة يبقى لها دور في مساءلة الدول اللي خالفت الالتزامات وتخليها تدفع تعويضات… وتم اعتماد القرار بتأييد 141 دولة، ومعارضة 8 دول، وامتناع 28 دولة، وغياب الباقي.

طبعا، القرار دا زيه زي الأغلبية الساحقة الباقية من أي حاجة بتطلع من الأمم المتحدة: مبيتطبقش على أرض الواقع… بس اللافت للانتباه هو تصويت الدول.

أمريكا (وبالتبعية إسرائيل والسعودية وليبيريا) وروسيا (وبالتبعية بيلاروس) وإيران واليمن صوتوا ضده… طبعا مش مفاجأة أوي أن أمريكا تحت حكم ترامبولا تعمل كدا، دا بيعشق البترول والغاز وبيكره الطاقة المتجددة، وطبعا إسرائيل وليبيريا دول أتباع أمريكا، والسعودية اقتصادها قايم على البترول والغاز، وإيران نفس الحكاية، وروسيا شرحه، وبيلاروس تبعها… بس المفارقة أننا وصلنا لعصر فيه أمريكا وروسيا الـ2 متفقين على حاجة، وإسرائيل والسعودية وإيران متفقين على نفس الحاجة، وطبعا لا يمكن تبقى حاجة عدلة 😆

على الجانب الآخر، مصر أيدت القرار… الخليفة البالح بأمر الله، قاطع الأشجار، وصديق الخليج والبترودولار، وديكتاتور ترامبولا المفضل، أيد القرار 😅… لا والأغرب بمراحل أن الإمارات والصين كلاهما أيدوه بردو.

بعيد عن الفيلم الكوميدي دا كله، بس مصر نفسها متضررة من التغير المناخي بشدة، سواء بسبب ارتفاع مستوى سطح البحر اللي بيهدد اسكندرية والدلتا بالغرق، أو بسبب ارتفاع درجات الحرارة وتزايد الجفاف والتقلبات الجوية ووو… ومع كدا البالح فالح يزود الطين بلة ويقطع الشجر القليل أصلا 🤡

بس بردو عشان أقول الحقيقة، مشاريعه في الطاقة الشمسية والنووية خطوة إيجابية في الملف دا، وهتساهم في تقليل انبعاثات الكربون، وكذلك تنويع واستقلالية قطاع الطاقة.

خريطة التغير السنوي في مساحة الغابات حول العالم لسنة 2025، تبعا لـFAO.

بعيدا عن الكارثة الحاصلة في البرازيل وأفريقيا جنوب الصحرا، أنا اللي لفت انتباهي وخلاني أضحك هو الزيادة الطفيفة للغاية في مصر… دا أنا سايب الخليفة البالح بأمر الله، مولى الكباري والقصور، وهو بيقطع الشجر في كل حتة 😆

بعيد عن الألش وعن البالح، مصر بلد صحراوية مفيهاش غابات طبيعية تقريبا… أومال إيه الزيادة الطفيفة دي؟ دي غابات صناعية يتم استزراعها بمياه الصرف المعالجة، منها غابة الحبيل في الأقصر بمساحة 1861 فدان، وغابة سرابيوم في الإسماعيلية بمساحة 500 فدان، وغابة مطروح بمساحة 500 فدان، وغابات أصغر في مناطق أخرى… وتستخدم في إنتاج الأخشاب والوقود الحيوي.

زي ما احنا عارفين في الاقتصاد، كل دولة بيبقالها ناتج محلي إجمالي اسمي، وناتج محلي إجمالي بتعادل القوة الشرائية.

1. الناتج المحلي الإجمالي الاسمي nominal GDP

بيقيس حجم الاقتصاد في السوق العالمي ويقارنه بحجم الاقتصادات التانية، وطبعا كل ما كان أكبر كل ما كان اقتصاد البلد أغنى وأقوى في مقابل الاقتصادات الأخرى، وكل ما كان عدد السكان أكبر كل ما كان نصيبهم من الناتج دا أقل (GDP per capita).

