من وانا صغيرة اوي اهلي عمالين يزرعوا فكرة الحجاب فدماغي وعمالين يقولوا شوفي بنت خالتك وبتاع وهي بقت احسن منك رغم انها اكبر مني ب5 سنين . ف من كتر ما اتضايقت منهم قلتلهم خلاص انا هتحجب . كان عندي تقريبا ساعتها 8 سنين او حاجة كدة ومن ساعتها مقلعتهوش تاني .
فكرة اني اقلعه كانت بتيجي على بالي كتير اوي لدرجة اني صارحت بيها بابا وقالي هجيبلك اللبس الي عايزاه وانزلي بشعرك عادي (انا ازهرية وبابا شيخ وامي متشددة اوي) متوقعتش رده هيبقىى كدة بس صدقته وبعدين حسيته بياكل بعقلي حلاوة ف طنشت .
المهم امبارح كنت عايزة اجيب حاجات من المكتبة واخويا مرضيش ينزل معايا . قمت خدتها فرصة وقلعت الحجاب ف الاسانسير وانا نازلة من العمارة وقلبي عمال بيدق جامد خايفة حد يشوفني .
المهم طلعت ومع اول خطوة برا بشعري حسيت باحساس غرييب . اتبسطت اوي وانا شايفة شعري بيطير من الهوا وخصل تيجي على وشي وانا بحوشها . حتى لما وصلت المكتبة الراجل الي فيها معرفنيش وعمال يكلمني كأني طفلة اوي ف حسيت بانشكاح غريب كدة ✨ انا مش كبيرة عندي 15 سنة دلوقتي بس شكلي مدي اصغر من كدة بكتير لكن الحجاب بيخلي شكلي اكبر .
وانا راجعة البيت كنت فرحانة اوي اني عملت حاجة كان نفسي فيها ولبست الطرحة ف الاسانسير عادي جدا وطلعت قدام اهلي بيها والدنيا تمام 🎀
فكرت اقلعه خالص من وراهم بعدين اصارحهم بالموضوع بس الفكرة موتراني اوي خصوصا ردة فعلهم لو اكتشفوا بدري . تنصحوني اعمل ايه ؟