u/Interesting-Yard8924

Lütt! Es ist nümm fünf vor zwölf! Es isch scho zwölfi gsii.

Wievilli Hitzerekord wärde mir no bräche? Khönne mir uf die Rekoord schtolz sii? Ganz ehrligg gsait: Gohts allne guet drbii? Ich hock sit vier Taag in dr abdungglete Wohnig, wo s ainewäg über 30ig Graad heiss wird. Trotz Ventilaator. Gang ich vors Huus, schtiig ich in e dumpfhaissi Wand iine. Für mii als elteri Persoon und Aschthmatikerin isch das schwiirig. Vor vierzig Joor isch es extreem gsii, wenn s Thermomeeter emolle uff 30 Graad klätteret isch. Ansünschte: 25-27 Graad im Juni/Juli. Aber es goht do nit numme um mii.

Fischschtärbe, Trockehait, Bränd, Gletscherschwund imene extreeme Tempo. Das sind numme e paar Schlaagziile vo de letschte Dääg. Rägnets emolle, denn z heftig und z weenig. Wältwitt gits immer meh Wätterextreem.

Wie wärs, sich ändligg bi unsere Politigger drfüür MASSIVSCHT iizsetze, dass die Klimaziil wältwitt umgsetzt wärde? Sofort und ohni Uffschuub. All die Parteye, wo numme dt Wirtschaft und s Waggstum im Aug händ und e bitzeli Klimapolitigg betriibe, ghööre aifach in Sänkel gschtellt.

Wie wärs, wenn sich jeede au mit sim Verhalte würd uusenandersetze? Muess me denn mit em Fluugi in dt Ferie fliege, muess me sin Gaarte mit Schotter zuepflaschtere? Ich waiss, es isch nit aifach esoo allne mööglich, zum Bischpill ihri alte Haizige umzrüschte. Doodrfür bruche mir tatkreftigi Regiirige - wältwitt! In däm Zämmehang: Dt Abschaffig vom Aigemietwärt mit dr Möglichkait, dt Unterhaltsarbete an Wohnhüüser vo de Schtüüre abzzieh, isch grad für Lütt mit eltere Hüüser, wo me saniire sötti, en Unding gsii. Au so öppis kurzsichtigs.

Das alles sind frommi Wünsch. Und villi händ scho uffgäh. Mache aifach witter wie bishär oder leugne dr Klimawandel. Es bruucht e Beweegig, die dermasse Drugg uffsetzt, dass sich ändligg öppis bewegt. Und dr Herr DT und sin chineesische Kolleeg ghööre so schnäll wie mööglig iigschperrt - läbenslang inerer forensische Psychiatrie.

Ich schriib das am 6i am Moorge, bevoor ich in Gaarte gang, go giesse. Noonemolle en superhaisse Daag! Was händ mir drvoo?

Edit: Und söll mir jetzt kaine vo deene kho, wo maint, es sigg alles egaal und wenn miir öppis mache würde, denn bringi das nütt. Mit däre Haltigg isch no nie öppis veränderet worde.

Bi grad uf enerer Basler Sitte gsii. Ha feschtgschtellt, dass dt Verleegig vonerer Busschtatioon iifrigscht uf änglisch diskutiert wird. Und überhaupt wird jeede Haafekääs uf änglisch zerlegt und duurekaut. Schpinned ihr? Will aine vo acht numme Änglisch kha? Mained Ihr nit, dass das scho e klitzeglaibitzeli problemaatisch isch?

WORUM?

Isch das aigetlig bünzlig, wenn ich es völlig drnääbe find, dass in jeederer grössere Schtadt bi uns änglisch langsam zur Alltagsschprooch graad unter de Jüngere mutiert?S isch halt die internationaali Schprooch... Jä! - Isch mir doch egaal. Uf em Kontinänt isch no nie Änglisch Amts- und Alltagsschprooch verwändet woorde. Blödi Globalisiirigs-Goldigs-Kalb-Huldigung!

Do motzet dt ihr immer gege dt Boomer und so. Aber die händ offebaar meh Ruckgroot, als dt Ihr öich so wältoffe zaigende Duggmüüser. So! Das hett jetzt emolle müesse gsait sii.

Däm saag ich: Linguischtische, imperialischtische Neokolonialismus, wo duur die internationaale Konzärn, proteschiert vo de kantonaale Regiirige sich iineschliicht. Hejoo - denn wird halt wie in Ghana Änglisch Amtsschprooch.

Es regt mi uff, wenn ich uff Änglisch schriibe muess, will dr Novartis-Mitarbeiter, wo sitt vier Joor doo läbt, hundert Gründ hett, kai Dütsch lerne z miesse. Drmit är das au verschtoht, was ich z verzapfe ha ... söll doch ummehüüle oder e Übersetzigsprogramm benutze. Odr no besser ändligg en Dütschkurs bsueche und sich bi miir mälde. Ich reed mit däm über mini Alltaagssoorge gärn uf Schwizzer- oder Hochdütsch. Au über Zoom.

Isch doch wohr.

Edit: Dä Teggscht isch e glai weeneli iroonisch gmaint. Aber wenn me emolle widr zwai Daag in Baasel gsi isch, fallt das halt scho uff.

Han das grad entdeckt, ha gfunde "ändligg" und ha welle luege, was in minere alte Haimatschtadt so abgoht und widr e bitzli Baselditsch lääse. Abr.... verdelli! Okey, has gseh - Wältschtadt worde. Drumm esoo vill Änglisch, drmit alli alles mitbikömme. Trotzdämm. Isch scho e bitzeli sältsam. Soodelli und jetzt khönne alli uff mir ummehacke. Was für en Iischtiig. Odr Ussschtiig? Bi villicht aifach vill z alt. Aber guet, dass es öich gitt.