2. الناتج المحلي الإجمالي بتعادل القوة الشرائية GDP PPP

بياخد في الحساب اختلاف القوة الشرائية، أي لو في بلدين مثلا كلاهما عندهم نفس nominal GDP وروحت كل بلد وأنت معاك نفس المبلغ، بس واحدة فيها المنتجات المصنعة محليا أرخص، فإن نفس المبلغ يقدر يشتري كمية أكبر من المنتجات المحلية (مش المستوردة)، أي أن القوة الشرائية لنفس المبلغ أعلى (بغض النظر عن متوسط المرتبات المحلي).

تبعا لصندوق النقد الدولي، فإن مصر عندها:

- Nominal GDP: $429.64 billion (الـ43 عالميا، وطبعا هو ترتيب منخفض للغاية)

- Nominal GDP per capita: $3,904 (منخفض جدا جدا، الـ158 عالميا حرفيا)

- GDP PPP: $2.57 trillion (الـ18 عالميا، يعني أعلى من الاسمي بـ25 مركز)

- GDP PPP per capita: $23,321 (يعني 5.97 ضعف النصيب من الناتج المحلي الاسمي، وترتيبه الـ100 عالميا، يعني أعلى من الاسمي بـ58 مركز)

المعامل 5.97 دا بقى اللي هو PPP boost multiplier، ومعناه: ناتج قسمة (GDP PPP/Nominal GDP per capita)… وكل ما كان أكبر، كل ما دا كان معناه أن الفرق بين القوة الشرائية وبين الناتج الاسمي أعلى.

الخريطة هنا جايبة PPP boost multiplier بتاع كل بلد، وفيه:

- اللون الأحمر بيدل على أن مفيش زيادة تقريبا بعد القسمة.

- كل ما تطلع للبرتقاني والأصفر والأخضر والأزرق كل ما يزيد.

- البنفسجي فيه PPP boost multiplier عالي جدا، أعلى من 5.5 ضعف.

في الخريطة هنا، في 3 دول بس اللي بالبنفسجي: مصر 5.97، إيران 5.93، نيجيريا 6.42.

الـ3 دول كلها: حصل فيها انهيارات ضخمة في العملة المحلية دمرت الـnominal GDP بتاعها تماما وخلتها تعاني عشان تستورد من برا (خصوصا السلع اللي مبتتصنعش محليا شبه الكمبيوترات والموبايلات)، وفي نفس الوقت عندها إنتاج محلي كتير بقى رخيص جدا مقارنة بما يعادله في الخارج بسبب فرق العملة دا، لكن بما أن المرتبات المحلية ضئيلة حرفيا ومتكفيش مصاريف قطة، فإن الشعب فقير ومش عارف يشتري المنتجات المحلية نفسها… بينما الأجانب اللي بييجوا مصر بالذات بيستفيدوا من فرق العملة دا ويشتروا حاجات كتيرة جدا بمبلغ قليل بالنسبة لهم.

وبغض النظر عن الأجانب، الملاحظ أن مصر عندها نفس معامل إيران تقريبا، يعني آية الله السيسي، أو السيستاني، خلانا في نفس ليفيل إيران، ومن غير عقوبات ولا حرب شاملة… مرة واحد على الفيس كان بيتريق على الحكاية دي ويقول "مصر لو تحالفت مع إيران مش هتخاف يتعمل عليها عقوبات اقتصادية، لأن كدا كدا العقوبات built-in 💀😆".

من المعلومات المفاجئة (وغير المفاجئة في نفس الوقت) أن أول بلد في العالم حرفيا يتعمل فيها محطة طاقة شمسية كانت مصر سنة 1912-1913، وكانت في المعادي تحديدا.

في نفس الوقت لما نبص على الحاضر، هنلاقي أن للأسف مصر متأخرة جدا في مجال الطاقة الشمسية (رغم أنها أحد أكثر الدول المشمسة في العالم) حيث أن حصتها في 2025 كانت 3.1% بالكاد من إنتاج الكهربا، بينما 86.1% من إنتاج الكهرباء معتمد على الغاز الطبيعي والديزل/المازوت بدرجة أقل… ومش بس كدا، دا مصر بدأت تلتفت للمجال متأخر جدا، واللي أيام اللامبارك كان مهمل تماما لدرجة أن حصة الطاقة الشمسية في 2010 كانت 0.1% بس، وطبعا مش محتاج أقول إن إنتاج الكهربا كله كان أقل بكتير جدا جدا (لدرجة أنها كانت بتقطع أصلا لعجز المحطات القديمة والقليلة عن تغطية الاستهلاك).

