خطيبتي بتعاملي وحش، وبترد على الرسائل متأخر، ولما أزورها بتستخدم الموبيل وتركيزها مش موجه لي، وبدأت تكسر بعض القواعد اللي اتفقنا عليها في بداية الخطوبة، وقلعت الدبلة والخاتم من إيديها. أعمل إيه؟ وأنا بحبها ومش قادر أتخلى عنها بس هي عندها حق من رأيكم؟ أصالحها إزاي؟
كنا، من حوالي أسبوع، رايحين منطقة يروحها ناس كتيرة، وركبنا توكتوك، بيشيل ٤ ركاب، بالإضافة إلى السائق، وكان الوقت الصباح الباكر، وأحنا أول الراكبين، فضلنة كتير مستنين التوكتوك يحمل، لأكثر من ١٥ دقيقة، حتى ركبت سيدة بجانبي، وتبقى المكان اللي بجانب السائق.
دقائق قليلة، وجت سيدة، برضه، السائق طلب مني النزول والركوب بجانبه(مكان ضيق وخطير وغير مريح، بالكاد، أصلًا، يسع للسائق، وعلى الراكب التشبث جيدًا وإلا فسيقع)، فأنا رفضت بلا، فطلب مني النزول، ونزلت أنا وخطيبتي، فعلًا، بسهولة، من غير ما أقول أي كلمة، ولا اعتراض، على حقي في المكان، وانتظاري لأكثر من ٢٠ دقيقة. والتوكتوك مشي.
(في البداية، بنت شابة ركبت، دقائق قليلة ولما لقت الوقت بيضيع، نزلت وركبت من الطريق مباشرةً).
حاولت أقلد البنت الشابة بعد ما طردنا، لكن فشلت وفضلنا أكثر من ١٠ دقائق على الطريق مستنين أي توكتوك من اللي بيعدوا بسرعة، ولقيت التوكتوك الأول(شكله مميز) أكمل توصيل الناس ورجع تاني، وأحنا لسه في مكاننا.
لما سألتها، قالت: إنها مبقتش حاسة بالأمان معايا من بعد ما شافت سلبيتي وعجزي عن حماية حقوقنا في الشارع، وأنت مش عارف تحمي نفسك وتاخد حقوقك، هتحميني وتحسسني بالآمان إزاي. وكانت عاوزاني أجادل وأتناقش مع السواق، يمكن يقتنع أو لا، وفي الحالة الأولى حافظت على حقك، والتانية تمشي وتتجنب خناقة ما لهاش لازمة، لأن سواقين التوكتوك مسلحين بأسلحة بيضاء، والسواق مش هيطلع مطوة من جيبه ويطعنني بها لمجرد مجادلة. ودي مش شجاعة ولا حكمة، بل دافع عن حقوقك، وهذه هي الشجاعة، ولو أصر السائق، تتجنب الخناق، وهذه هي الحكمة، لأن سائق توكتوك ضد مواطن عادي مواجهة غير كفئة.
وموقف آخر حصل في مكتب بريد بمنطقة شعبية، كانت خطيبتي معايا ، استنيت دوري كتير بقى، ولما جيه سألت الموظفة عن شيء وهي ما كانت تعرفه، فمشيت، زبون سريع دوره انتهى في أقل من نصف دقيقة، هي قالتلي كان المفترض تحاول وتجادل(قصدها أحاول آخذ فرصتي، وأزود الموظفة بالمعلومات يمكن تعرف). هي بقى كرهتني بعد الموقف دا.