Built a hobby app for Syria, grew to 5,000 users. Looking for a team to scale it | عملت تطبيق لسوريا كهواية، ووصل لـ 5000 مستخدم. عم فكر وسّعه ومحتاج فريق
مرحبا شباب،
من فترة بلّشت مشروع صغير كهواية اسمو ستاف ساي (StaffSay). الفكرة كانت بسيطة؛ منصة شفافية للشغل بسوريا، فيها الموظفين يقدروا يقيّموا الشركات، يحكوا عن الرواتب الحقيقية، تجارب المقابلات، وجو الشغل بكل شركة. يعني شي شبه منصات تقييم الشركات العالمية، بس معمول للسوق السوري.
بلّشتو لحالي ومن غير أي تسويق جدي، واليوم صار عنا حوالي ٥٠٠٠ مستخدم. هاد الرقم خلّاني فكر إنو في حاجة حقيقية بالسوق، وإنو الفكرة بتستاهل أكتر من مجرد تطبيق تقييمات.
الرؤية يلي عندي
بدي وسّع الفكرة تصير منصة سورية متكاملة للحياة المهنية، بتجمع بين؛
- منصة مهنية (بروفايلات، شبكة علاقات، فرص شغل)
- منصة نقاشات (مجموعات متخصصة، تبادل خبرات، أسئلة وأجوبة)
- والمنصة الحالية (تقييمات الشركات والشفافية)
يعني مكان واحد للسوري يبني فيه حضوره المهني، يلاقي شغل، يتواصل مع ناس بمجاله، ويعرف الحقيقة عن الشركات قبل ما يقدّم عليها.
عشو عم دوّر
عم ابني فريق صغير من ناس حبو الفكرة وحابّين يشتغلوا عليها معي. تحديداً؛
- مطوّرين (باك إند وفرونت إند وموبايل)
- مصمّمين تجربة مستخدم وواجهات
- ناس من خلفية موارد بشرية أو توظيف، يساعدوا بفهم احتياجات السوق والمحتوى
- مديرين مجتمع يبنوا المجتمع من الصفر
مو شرط تكون متفق مع كل أفكاري، بالعكس النقاش والاختلاف بالرأي مرحّب فيه.
بصراحة من الأول
هاد مشروع شغف هلّق، ما في راتب. الفكرة إنو نبنيها سوا، وإذا الأمور مشت ووصلنا لمرحلة فيها دخل أو تمويل، الناس يلي بنوا معي رح يكون إلهم حصّة عادلة من الملكية. ما رح أوعد بشي ما أقدر أوفي فيه.
أنا شخصياً مطوّر برمجيات عندي حوالي خمس سنين خبرة، والمشروع هاد بشتغل عليه بوقتي الخاص.
إذا الفكرة عجبتك، أو عندك أسئلة، أو حتّى عندك نقد، اكتبلي بالتعليقات أو بالخاص. حابب أسمع آراءكم حتّى لو ما بدك تشارك بالفريق.
شكراً إنكم قريتو لهون 🙏