من بعد 2015، والحصة بدأت تزيد ببطء… الخليفة البالح بأمر الله عمل حاجة صح على غير عادته (😆) وفتح المجال قدام مشاريع الطاقة الشمسية بالتعاون مع الصين والاتحاد الأوروبي، وتم افتتاح محطة بنبان (رابع أكبر محطة شمسية في العالم) بسعة 1650 ميجاوات، ومحطة أوبيليسك بسعة 1000 ميجاوات، وفي مصانع ألواح شمسية جديدة بتتعمل، من ضمنها الهيئة العربية للتصنيع بالمناسبة… بجانب إلزام المصانع بالاعتماد الجزئي على الألواح الشمسية في توليد الكهربا.

الملاحظ بردو أن في إقبال متزايد على الألواح الشمسية في الأرياف بالذات (حيث تقل الكثافة السكانية والأبراج العالية) وبيوت كتير بتركبها كونها أرخص على المدى البعيد من فواتير الكهربا المتزايدة، وبقى في محلات كتيرة بتبيع ألواح شمسية في دلالة على تزايد الإقبال عليها فعلا… والنهار دا وزارة الكهربا أعلنت إعفاء المواطنين من أي شروط لتركيب ألواح شمسية أعلى أسطح المنازل (المصدر: https://m.youm7.com/story/2026/5/18/%D8%A7%D9%84%D9%83%D9%87%D8%B1%D8%A8%D8%A7%D8%A1-%D8%A5%D8%B9%D9%81%D8%A7%D8%A1-%D8%A7%D9%84%D9%85%D9%88%D8%A7%D8%B7%D9%86%D9%8A%D9%86-%D9%85%D9%86-%D8%A3%D9%89-%D8%B4%D8%B1%D9%88%D8%B7-%D9%84%D8%AA%D8%B1%D9%83%D9%8A%D8%A8-%D8%A3%D9%84%D9%88%D8%A7%D8%AD-%D8%B4%D9%85%D8%B3%D9%8A%D8%A9-%D8%A3%D8%B9%D9%84%D9%89/7419406)

طبعا، الأخبار دي كلها بتدي توقعات بنمو كبير في قطاع الطاقة الشمسية في مصر خلال السنوات القادمة، مش بس بسبب عمل الحكومة على بناء محطات جديدة، إنما كمان بسبب أن الإنتاج المحلي والإعفاءات وارتفاع سعر الكهربا المولدة من محطات الغاز هيزودوا إقبال نسبة كبيرة من الشعب على تركيب ألواح شمسية على الأسطح… في باكستان مثلا، حصل حاجة شكل دي: فواتير الكهربا المولدة من الغاز زادت بمعدلات رهيبة والكهربا كانت بتقطع، وفي نفس الوقت أسعار الألواح الشمسية المستوردة من الصين انخفضت بشدة، مما دفع ناس كتير هناك لشراء ألواح شمسية بكثافة لحد ما بقت بتنتج أكتر من ربع الكهربا هناك حرفيا.

العامل الآخر اللي هيحفز نمو قطاع الطاقة الشمسية في العالم كله (عدا الدول قليلة التعرض لساعات مشمسة كافية) هو ترامب، رغم عداوته للطاقة المتجددة كلها… المهرج راح عمل حرب شاملة ضد إيران، تسببت بغلق مضيق هرمز وتعطل إمدادات البترول والغاز الطبيعي منه، متسببا بأزمة طاقة في العالم كله، ودلوقتي كلها بتدور على موردين تانيين، وبتسحب من الاحتياطي اللي عندها، وبتحط خطط للتوسع في الطاقة المتجددة عموما، وكذلك الطاقة النووية.

طبعا زي ما كلنا عارفين، الكون اللي احنا فيه دا ضخم جدا والمسافة فيه بتتقاس بالسنوات الضوئية، وطبعا احنا كبشر بالكوكب بتاعتنا كله منساويش فيه حاجة تذكر أصلا من كتر ما احنا صغيرين.

السؤال اللي معرفش إجابته على وجه الدقة هو: ليه حقيقة أننا صغيرين جدا كدا بتزعل ناس كتير؟ أو بمعنى أدق إيه اللي يزعل في حقيقة أننا "مش مركز الكون" و"مش أهم حاجة فيه" لدرجة أن البعض بيحاول إقناع نفسه بعدها أنه رغم صغره دا إلا أنه مركزي ومهم جدا؟

يعني مثلا، المتدينين لما بيشوفوا الفرق دا بيقولوا "سبحان الله، خلق الكون الواسع دا كله عشان احنا نتدبر في آياته ونتواضع له ووو…" واللي هو يعني مقتنعين بأن الكون الضخم للغاية دا معمول مخصوص عشان هم يتدبروا ويتواضعوا ويذلوا نفسهم بالدين، وأن الإله اللي عمل كل دا هيسيبه ويراقبهم، أصله خلقهم عشان يبقوا "مركز الكون".

طب وغير المتدينين، أو اللي بيتكلموا عن الكون من غير ما يحشروا أيا من أديانهم فيه؟ بتلاقي كتير منهم بيقولوا "معقولة احنا قليلين جدا كدا؟" وتلاقي كتير منهم بيقولوا أن الحقيقة دي بتزعلهم نوعا ما، كأن الاكتشاف دا خلى البشرية تخسر مكانتها… ويواسوا نفسهم بحقيقة أن "على الأقل احنا قدرنا نخترع تلسكوبات ومركبات فضائية ونكتشف ولو أجزاء ضئيلة من الكون الضخم دا"

أنا بقى على النقيض تماما، عمري ما حسيت أن صغرنا (بل وانعدام أهميتنا) بالنسبة للكون دا حاجة تزعل، بل دا أنا بحس أنه مريح نفسيا… ما احنا لو كنا أصحاب دور كبير ومركزي في الكون، كنا بقينا مسؤولين عنه… إنما لحسن الحظ احنا بحكم صغرنا دا مش مسؤولين عن أي شيء غير كوكبنا، وللأسف احنا تعاملنا معاه بيقول أننا مش عايزين نحميه، رغم أن ملناش غيره بحكم الأمر الواقع.

وهنا يطرح السؤال نفسه: هل البشر بيحبوا يورطوا نفسهم في مسؤوليات كبيرة وخلاص، لدرجة أنهم بيزعلوا لما يلاقوا الكون بيقولهم "معلش، أنا أكبر من أني أورطكم في تحمل مسؤوليتي" ولا إيه بالظبط؟ 😅

الصورة للفت الانتباه 😅😆

طبعا، كلنا عارفين الحرب الباردة بين أمريكا والاتحاد السوفيتي، اللي بدأت بعد الحرب العالمية التانية بشوية، وانتهت قبيل تفكك الاتحاد السوفيتي… وبردو كلنا عارفين أنها غيرت شكل العالم حرفيا، وشهدت صعود وسقوط الكتلة الشرقية، وظهور الناتو، وانهيار الاستعمار الأوروبي القديم، وحروب في كوريا وفيتنام وأفغانستان، وثورات في إيران وإثيوبيا ووو… وانقلابات على قفا مين يشيل في أمريكا اللاتينية، وطبعا قيام دولة زومبائيل واتفاقية البترودولار… وكل دا ومتكلمتش عن سباق التسلح والاختراعات والصعود للفضاء.

الملاحظ بشدة أن عندما يتم الحديث عن مصر أيامها، من النادر حرفيا أن يتم ذكر الحرب الباردة، كأن مصر دي نيوزيلندا مثلا، مش أنها كانت في قلب الحرب أصلا بسبب موقعها الجغرافي 💀

لو بصينا على كل حاجة حصلت منذ حرب 1948 لحد اغتيال السادات، هنلاقي الحرب الباردة كان ليها تأثير رئيسي.

• في حرب 1948، أمريكا والاتحاد السوفيتي كلاهما دعموا زومبائيل ضدنا، والاتحاد السوفيتي (وتابعته في الكتلة الشرقية تشيكوسلوفاكيا) بعتوا لها سلاح… لأن الأمريكان والسوفيت كلاهما كانوا عايزين زومبائيل تبقى حليف لأحدهما في الحرب الباردة.

• في 1950، أمريكا عرضت على النحاس باشا يشارك في حلف دفاعي إقليمي على غرار الناتو، وهو رفض وقال احنا مش ناقصين (وكان معاه حق 😅)

• من قبل الحرب العالمية التانية نفسها، في حركات شيوعية كتيرة ظهرت في مصر، والوفد حاربها… ومع الحرب الباردة، الحركات دي زادت أضعافا مضاعفة بدعم سوفيتي، وكان من أشهرها "حدتو" و"إيسكرا"… واستغلوا فقر الشعب الشديد آنذاك في نشر البروباجندا الشيوعية وسطه، وأمريكا خافت طبعا والـCIA عمل مشروع FF (دا اختصار لاسم لا داعي لذكره هنا 😆) اللي كان هدفه الضغط على الملك فاروق لإجراء إصلاحات اقتصادية واجتماعية وسياسية في مصر على غرار خطة مارشال كدا، تجنبا لحصول تغير سياسي عنيف "ضد المصالح الأمريكية" في إشارة إلى المد الشيوعي طبعا… وهو نشف دماغه ومصلحش حاجة، لحد ما الفاس وقعت في الراس وحريق القاهرة حصل.

• في 1952، أمريكا لقت طرف يقدر يطيح بالملك ويمنع الشيوعيين من الحلول محله، وهو الظباط الأحرار نفسهم، فأيدتهم… وبما أن الظباط كانوا عايزين يجلوا الاحتلال البريطاني من مصر، فإنها ساعدت بشكل غير معلن في تحييد بريطانيا ودفعها نحو الجلاء في السنوات التالية… وساعدت بشكل معلن في إفشال العدوان الثلاثي، هي والاتحاد السوفيتي الـ2، لأن كلاهما أرادا ضم مصر لأحد كتلتيهما.

• في 1955، عبد الناصر طلب صفقة سلاح من أمريكا، بس هي اشترطت عليه يدخل في حلف ضد الاتحاد السوفيتي، وهو مكانش عايز ينحاز لحد في الحرب الباردة… فرفض، والاتحاد السوفيتي استغل الرفض دا وباع سلاح عن طريق تشيكوسلوفاكيا (تاني) بدون شروط وقال لمصر تقايض بالرز والقطن، وكل دا طبعا كيدا في أمريكا.

• في 1961، عبد الناصر أسس "حركة عدم الانحياز" بالاتفاق مع يوغوسلافيا والهند وغانا وإندونيسيا… لما كنت صغير، كتاب المدرسة كان بيقول "عبد الناصر أسس حركة عدم الانحياز" ومكانش بيقول عدم الانحياز لإيه… وبردو مكانش بيقول أمريكا والاتحاد السوفيتي دعموا مصر في العدوان الثلاثي ليه 😅

• خلال فترته عموما، عبد الناصر طبق ديكتاتورية حزب واحد رهيبة وشبيهة بتلك اللي كانت في الاتحاد السوفيتي، لكنها مكانتش شيوعية، بل كانت "ناصرية" تصر على عدم الانحياز، وحبس الشيوعيين نفسهم عشان دول موالين للسوفيت، وقفل المجال العام خوفا من أن تيار موالي لأحد طرفي الحرب يتسيد المشهد… وبردو، عبد الناصر تبنى فنكوش "القومية العربية" ليس إيمانا به، بل اعتقادا أنه لما يعمل تحالف مع "العرب" هيشكل "كتلة تالتة" تبعد ضغوط طرفي الحرب الباردة عنه… وبغض النظر عن حقيقة أنه كان مخطئ تماما في القرارين الأحمقين دول، بس لسبب ما، من النادر أن أي تحليل حالي يشير إلى الحرب الباردة كدافع لهما.

• في النكسة وما بعدها، أمريكا دعمت زومبائيل نكاية في المشروع الناصري، والاتحاد السوفيتي تعمد أنه ميساعدش عبد الناصر مساعدة حاسمة، خوفا من نجاح المشروع الناصري وقطعه للطريق على المد الشيوعي (ودا اللي خلى السادات لاحقا يزهق من الخبراء السوفيت ويطردهم أصلا).

• في حرب 1973، الجيش المصري حط على زومبائيل، فأمريكا تدخلت بالجسر الجوي لإنقاذ زومبائيل "الحليفة لها" من هزيمة أكبر قدام مصر "غير المنحازة رسميا على الأقل" وفرضت أمر واقع أدى لوقف الحرب.

• قبل وبعد حرب 1973، السادات كان مدرك أن المشروع الناصري عموما محكوم عليه بالفشل لغياب الحلفاء (ولأن العرب نفسهم ضده أصلا)، وأدرك أن لا مفر من الانحياز لأحد طرفي الحرب، وشاف التشابهات البنيوية بين النظامين الناصري والسوفيتي (رغم اختلاف الأيديولوجيا) وتوقع على أساسها أن الاتحاد السوفيتي محكوم عليه بالسقوط (وحصل!) وبناء عليه اختار أمريكا، واستغل أنها كانت عايزة تتحالف مع مصر في أنه يرجع بقية سينا في كامب ديفيد، وزومبائيل نخت واضطرت توافق وتغور من سينا وتسيب المستوطنات، لأنها أدركت أن حتى أمريكا نفسها مدية الأولوية لـ"تحالف مع مصر في الحرب الباردة" على رغبات زومبائيل.

• خلال فترة السادات عموما، كان في فراغ أيديولوجي ناتج عن انهيار المشروع الناصري، تاركا المجال للمد الشيوعي، مما دفع السادات لأنه يسير على خطى أمريكا في دعمها للإنجيليين عندها، وفتح المجال قدام الجماعات إياها الممولة من ممالك البترودولار، بل وسلحهم في حرب أفغانستان، وكل دا ليس حبا فيهم بل بهدف سد الفراغ مؤقتا قدام الشيوعيين، على ما هو يعيد بناء نظام جديد ذو تعددية حزبية عكس النظام الناصري… وطبعا مش محتاج أقول أنها كانت غلطة عمر السادات، وأبلغ دليل على كدا هو أنها كلفته حياته حرفيا.

كل البوست الطويل دا، ومع ذلك الحرب الباردة بيتم تجاهلها بشكل شبه تام؟؟!!! 🤯

بغض النظر عن أن الخريطة غلط، بس أنا متخيلتش أننا أقل دول العالم أمطارا… دا نحس صرف دا حرفيا 😅💔

تخيل لو نهر النيل (اللي عبيط إثيوبيا عايز يحجزه بدعم من دولة الإمارات غير الشقيقة اللي بتتدق من إيران) مكانش موجود في تاريخ مصر؟ طبعا مش محتاج أقول أن مكانش بقى في حضارة مصرية أصلا، وكان تاريخ البشرية كله اتغير… بس يا ترى شكل الحاضر كان هيبقى عامل ازاي؟

أكيد ساعتها عدد سكان مصر مكانش هيبقى 120 مليون، بل كان هيبقى أقل من عدد سكان ليبيا، وكان أغلبهم هيعيشوا على سواحل البحر المتوسط والأحمر وقناة السويس، ويشتغلوا في التعدين والصناعة (والتكنولوجيا؟)… وكان هيبقى الحل الوحيد لضمان عدم تعرضها للغزو هو أنها تبقى دولة نووية 😆☢️

امبارح أنا قلت أن إيران نفسها أكيد عارفة أن مصر بعتت قوات عند البعران لزوم اللقطة، وأن أكيد مصر قالت لها والـ2 منسقين مع بعض ومحدش يستهدف التاني… وحصل.

بس هل دا معناه أني دلوقتي بقيت موافق أو متقبل "اللقطة" دي؟ بردو لأ… البعران دول ميستاهلوش اللقطة حتى، والخاين المرتزق اللي باعت جيشنا ومكدره هناك دا ملوش أي مبرر… ميبقوش هم سابوا العالم كله (بما فيه أمريكا اللي لبستهم في الحيط) وشتمونا احنا، ونروح نقولهم احنا معاكو يا أشقاء والكلام اللي يقلب البطن دا.